Argentina çempionatında 17-ci turdan sonra lider dəyişmədi.

“Veles Sarsfild” qələbə qazanmaqla mövqeyini qorudu. Əsas izləyicisinin büdrəməsi isə “Veles”in liderliyini bir qədər möhkəmləndirdi.

12-ci turdan zirvədə olan “Veles Sarsfild” əvvəlki turda “Rosario Sentral”dan 3 cavabsız top buraxmış, Qustavo Kinterosun komandasının ölkə çempionatında 5 matçlıq qələbə seriyası qırılmışdı. Lider bu dəfə “Rasinq” ilə ev oyununda büdrəmədi. Tura 7-ci yerdə başlayan qonaqlar “Veles”in hücumlarına uzun müddət tab gətirə bildilər. Onların arabir əks-hücumlarda hesabı açmaq şansı da oldu. Amma istənilən halda matç liderin böyük üstünlüyü şəraitndə keçdi. Və 86-cı dəqiqədə Brayan Romero yerli publikanı ayağa qaldırdı. 33 yaşlı hücumçu bu mövsüm 10-cu qolunu vurmaqla bombardirlərin yarışında liderliyini möhkəmləndirdi. Çətinliklə qazanılan qələbə həm də “Veles Sarsfild”in mövqeyini gücləndirdi.

Tura liderdən 3 xal geri qalmaqla 2-ci yerdə başlayan “Talyeres de Kordoba” zirvə uğrunda mübarizədə büdrdi. Kordobalılar evdə “Belqrano”ya qalib gələ bilmədilər. Halbuki bunun üçün real şərait vardı: müdafiəçi Rebola 2-ci dəqiqədə rəqibə qarşı kobud hərəkətinə görə meydandan qovuldu. Ev sahiblərinin bundan yararlanacaqlarını düşünmək olardı. Lakin matçı, demək olar ki, əvvəldən axıradək çoxluqda keçirən Aleksander Medinanın komandası qonaqların müdafiəsini heç cür yara bilmədi və 3-cü pilləyə gerilədi.

Çünki tura bu yerdə başlayan “Atletiko Urakan” evdə “Sarmyento”ya 3:1 hesabı ilə qalib gələrək topların fərqinə əsasən 2-ci yerə çıxdı. Turu xalsız başa vuran “Union” və “Atletiko Tukuman” uyğun olaraq, 4-5-ci yerdən hərəyə bir pillə gerilədi. “İnstituto” isə qələbə qazanmaqla 6-cı yerdən 5-ə qalxdı.

15-ci turda “Superklasiko”da “Boka Xuniors”u səfərdə minimal hesabla üstələyən “River Pleyt”in uğurlu oyunlar seriyası ilə liderlər qrupuna yaxınlaşmaq şansı vardı. Lakin son çempion proqnozları doğrulda bilmədi. Növbəti turda evdə “Talyeres de Kordoba”ya uduzan (0:1) “milyonçular” bu dəfə səfərdə “Platense” ilə qolsuz heç-heçəyə razılaşdılar. Marselo Qalyardonun komandası növbəti xal itkisi ilə 8-ci yerdən 7-yə yüksəldi.

Argentinanın 1 nömrəli derbisindəki məğlubiyyətdən sonra Dieqo Martines “Boka Xuniors”un başında yalnız “Belqrano”dan iki cavabsız top buraxana qədər qaldığını xəbər vermişdik. Ölkə nəhənginə yanvarda təyinat alan 45 yaşlı mütəxəssisin yerini Mariano Erron tutub. Komandanı ötən ilin martından bu ilin yanvarına qədər çalışdıran 46 yaşlı mütəxəssisin dönüşü uğurlu alındı. “Boka Xuniors” evdə “Arxentinos Xuniors”a qalib gələrək 3 oyunluq məğlubiyyətə son qoydu. Ölkə nəhəngi bu qələbə ilə 13-cü pillədən 10-cü yerə qalxdı.

17-ci tur
Veles Sarsfild - Rasinq 1:0
B.Romero, 86.
Talyeres de Kordoba - Belqrano 0:0
Atletiko Urakan - Sarmyento 3:1
Tobio, 6. De la Fuente, 77. Lukas Akosta, 90+1-öz qapısına – Morales, 30.
Union - Sentral Kordoba 0:2
Meli, 8. Palavesino, 85.
Atletiko Tukuman - Tiqre 1:2
Tesuri, 31 – Oriuela, 45+1-öz qapısına. S.Qonsales, 80.
İnstituto - San Lorenso 2:0
Rekuena, 39. Russo, 86.
Platense - River Pleyt 0:0
Boka Xuniors - Arxentinos Xuniors 1:0
Merentyel, 32.
Ximnasiya - Qodoy Krus 0:1
S.Rodriges, 51.
Nyuellz Old Boyz - Lanus 2:1
İ.Ramires, 64-p. Miyeviç, 90+3 – M.Moreno, 54.
İndependyente - Deportivo Riestra 3:1
Montyel, 18; 27. Avalos, 62 – G.Pereyra, 24.
Barrakas Sentral - İndependyente Rivadaviya 1:1
X.Ruis, 44 – Qonyi, 19-öz qapısına.
Banfild - Estudiantes 1:2
Sepulveda, 56 – T.Palasios, 44. Burqos, 89.
Defensa y Xustisiya - Rosario Sentral 2:1
Miritelyo, 12; 15 - Kintana, 74.

1. Veles Sarsfild 17 11 3 3 30-11 36
2. Atletiko Urakan 17 8 7 2 19-9 31
3. Talyeres de Kordoba 17 8 7 2 23-16 31
4. İnstituto 17 8 4 5 23-14 28
5. Union 17 7 6 4 18-15 27
6. Atletiko Tukuman 17 7 5 5 18-18 26
7. River Pleyt 17 6 7 4 20-12 25
8. Rasinq 17 7 4 6 21-15 25
9. Belqrano 17 6 7 4 21-19 25
10. Boka Xuniors 17 6 6 5 20-17 24
11. Deportivo Riestra 17 7 3 7 19-21 24
12. Estudiantes 17 6 5 6 18-17 23
13. Ximnasiya 17 6 5 6 16-15 23
14. Rosario Sentral 17 6 4 7 21-18 22
15. Qodoy Krus 16 5 7 4 17-16 22
16. İndependyente 17 4 10 3 13-12 22
17. Tiqre 17 5 6 6 21-22 21
18. Platense 17 5 6 6 14-15 21
19. Lanus 17 4 8 5 19-24 20
20. İndependyente Rivadaviya 17 5 5 7 11-17 20
21. Nyuellz Old Boyz 17 5 5 7 12-19 20
22. Sentral Kordoba 17 5 4 8 20-26 19
23. Arxentinos Xuniors 17 5 4 8 11-17 19
24. Sarmyento 17 4 6 7 13-18 18
25. San Lorenso 16 4 5 7 13-16 17
26. Banfild 17 4 5 8 15-21 17
27. Defensa y Xustisiya 17 3 6 8 12-24 15
28. Barrakas Sentral 17 2 6 9 8-22 12

Bombardirlər: B.Romero (Veles Sarsfild) – 10, M.Ximenes (Boka Xuniors), X.Errera (Deportivo Riestra) – 8.