Şənbə günü keçirilən “Neftçi” – “Sumqayıt” oyununa futbol ictimaiyyəti böyük maraq göstərdi. Ən azı ona görə ki, “Neftçi” təmir işlərindən sonra yenilənmiş arenada ilk rəsmi matçına çıxırdı.

Bu komandalar arasındakı oyunlarla bağlı ənənəvi prinsipiallığı da unutmayaq. Bir-birinin “qanına susayan” rəqiblər meydandan “sülh”lə ayrıldı. Oyundan sonra “Sumqayıt”ın müdafiəçisi Sərtan Taşkın "football-plus.az"a verdiyi müsahibədə bəzi maraqlı məqamlara toxundu.

- “Neftçi”dən aldığız 1 xal sizi razı saldı?
- Bizim üçün bu, çox vacib oyun idi. Hər birimiz vuruşduq, çoxlu təhlükəli vəziyyət yaratdıq. Amma biz qələbə istəyirdik. Bir az nəsə çatmadı, ona görə də evə heç-heçə ilə dönürük.

- “Neftçi” yenilənmiş stadionda ilk dəfə sizi qəbul etdi. Bu amil nə dərəcədə motivasiyanıza təsir etdi?
 - Bizə fərqi yoxidi ki, harda oynayırıq. Maraqlı o idi ki, nə üçün meydana çıxırıq. İstəyimiz 3 xal idi. "Neftçi Arena"da yox, "Mehdi Hüseynzadə"də də oynasaydıq, məqsəd eyni olacaqdı. Təəssüf ki, alınmadı.

- "Sumqayıt"ın enişinin səbəbi nədi?
 - Hər komandada belə vəziyyət olur. Biz komanda kimi bu vəziyyətdən çıxmalıyıq. İnanıram ki, tezliklə çıxarıq. 

- Bəzi oyunçuların fikrincə, komanda hələ də Konfrans Liqasındakı məğlubiyyətindən altından çıxa bilmir. Doğrudanmı belədi?
- Konfrans Liqası artıq ötən mövsümdə qaldı. Biz onu unutmalıyıq. Yeni mövsüm var. Maksimumu etməliyik. Əlimizdən gələni edəcəyik ki, növbəti mövsüm də Avropaya yollanaq. 

- Futbolçular arasında qruplaşmalar olmasıyla bağlı deyilənlər düzdü?
 - Yox, belə şey yoxdu. Biz komanda kimi çox güclüyük. Həm futbolda, həm də meydandan kənarda beləyik. 

- Samir Abasov ötən turdan sonra mətbuat konfransında bildirdi ki, "Rəhim Sadıxov komandaya kömək etmir. Oyunçulara bəzi yerlərdən təkliflər gəlib. Ona görə də başları qarışıb". Bu iddiaya münasibətin?
 - Rəhim Sadıxov və digər komanda yoldaşlarımızla aramız yaxşıdı. Həm insan kimi, həm də futbolçu kimi yaxşıdı. Komandada arzuolunmaz vəziyyət yoxdu.

- Samir Abasovun yaxın müddətdə istefa verəcəyinə dair xəbərlər artıb.
- Onu elə-belə deyirlər. İnternetdə hamı nəsə yazır. Biz komanda kimi maksimum çalışmalıyıq ki, Samir müəllim də bizimlə işləsin. 

- Bəs Samir Abbasov baş məşqçi kimi funksiyalarını lazımi səviyyədə yerinə yetirirmi?
 - Biz Samir müəllimlə avrokuboklara çıxdıq. Ona görə nə narazılıq edə bilərik?! Samir müəllim baş məşqçimizdi, inşallah, biryerdə davam edəcəyik.
 
- Axı futbolda nəticələr uğursuz olanda ya baş məşqçi, ya da komanda tənqid olunur. Səncə, kimdi günahkar?
- Burda günahkar axtarmaq lazım deyil. Rəhbərlikdən başlayaraq komanda, azarkeşlər daxil hamımız birlikdə bu durumdan çıxmalıyıq.

- Növbəti turda rəqibimiz "Qarabağ"dı. Azarkeşlərinizə nə demək istərdin?
 - Onlar həmişə bizimlə bir yerdə olub. Rəqibimizin gücünü bilirik. Amma evdə oynayırıq. Stadion dolu olsun, biz də maksimum çalışacağıq ki, uğurlu nəticə ilə hamını sevindirək.

RÖYANƏ OĞUZ