'Qalatasaray'' futbol ictimaiyyətinin etirazından sonra sponsorluq müqavilələrindən birini ləğv etməli olub.

Bilindiyi kimi Türkiyə çempionu bir müddət öncə ''meritKing.news'' adlı xəbər portalı ilə sponsorluq anlaşması imzalamışdı. ''Cim-Bom'' bu saytın adını formanın arxasına vurmuş və bunun qarşılığında komandanın 2 il ərzində ümumilikdə 14 milyon dollar qazanacağı açıqlanmışdı. Hətta deyilənə görə bu pulun 7 milyon dolları nəğd ödənilmişdi. Amma bu anlaşma qısa müddət ərzində böyük hay-küyə və müzakirələrə səbəb oldu. Belə ki, ''meritking'' adı ilə həm də qeyri-qanuni mərc saytı fəaliyyət göstərir.

''Qalatasaray''ın əslində məhz bu qeyri-qanuni şirkətlə anlaşdığı və sadəcə gözdən pərdə asmaq üçün guya ''meritking.news'' portalı ilə əməkdaşlıq etməsi barədə xəbərlər yayıldı. ''Spor Toto'' təşkilatı ''Qalatasaray''dan Cümhuriyyət Prokurorluğuna şikayət etdikdən sonra isə anlaşma dayandırıldı. Daha doğrusu, rəhbərlik müqaviləni dondurdu.

Nəhayət, dünən ''Cim-Bom'' ''meritking.news'' ilə əməkdaşlığın birdəfəlik ləğv olunduğunu açıqladı.

ƏLİ