"Səbail" yenə uduzdu. Bayıl təmsilçisi ardıcıl dördüncü sınaqda meydanı məğlub tərk etdi. "Dənizçilər" turnir cədvəlinin 8-ci pilləsindədi. Onlar "Kəpəz"dən sonra ən çox qol buraxan komandadı. Kollektivi təkcə vurulan qol sayına görə uğurlu saya bilərik. Bu mənada yalnız "Qarabağ" və "Sabah"dan geri qalırlar.

Qeyd olunanlar "Səbail"in düzgün yolda olmadığının bariz sübutu olsa da, baş məşqçi Şahin Diniyev belə düşünmür. Mütəxəssisin hər matçdan sonra "düzgün yoldayıq" deməsi artıq adamı usandırır.

Yanlış yoldasız, cənab Diniyev! Bəli, dediyiniz kimi, uşaq deyilsiz. Amma futbol ictimaiyyətini uşaq yerinə qoymağa da haqqınız yoxdu! Adətən, düzgün yolda olan layihələrə və ya şəxslərə daha çox maliyyə ayrılır. Rəhbərliyin büdcəni azaltmasımı yanlış addım idi, yoxsa sizinlə müqavilə müddətini uzatmasımı? Onlar doğru edibsə, kimdi yanlış yolda olan? Hər şey düzgündüsə, nəticə hanı?

"Səbail" 2022/23 mövsümünü 9-cu, 2023/24 mövsümünü isə 7-ci pillədə başa vurdu. Yay fasilələrində xeyli yerli və ondan da çox legioner gətirildi-göndərildi. Amma irəliləyiş yoxdu. Komanda nəticə əldə edə bilmir. Şahin bəy, "neçə qol vurmalıyıq ki, qalib gələk?" sualının çox sadə cavabı var. Yəni vurulan qolları ön plana çıxarıb nəyisə "sığortalamaq" cəhdləri fayda verməz. Bu sualın cavabının əvəzinə "düzgün yoldayıq" cümləsinə məlum durğu işarəsini əlavə edib düşünmək və uyğun addımlar atmaq lazımdı.

Yoxsa siz də həmkarınız Samir Abasov kimi "Kəpəz"in aciz durumuna əsaslanıb premyer-liqada qalacağınıza arxayınsız?

KƏNAN BAHADIR