“Sumqayıt” Samir Abasovun rəhbərliyi altında 2023/24 mövsümündə yaxşı oyun sərgiləyir. “Kimyaçılar” 14 turdan sonra 22 xalla 3-cü pillədə qərarlaşıb. Düzdü, hələ bu haqda danışmaq tezdi. Amma kollektiv avrokuboklara vəsiqə verən yerlər uğrunda mübarizə aparır.

Bilirsiz ki, Sumqayıtda yerləşən Mehdi Hüseynzadə adına şəhər stadionu təmir olunaraq yenidən quruldu. Lakin arenada premyer-liqa oyunları keçirilmir. Çünki təmir zamanı bəzi səhvlərə yol verilib. Stadionun işıqlandırılmasında problem var. Klub çempionat oyunlarının yeni arenada keçirilməsi üçün PFL-ə müraciət edib. Lakin bütün problemlər həll olunmadığı üçün qurum “kimyaçılar”ın təklifini rədd edib. Bundan sonra klub oyunların günorta saatlarında keçirilməsi üçün PFL-ə müraciət edib. Yəni “Sumqayıt” – “Zirə” matçı “Mehdi Hüseynzadə”də keçirilə bilərmiş. Amma qonaqlar matçın saatının dəyişdirilməsinə razı olmayıb.

“Sumqayıt” premyer-liqanın 16-cı turunda “Qarabağ”ı qəbul edəcək. “Kimyaçılar” bu oyunun da “Mehdi Hüseynzadə”də keçirilməsi üçün PFL-ə müraciət edib. Lakin “Qarabağ” da oyunun saatının dəyişdirilməsinə razı olmayıb. Arenadakı problemi isə qış fasiləsinə kimi düzəltmək mümkün olmayacaq. Belə görünür ki, “Sumqayıt” yeni stadionda ilk oyunu yalnız gələn il keçirməli olacaq.

İLKİN SULTANLI