Yalnız sarı və qırmızı vərəqələr prizmasından yanaşsaq, 6-cı turun yetərincə səliqəli keçdiyini deyə bilərik. Cəmi 16 sarı vərəqə göstərildi, Tural Qurbanov “Qarabağ” – “Səbail” oyununda, ümumiyyətlə, əlini cibinə salmağa ehtiyac görmədi.

İdarəçiliyə kölgə salan əsas məqam “Sabah” – “Turan Tovuz” oyununda yaşandı. Belə deyək: qonaqların vurduğu qolda topun meydanı tərk edib-etmədiyi yalnız laysmanın vicdanına yazıldı. Müasir texniki vasitələr publikanın birmənalı mülahizə yürütməsinə imkan vermədi...

Qarabağ – Səbail, TURAL QURBANOV
Baxımlı oyuna şahidlik etdiyimizə şübhə yoxdu. “Səbail” aşkar keyfiyyət fərqinə baxmayaraq, hücum etməkdən çəkinmədi. Matçboyu müəyyən qayda pozuntuları qeydə alınsa da, Tural Qurbanov rəsmi xəbərdarlığa ehtiyac duymadı. Belədə mövsümdə ilk dəfə çempionat oyunu vərəqəsiz bitdi! Ədalət təmsilçisinin xüsusilə 2-ci hissədə tez-tez fit çaldığını və dinamik matçın estetikasına ziyan vurduğunu deyə bilərik. Lakin bəzi hallarda görünən kobud müdaxilələrə görə hakimin bütün qərarlarını qınamaq doğru olmaz. Tural bəydən narazı qalan da olmadı. Qısası, o, mövsümdəki üçüncü sınağından üzüağ çıxdı.

Sabah – Turan Tovuz, ƏLİYAR AĞAYEV
Oyunun gərgin keçəcəyi əvvəldən bəlliydi. Ona görə ki, komandalar yüksək hədəflər uğrunda mübarizə aparır. Belədə oyunun xeyli kobud müdaxilə və qayda pozuntusu ilə yadda qalması təbiidi. Hər halda, Əliyar Ağayev bu məsuliyyətin altında əzilmədi. İstər rəsmi, istərsə də qeyri-rəsmi xəbərdarlıqlarla həm futbolçuların, həm də texniki zonanın hərəkətlərinə nəzarət etdi. Hakimlər briqadasının müzakirə doğuran yeganə qərarı Roderik Millerin sayılmayan qoludu. Məsələylə bağlı konkret dəlil olmadığından mövzunun artıq tarixə qovuşduğunu deyə bilərik.

Zirə - Neftçi, ELÇİN MƏSİYEV
FİFA referisi üçün bu qarşılaşmanı idarə etmək elə də çətin olmadı. Onsuz da həm “Zirə”, həm də “Neftçi” kobudluğa həvəs göstərməyən, o qədər də aqressiv oynamayan komandalardı. Köməkçiləri ilə yaxşı anlaşan Məsiyev də bu xüsusiyyəti nəzərə aldı, görüşü rahat idarə etdi. Nə Roman Qriqorçukdan, nə də Rəşad Sadıqovdan hakim idarəçiliyi ilə bağlı narazılıq eşitməməyimiz təsadüfi deyil. İki epizodla bağlı “Neftçi” futbolçuları oyunun gedişində etiraz edirdi. İlk epizodda Ramil Şeydayev Rafael Utziqlə toqquşandan sonra yerdə qalsa da, hakim oyunu davam etdirdi. Həmin epizodun davamında da top Rəhmanın zərbəsindən sonra Məqsədə dəyərək meydandan çıxdı. “Ağ-qaralar”ın əllə oyun işarəsi, yaxud da Ramilin yerdə qalmasına görə cərimə zərbəsi istəyi Məsiyevin təsdiqini almadı. Bir də Dembo Darbo rəqiblə toqquşandan sonra yerdə qalsa da, hakim oyunu davam etdirdi. Bu mübahisəli epizodlarla bağlı narazılıqların artmaması hakimin doğu qərar verməsinin əlaməti sayıla bilər.

Araz-Naxçıvan - Kəpəz, RƏVAN HƏMZƏZADƏ
Turun açılış matçı Rəvan Həmzəzadənin rəhbərlik etdiyi hakimlər briqadasına tapşırılmışdı. Meydan sahibləri ilk dəqiqələrdən mübarizə əzmini ortaya qoysalar da, hansısa aqressivliyin şahidi olmadıq. Oyun yetərincə maraqlı alındı. Hakimin çiynindəki “yük”də yüngül oldu. Referinin qərarları və mövqe seçimi doğru idi. Rəvan bəy cəmi iki dəfə əlini cibinə salmalı oldu.

Şamaxı – Sumqayıt , RƏŞAD ƏHMƏDOV
Şamaxıdakı oyunun ilk 20 dəqiqəsi yetərincə gərgin keçdi. Bu oyuna böyük maraq vardı. Ümumiyyətlə, referi matçı qənaətbəxş idarə etdi. Rəşad Əhmədovun başçılıq etdiyi hakimlər briqadasının nəticəyə təsir edən ciddi səhvi olmadı. Referi dördü meydan sahiblərinə, biri qonaqlara olmaqla 5 sarı vərəqə göstərdi ki, bunların hamısı haqlı idi.