Sentyabrın 25-də Avropa Liqasının (AL) 2024/25 mövsümünün əsas mərhələsinə start verildi. Bəri başdan ilk turun postsovet məkanından olan komandalar üçün uğursuz alındığını bildirək.

Məlum olduğu kimi, artıq avrokuboklarda qrup mərhələsi ləğv olunub və 8 qrupun əvəzinə vahid liqa mərhələsi tətbiq edilib. Komandaların sayı isə 32-dən 36-ya qədər artırılıb. AL-də bu qədər iştirakçı qrupda olduğu kimi 3 komanda ilə 6 oyun deyil, 8 fərqli rəqiblə 8 oyun keçirəcək. Oyunlardan 4-ü evdə, 4-ü səfərdə olacaq (eyni sistem Çempionlar Liqasında da tətbiq edilib, Konfrans Liqasında da 36 iştirakçı olacaq, amma orada komandalar əsas mərhələdə 3-ü evdə, 3-ü səfərdə olmaqla 6 oyun keçirəcəklər). Ümumi turnir cədvəlində 1-8-ci yerləri tutanlar 1/8 finala vəsiqə qazanacaqlar, 9-24-cü yerləri tutan komandalar bu mərhələyə çıxmaq üçün iki matçdan ibarət pley-offda gücünü sınayacaqlar. Əsas mərhələni 25-36-cı yerlərdə başa vuracaq iştirakçılar üçün isə avrokubok mövsümü sona çatacaq.

Təəssüf ki, vahid liqa mərhələsi yeganə təmsilçimiz üçün uğursuz başladı. “Qarabağ” Londonda “Tottenhem”dən 3 cavabsız top buraxdı. Postsovet məkanından olan digər komandalar da darmadağına məruz qaldılar: Kiyev “Dinamo”su məlum səbəbdən neytral meydanda – Almaniyanın Hamburq şəhərində keçirilən ev oyununda “Latsio”ya 0:3, RFŞ isə “Qarabağ”ın rəqiblərindən olacaq FKSB-yə 1:4 hesabı ilə uduzdu.

İlk turda “Mançester Yunayted”in evdə “Tvente”yə qalib gələ bilməməsi diqqəti cəlb edən nəticələr sırasında oldu. İngiltərə nəhəngini fasilə ərəfəsində gözəl zərbə ilə önə keçirən Eriksenin ikinci hissədəki səhvi niderlandlılara cavab qolunu vurmaq imkanı yaratdı. Nəticədə ortaya MY-nin adına yaraşmayan belə statistika çıxdı: “qırmızı şeytanlar” ardıcıl 4-cü avrokubok mövsümünə qələbəsiz başladılar – 3 məğlubiyyət, 1 heç-heçə. Komandanın Erik ten Haqın başçılığı altında qitə kuboklarında keçirdiyi son 9 oyundan yalnız birində qalib gəlməsi (3 heç-heçə, 5 məğlubiyyət) də diqqətdən yayınmayan faktdı.

“Midtüllann” – “Hoffenhaym” matçı da 1:1 hesabı ilə nəticələndi. Almaniyalıları Danimarkada məğlubiyyətdən son dəqiqədə Moerştedt xilas etdi. 18 yaşlı futbolçunun akrobatik tullanışla əsas komandada ilk qolunu vurduğunu qeyd edək. Maraq üçün onun “Bavariya”nın yetirməsi olduğunu da bildirək. Qitənin aparıcı 5 liqasının bir sıra təmsilçiləri arasındakı oyunlar - “Nitsa” - “Real Sosyedad” və “Roma” - “Atletik” matçları da 1:1 hesabıyla sona çatdı. 1-ci turun ən məhsuldar oyunu da “sülh”lə nəticələndi: Almaniyanın Frankfurt şəhərində baş tutan “Ayntraxt” – “Viktoriya” (Plzen) duelində 3:3 hesabı qeydə alındı.

Əsas mərhələnin açılış turunda diqqəti cəlb edən nəticələrdən biri də Norveçdə qeydə alındı. Yerli “Bude/Qlimt” turnirin favoritləri sırasında göstərilən “Portu”nu 3:2 hesabıyla məğlub etdi. Qələbədə dubl edib məhsuldar ötürmə ilə böyük rol oynayan 24 yaşlı hücumçu Hauqenin 2020/21 mövsümündə “Milan”ın formasını daşıdığını, sonra Frankfurt “Ayntraxt”ına keçdiyini xatırladaq. Ədalət naminə norveçlilərin 7 dəfə seyv edən rusiyalı qapıçısı Xaykinin əməyini də qeyd etməliyik.

İlk turun qəhrəmanları sırasında dubl edən Van Bommel (Alkmaar), Dia (Latsio), Olaru (FKSB), Qodts (Ayaks) və Bruma (Braqa) da var. Məlumunuz olsun ki, 20 yaşlı Ruben Van Bommel yaxın keçmişin məşhur oyunçularından olan Mark Van Bommelin oğludu.

əsas mərhələ, 1-ci tur
Mançester Yunayted (İngiltərə) - Tvente (Niderland) 1:1
Eriksen, 35 – Lammers, 68.
Mançester Yunayted: Onana, Mazraui, Maquayr, Martines, Dalot, Uqarte, Eriksen (Maynu, 78), Diallo (Qarnaço, 67), Fernandeş, Reşford (Höylunn, 79), Zirkzee (Maunt, 79).

Dinamo (Ukrayna) - Latsio (İtaliya) 0:3
Dia, 5; 35. Dele-Başiru, 34.
Latsio: Provedel, Luka Pelleqrini, Romanyoli, Patrik (Xila, 57), Maruşiç, Vesino, Rovella, Dele-Başiru (Noslin, 79), Pedro (Zakkanyi, 68), Çauna (İsaksen, 57), Dia (Kastelyanos, 68).

