Həftəiçi “Qalatasaray”la bağlı mühüm olaylar yaşandı. Bu olaylar üzündən bu gün keçiriləcək derbi ərəfəsində iki əzəli rəqib arasında münasibətlər yenə gərginləşib.

Məsələ burasındadı ki, “Cim-Bom” bir müddət öncə “Meritking.news” xəbər saytı ilə sponsorluq anlaşması imzaladığını açıqladı. Bu mövsümün sonuna qədər komandanın formasının arxasında məhz bu saytın adı qeyd olunmalıydı. Bunun qarşılığında İstanbul nəhəngi 7 milyon dolları nəğd olmaqla 14 milyon dollar qazanacaqdı! Anlaşmanın detalları ictimaiyyətə açıqlanan kimi sosial şəbəkələrdə qiyamət qopdu. Həqiqətən də cəmi 2-3 ay öncə yaradılan, oxunma və izləyici sayı az olan sıradan bir saytın belə böyük məbləğ ödəməyə razılıq verməsi dərhal diqqəti cəlb etdi. Amma sən demə, reallıq başqa cür imiş. Artıq uzun illərdi ki, Türkiyədə “Meritkinq” adlı qeyri-qanuni bukmeker saytı fəaliyyət göstərir. Yəni dərhal “Qalatasaray”ın məhz bu şirkətlə müqavilə imzalaması və sadəcə, gözdən pərdə asmaq üçün yanına “news” sözünü əlavə etməsi barədə ciddi söz-söhbət yayıldı. Çox keçmədən məlum oldu ki, “Qalatasaray” bu şirkətlə müqaviləyə “hər hansı bir problem yaşanarsa, sözləşmə ləğv ediləcək” maddəsi saldırıbmış. Bu da onu göstərir ki, “sarı-qırmızılar” özləri də bu şirkətin şübhəli olduğunu bilirdilər. Başqa sözlə deəsk, Türkiyənin ən böyük klublarından biri göz-görə-görə qeyri-qanuni bukmeker şirkəti ilə əmədaşlığa başlayıbmış. Hətta məlum olub ki, bu şirkətin qurucusu şimali kiprli Fedlan Kılıçaslan qeyri-qanuni fəaliyyətinə görə bir neçə dəfə həbs olunub.

Bu qalmaqallı anlaşma ictimaiyyətə açıqlanandan bir neçə gün sonra isə “Spor Toto” təşkilatı Cümhuriyyət prokurorluğuna rəsmi şikayət ünvanladı. 2010-23-cü illərdə Türkiyə çempionatının ana sponsoru olan təşkilat “Qalatasaray”dan başqa “Adana Dəmirspor”la “Sivasspor”un da sözügedən qeyri-qanuni bukmeker şirkəti ilə əlaqələrinin yoxlanılmasını tələb etdi. Çünki həm “Adana Dəmirspor”un, həm də “Sivasspor”un ev oyunları zamanı stadionun kənarındakı LED reklam lövhələrində “Meritkinq”in reklamına rast gəlmək mümkündü. Ancaq hər iki klub həmin lövhələrdə yerləşdirilən reklamlara görə cavabdehlik daşımadıqlarını bildiriblər. Çünki orda reklam yerləşdirən şirkət tenderlə müəyyənləşir. Həmin şirkətin adı isə “Sezgi Ajans”dı.

Qısası, qalmaqalın getdikcə böyüdüyünü görən “Qalatasaray” “Meritkinq.news” ilə anlaşmanın müvəqqəti dondurulduğunu açıqladı! Klubun rəsmi açıqlamasında “tələb olunan sənədlər, məlumatlar və digər iddialar dəqiqləşənə qədər əməkdaşlığı dayandırırıq” sözlərinə yer verildi. Maraqlıdı, görəsən, kluba nəğd edənilən 7 milyon dolların aqibəti necə olacaq? Bu arada “Fənərbaxça” da bu qalmaqaldan kənar durmamaq qərarına gələrək əzəli rəqibini “sancıb”. Belə ki, “sarı-lacivərdlilər”in idarə heyətinin üzvü və baş hüquqşünası Fethi Pekin klub saytına açıqlamasında “Qalatasaray”dan 7 (!) ayrı quruma – Gənclər və İdman Nazilriyinə, Daxili İşlər Nazirliyinə, Maliyyə Nazirliyinə, Sərmayə Bazarı Qurumuna, “Spor Toto” Təşkilat Başqanlığına, Banklar Birliyinə və TFF-yə şikayət etdiklərini açıqlayıb. “Qalatasaray”ın ikinci başqanı Mətin Öztürk isə buna cavab olaraq “meydanda qalib gələ bilməyən bu zehniyyət bizi meydandan kənar olaylara çəkmək üçün yeni oyunlara əl atır. Klubumuzun hesabını verə bilməyəcəyi heç bir mövzu yoxdu” ifadəsini işlədib. Bütün bunlar bugünkü derbi ərəfəsində onsuz da gərgin olan ab-havanı daha da gərginləşdirib.