Coşqun Diniyev ötən il iyulun 5-də transfer olunduğu Türkiyə “Ümraniyəspor”undan ayrıldı. Xatırlayırsızsa, dekabrda “Football-plus.az”a danışan futbolçu klubdan maaşını ala bilmədiyini demişdi. Çox güman, ayrılığın səbəbi də məhz budu.

Bəs millimizin üzvü karyerasına harda davam edəcək? Bununla bağlı redaksiyamıza daxil olan məlumata görə, Coşqunun yeni klubu bəllidi.

28 yaşlı yarımmüdafiəçi “Səbail”lə anlaşıb. Belə ki, o, rəhbərliyin büdcəsini azaltdığı “dənizçilər”in premyer-liqadan düşməməsi üçün atasının, komandanın baş məşqçisi Şahin Diniyevin sərəncamında olacaq. Bayıl təmsilçisinin Coşqunla “1+1” illik müqavilə imzalayacağı gözlənilir.

Yeri gəlmişkən, qərarın gözlənilməz olduğunu demək olmaz. Çünki “Səbail”in büdcəsi azaldılandan bir qədər sonra bununla bağlı Şahin Diniyevlə övladı arasında müzakirə aparılıb. Oğlundan müsbət cavab alan mütəxəssis Coşqunun “Ümraniyəspor”dan ayrılıb “Səbail”ə gələcəyinə əmin olandan sonra Ağabala Ramazanovla müddəti başa çatan müqavilənin yenilənməməsini istəyib.

Onu da qeyd edək ki, Coşqun Diniyev artıq azad agent statusu alıb. Yəni “dənizçilər” futbolçunun transferi üçün xərcə düşməyəcək.

KƏNAN BAHADIR