Midtüllann (Danimarka) - Hoffenhaym (Almaniya) 1:1
Osorio, 42 – Moerştedt, 90.
Hoffenhaym: Baumann, Nsoki (Dreksler, 73), Akpoquma, Qrilliç, Qlojek, Bruun Larsen (Prass, 61), Jandre (Kaderjabek, 67), Tohumcu, Bisxof, Bülter (Moerştedt, 53), Tabakoviç (Berişa, 61).

Nitsa (Fransa) - Real Sosyedad (İspaniya) 1:1
Rosario, 45 – Barreneçea, 18.
Nitsa: Bulka, Dante, Bombito, Ndayşime, Bar, Kloss, Luşe (Ndombele, 68), Rosario, Qessan, Mukoko (Orakpo, 74), Buanani (Diop, 68).
Real Sosyedad: Remiro, Munyos (Xavi Lopes, 60), Odriosola (Aramburu, 60), Paçeko, Martin, Subeldiya, Marin, Subimendi, Mendes (Suçiç, 69), Oyarsabal (Ouskarsson, 80), Barreneçea (Bekker, 60).

Roma (İtaliya) - Atletik (İspaniya) 1:1
Dovbik, 32 – A.Paredes, 85.
Roma: Svilar, Anxelinyo, Ndika, Ermoso, Mançini, Çelik (Əbdülhəmid, 71), Kristante, Kone (L.Paredes, 81), Baldantsi (Pisilli, 63), Dibala (Sule, 46), Dovbik (Şomurodov, 81).
Atletik: Aqirresabala, Yuri, Qorosabel (De Markos, 69), Vivian (Nunyes, 80), A.Paredes, Prados (A.Errera, 60), De Qalarreta, U.Qomes (Berenger, 60), İ.Uilyams, Quruseta, Calo (N.Uilyams, 60).

Ayntraxt (Frankfurt, Almaniya) - Viktoriya (Plzen, Çexiya) 3:3
Ekitike, 38. Dina Ebimbe, 62. R.Kristensen, 67 – Şults, 41. Adu, 86. Yemelka, 90+3.
Ayntraxt: Kaua Santos, R.Kristensen (Kollinz, 80), Tuta, Nkunku, Teate, Sxiri, Daud (Larsson, 71), Marmuş, Knauff (Dina Ebimbe, 60), Matanoviç (Şaibi, 60), Ekitike (Baoyya, 71).

Lion (Fransa) - Olimpiakos (Yunanıstan) 2:0
Şerki, 65. Benrahma, 71.
Lion: Lukas Perri, Talyafiko, Mata, Çaleta-Sar, Matiç (Tessmann, 68), Tolisso, Meytlend-Nayls, Şerki (Benrahma, 68), Lyakazett (Mikautadze, 75), Fofana (Zaha, 67), Nuama (Diavara, 81).

Tottenhem (İngiltərə) - QARABAĞ (AZƏRBAYCAN) 3:0
Conson, 12. Sarr, 52. Solanke, 68.
Bude/Qlimt (Norveç) - Portu (Portuqaliya) 3:2
Hög, 15. Hauqe, 40; 62 – Omorodion, 8. Gül, 90.
Alkmaar (Niderland) - Elfsborq (İsveç) 3:2
Van Bommel, 44; 50. Perrott, 74-p. – Ouma, 23. Hedlund, 53.
Qalatasaray (Türkiyə) - PAOK (Yunanıstan) 3:1
Baba, 48-öz qapısına. Akgün, 76. İkardi, 90+5 – Konstantelias, 67.

Anderlext (Belçika) - Ferentsvaroş (Macarıstan) 2:1
Versxaren, 60. Dolberq, 66-p. – A.Traore, 86.

Ludoqorets (Bolqarıstan) - Slaviya (Çexiya) 0:2
Yurasek, 37. Xitil, 65.

Fənərbaxça (Türkiyə) - Yunion (Belçika) 2:1
Söyüncü, 26. Bercess, 82-öz qapısına – Sayks, 90+3.

Malmo (İsveç) - Reyncers (Şotlandiya) 0:2
Bayrami, 1. Makkozlend, 76.

Ayaks (Niderland) - Beşiktaş (Türkiyə) 4:0
Fitz-Cim, 31. Qodts, 51; 73. Teylor, 55.

Braqa (Portuqaliya) - Makkabi (Təl-Əviv, İsrail) 2:1
Bruma, 88; 90+5 – Davida, 30-p.

FKSB (Rumıniya) - RFŞ (Latviya) 4:1
Bırlica, 8. Ştefanesku, 32. Olaru, 58; 69 – Lipuşçek, 23.

Bombardirlər: Dia (Latsio), Olaru (FKSB), Qodts (Ayaks), Hauqe (Bude/Qlimt), Bruma (Braqa), Van Bommel (Alkmaar) - 2.

Növbəti turun oyunları oktyabrın 3-də keçiriləcək: QARABAĞ – Malmö, RFŞ – Qalatasaray, Ferentsvaroş – Tottenhem, Makkabi T-Ə – Midtüllann, Olimpiakos – Braqa, Real Sosyedad – Anderlext, Latsio – Nitsa, Slaviya – Ayaks, Hoffenhaym – Dinamo, Atletik – Alkmaar, Beşiktaş – Ayntraxt F, Portu - Mançester Yunayted, Tvente – Fənərbaxça, Viktoriya P – Ludoqorets, Elfsborq – Roma, PAOK – FKSB, Yunion – Bude/Qlimt, Reyncers – Lion.