Nəhayət, Argentina çempionatında “Veles Sarsfild”in qələbə yürüşünü dayandıran tapıldı. 16-cı tur lider üçün uğursuz oldu. “Veles”in əsas izləyicilərindən yalnız biri qalib gəldi. Nəticədə liderlə əsas təqibçisi arasındakı xal fərqi 6-dan 3-ə azaldı.

12-ci turdan 1-ci yerdə olan “Veles Sarsfild” ölkə çempionatının son 5 oyununda xal itirməmiş və zirvədə möhkəmlənmişdi. Qustavo Kinterosun komandası bu dəfə səfərdə “Rosario Sentral”dan xal ala bilmədi. İlk yarının ortalarında qonaqlar azlıqda qaldı. Müdafiəçi Damian Fernandesin rəqibə qarşı cərimə meydançasındakı hərəkəti qayda pozuntusu kimi dəyərləndirildi. Hakim ona birbaşa qırmızı vərəqə göstərdi. Az sonra Malkorra penalti ilə hesabı açdı. Qeyd edək ki, qonaqlar 70 dəqiqədən artıq azlıqda oynamasına baxmayaraq, topa rəqibdən daha çox nəzarət etdi və qapıya zərbələrin sayında da üstün oldu. Lakin meydan sahiblərinin 38 yaşlı qapıçısı Broun 8 seyvlə liderin bütün dəqiq zərbələrinin qarşısını aldı. Xal itkisi ilə barışmayan “Veles” matçın sonuna yaxın müdafiəni böyük ölçüdə unudaraq cavab qolunu vurmağa daha çox meyilləndi. Rəqib isə liderin arxa xəttində yaranan boşluqlardan məharətlə yararlandı: Sandeslə Ortisin vurduğu növbəti qollar liderin 5 oyunluq qələbə seriyasının darmadağınla qırıldığını rəsmiləşdirdi. Amma “Veles Sarsfild” böyükhesablı məğlubiyyətə baxmayaraq, mövqeyini itirmədi.

Tura liderdən 6 xal geri qalmaqla 2-4-cü yerlərdə başlayan üç komanda müxtəlif nəticələr göstərdi. Səfərdə “Qodoy Krus”la heç-heçəyə (1:1) razılaşan “Atletiko Urakan” birpilləlik geriləmə ilə 3-cü yerə düşdü. “Sarmyento”ya uduzan (0:1) “Union” 4-cü yerdə qaldı. “Talyeres de Kordoba” isə çətin səfərdə masimum nəticəyə nail oldu. Uruqvaylı Aleksander Medinanın komandası son çempionu məğlub etdi. Əvvəlki turda “Superklasiko”da “Boka Xuniors”u səfərdə minimal hesabla üstələyən “River Pleyt”in uğurlu oyunlar seriyası ilə liderlər qrupuna yaxınlaşacağını gözləmək olardı. Lakin ölkə nəhəngi proqnozları doğrulda bilmədi. Halbuki “Talyeres de Kordoba” ilə oyun “milyonçular”ın aşkar üstünlüyü şəraitində keçdi. Amma Marselo Qalyardonun komandası Gido Erreranın qoruduğu qapıya heç cür yol tapa bilmədi. 32 yaşlı əlcək sahibi 7 seyvlə komandasının qələbəsində böyük rol oynadı. Qonaqlara qələbə gətirən yeganə qolu isə ilk hissədə Cirotti vurdu. Beləliklə, bu mövsüm 4-cü məğlubiyyət son çempionu 6-cı yerdən 8-ə saldı. “Talyeres de Kordoba” isə liderin ən yaxın izləyicisi kimi qaldı.

Tura 25 xalla 5-ci yerdə başlayan “Atletiko Tukuman” yenə büdrədi. Fərq ondadı ki, Fakundo Savanın komandası ardıcıl ikinci məğlubiyyətdən sonra hesabına bir xal yaza bildi. “Arxentinos Xuniors”la səfər oyununda qeydə alınan qolsuz heç-heçə “atletlər”in turnir cədvəlindəki mövqeyini dəyişmədi.
Argentinanın 1 nömrəli derbisindəki məğlubiyyətdən sonra Dieqo Martinesin “Boka Xuniors”un başında qalmaq şansı bir qədər də azalmışdı. Ölkə nəhənginə yanvarda təyinat alan 45 yaşlı mütəxəssisi yalnız növbəti matçda uğurlu nəticə xilas edə bilərdi. Lakin onun komandası yenə uduzdu.

