"Neftçi" srağagün Misli premyer-liqasının 4-cü turunda "Araz-Naxçıvan"ın qonağı idi.

"Sülh"lə başa çatan matç geridə xeyli sual buraxdı. Roman Qriqorçuk ilk qələbəsini nə vaxt qazanacaq? "Ağ-qaralar"ın toparlanması üçün nə qədər vaxt lazımdı? Bahalı legionerlər niyə komandaya uyğunlaşa bilmir? Yoxsa bu mövsüm də boşa veriləcək?

Siyahını uzatmaq olar, amma oyunda dəqiqləşən bir məsələyə də şahidlik etdik. İllərin təcrübəsi, ən peşəkar yerli futbolçulardan hesab edilən, millinin də kapitanı, gələcək nəsillərə örnək olmaq əvəzinə liderlik keyfiyyətlərini itirən Emin Mahmudov artıq illərin və gələcək nəsillərin "Neftçi"si olduğunu iddia edən kollektivin kapitanı deyil! Bazübənd artıq Ramil Şeydayevin qolunda olacaq!

Qərarın baş məşqçi Roman Qriqorçukun istəyi, bəlkə də israrıyla verildiyini düşünürəm. Hər halda, bu, "Neftçi"də son vaxtlar atılan ən doğru ikinci addımdı (birincisi Roman Qriqorçukun təyinatıdı). Tarix boyunca əks-səda doğuran irəliləyişlər rezonans doğuran qərarların bəhrəsi olub. Bu dəfə də eyni olacağını proqnozlaşdırmaq olar. Həmçinin, Ramil kapitan sarğısıyla meydama çıxdığı ilk oyunda qol vuraraq bazübəndə layiq olmağa çalışdığını sübut etdi.

Bəllidi ki, bu həm də bir neçə gün əvvəl sosial şəbəkə hesabıyla ismarıc yayan, klub rəhbərliyinə sətiraltı yox, birbaşa mesaj göndərən Qara Qarayev üçün də tutarlı cavabdı. Yəni indi illərin təcrübəsi və başqa keyfiyyətlər rol oynamır. Uğura gedən yol məhz mövcud durumla tənzimlənir. Odu ki, həm Emin Mahmudov, həm də Qara Qarayev erası tarixə qovuşmaq üzrədi. Əlbəttə, seçim onlarındı. Ya əvvəlki əzəmətlərini qaytarmaq üçün vuruşmalı, ya da taleləri ilə barışmalıdılar.

KƏNAN BAHADIR