15 sarı, 1 qırmızı vərəqənin göstərildiyi ilk turla bağlı yazdığımız tərifin dozası, deyəsən, artıq olub.

2-ci turda həm vərəqə sayı ikiqat artdı, həm də penalti nöqtəsi göstərildi. Bununla belə, baş məşqçilər hələ ki sakitdi. İdarəçiliklə bağlı kəskin narazılıq bildirən yoxdu.

Qarabağ – Kəpəz, RAUF ALLAHVERDİYEV
Cari mövsümdə premyer-liqada ilk matçına təyinat alan Rauf Allahverdiyevə Namiq Hüseynov, Teymur Teymurov və 4-cü hakim qismində Elvin Bayramov kömək edirdi. Ədalət təmsilçilərinin işlərinin öhdəsindən layiqincə gəldiyini deyə bilərik. Onsuz da mübarizənin, əsasən meydanın “Kəpəz”ə aid hissəsində getməsi referinin işini asanlaşdırmışdı. Oyunda yeganə diqqətçəkən məqam Cavad Kərimovun 87-ci dəqiqədə Abdulla Zubirə qarşı pressinq edəndən sonra fransız futbolçunu yıxıb komandasını əks-hücuma çıxarması idi. Bəlkə də əks-hücum qolla nəticələnəcəyi halda, VAR epizodu incələyəcəkdi. Ancaq “Qarabağ”ın üç top fərqi ilə öndə olması Allahverdiyevi bu epizodun üzərində dayanmağa məcbur etmədi. Ümumilikdə idarəçilik qənaətbəxş idi.

Səbail – Neftçi, KAMAL UMUDLU
Bu oyunun idarəçiliyi Kamal Umudlunun briqadasına tapşırılmışdı. Oyunun gedişində hakim qərarlarından dəfələrlə narazılıq edən “Səbail”in baş məşqçisi Şahin Diniyev oyunsonrası mətbuat konfransında referini təriflədi. Ümumiyyətlə, hansı qərəzli qərar görmədik. Umudlu “Səbail”ə 5, “Neftçi”yə 3 olmaqla 8 sarı vərəqə göstərdi.

Sabah – Zirə, ƏLİYAR AĞAYEV
Təcrübəli FİFA referisinin idarə etdiyi, hər iki baş məşqçinin “derbi” adlandırdığı oyunda idarəçiliklə bağlı narazılıq olmadı. “Sabah”ın qapısına haqlı olaraq, penalti təyin edildi. Bunu “CBC Sport”un yayınladığı görüntüdən də aydın şəkildə görmək olurdu ki, top Amin Seydiyevin əlinə dəyib. Sadəcə, epizodların birində Ağayevin yanlış qərarı “Zirə”nin haqlı etirazına səbəb oldu. Amma sonradan yardımçılarının köməyindən istifadə edən Ağayev qərarını dəyişdi.

Araz-Naxçıvan – Şamaxı, FƏRİD HACIYEV
Tərəflərin kobud və sərt oyuna meyl göstərməməsi Fərid Hacıyevin başçılıq etdiyi hakimlər briqadasının işini asanlaşdırmışdı. Köməkçiləri ilə yaxşı anlaşan referi “oyunun ipi”ni əlində yaxşı saxlayır, epizodlara zamanında reaksiya verirdi. Təsadüfi deyil ki, nə oyunun gedişində, nə də oyunsonrası mətbuat konfransında hakimlərdən narazılıq bildirən, onların işini müzakirəyə çıxaran oldu. “Araz Naxçıvan” hesabı açandan sonra oyundakı gərginlik artdı. Bunun da nəticəsində futbolçular kobud oynamağa başladı. Elə bu səbəbdən də 70-ci dəqiqəyə qədər cəmi bir sarı vərəqə göstərən hakim məhz sona doğru üç dəfə əlini cibinə atdı ki, bu qərarlarda da haqlı idi. Belədə hakimlərin idarəçiliyini normal qiymətləndirmək olar.

Turan Tovuz – Sumqayıt, TURAL QURBANOV
Tovuzda ənənəvi azarkeş təzyiqinə və rəqabətli oyuna şahidlik etdik. Samir Abasov demişkən, deyəsən, Tural bəy məhz tərəfdarların yaratdığı ab-havanın təsirinə düşmüşdü. Yoxsa lap yaxınlığında, gözləri önündə Cordan Rezabalanın ayağını tapdalayan və zədələnməsinə səbəb olan Kristian da Silvanın “dərsini verərdi”. Ədalət təmsilçisi cibindən nəinki qırmızı, sarı vərəqə belə çıxarmadı! VAR da susdu! O başqa məsələ ki, “Sumqayıt” da ötən mövsüm hakimlərdən çox “xeyir görüb”. Amma AFFA rəhbərliyi və Hakimlər Komitəsinin sədri yenidisə, belə acınacaqlı durumlar geridə qalmalıdı. Nə olsun ki, Qurbanov həmin epizoda qədər və sonra qənaətbəxş çalışdı və başqa səhvə yol vermədi?! Yadda hakimin mövsümdəki ilk kobud səhvi qaldı.