“Belqrano”dan iki cavabsız top buraxan “Boka Xuniors”un ardıcıl 3-cü məğlubiyyəti Martinesin komandanı 8 ay çalışdırmasına səbəb oldu. Mövsümü qeyri-sabit keçirən paytaxt komandası 11-ci pillədən 13-cü yerə yuvarlandı.

16-cı tur
Rosario Sentral - Veles Sarsfild 3:0
Malkorra, 28-p. Sandes, 76. Ortis, 85.

Qodoy Krus - Atletiko Urakan 1:1
Andino, 68 – Rasmussen, 27-öz qapısına.

River Pleyt - Talyeres de Kordoba 0:1
Cirotti, 12.

Sarmyento – Union 1:0
E.Lopes, 82.

Arxentinos Xuniors - Atletiko Tukuman 0:0

İndependyente Rivadaviya - İnstituto 1:1
Vilya, 25 – Puebla, 18.

Rasinq - Platense 1:1
S.Sosa, 38 – Maynero, 2.

Belqrano - Boka Xuniors 2:0
Xara, 59. N.Fernandes, 69.

Deportivo Riestra - Nyuellz Old Boyz 3:3
X.Errera, 45+1-p.; 45+2. Beneqas, 90+6 – Silvestri, 8; 90+3. Baneqa, 18-p.

San Lorenso - Banfild 2:1
Munyain, 29-p.; 51 – Sepulveda, 45+3-p.

Estudiantes - Defensa y Xustisiya 1:0
Karrilyo, 4.

Sentral Kordoba - Barrakas Sentral 2:1
Varaldo, 38. Meli, 45 – İnsua, 90+7-p.

Lanus - Ximnasiya 0:0

Tiqre - İndependyente 1:1
Monson, 52 - Avalos, 24.

1. Veles Sarsfild 16 10 3 3 29-11 33
2. Talyeres de Kordoba 16 8 6 2 23-16 30
3. Atletiko Urakan 16 7 7 2 16-8 28
4. Union 16 7 6 3 18-13 27
5. Atletiko Tukuman 16 7 5 4 17-16 26
6. İnstituto 16 7 4 5 21-14 25
7. Rasinq 16 7 4 5 21-14 25
8. River Pleyt 16 6 6 4 20-12 24
9. Belqrano 16 6 6 4 21-19 24
10. Deportivo Riestra 16 7 3 6 18-18 24
11. Ximnasiya 16 6 5 5 16-14 23
12. Rosario Sentral 16 6 4 6 20-16 22
13. Boka Xuniors 16 5 6 5 19-17 21
14. Estudiantes 16 5 5 6 16-16 20
15. Platense 16 5 5 6 14-15 20
16. Lanus 16 4 8 4 18-22 20
17. Qodoy Krus 15 4 7 4 16-16 19
18. İndependyente 16 3 10 3 10-11 19
19. Arxentinos Xuniors 16 5 4 7 11-16 19
20. İndependyente Rivadaviya 16 5 4 7 10-16 19
21. Tiqre 16 4 6 6 19-21 18
22. Sarmyento 16 4 6 6 12-15 18
23. San Lorenso 15 4 5 6 13-14 17
24. Banfild 16 4 5 7 14-19 17
25. Nyuellz Old Boyz 16 4 5 7 10-18 17
26. Sentral Kordoba 16 4 4 8 18-26 16
27. Defensa y Xustisiya 16 2 6 8 10-23 12
28. Barrakas Sentral 16 2 5 9 7-21 11

Bombardirlər: B.Romero (Veles Sarsfild) – 9, M.Ximenes (Boka Xuniors), X.Errera (Deportivo Riestra) – 8.