Bilindiyi kimi, avrokuboklar 2024/25 mövsümündən yeni format əsasında keçiriləcək.

Maraqlıdı ki, UEFA püşkatmanın formatını da dəyişməyi zəruri sayıb.

Bu barədə “Sky Sport” məlumat yayıb. Yeni mövsümdən Çempionlar Liqasının əsas mərhələsində iştirak edəcək komandaların sayı 32-dən 36-ya qədər artırılacaq. Ənənəvi qrup formatını vahid liqa əvəzləyəcək. “İsveçrə sistemi” də adlandırılan mübarizə ümumi liqa üsulu ilə aparılacaq. 36 komandanın iştirak edəcəyi turnirdə hər komanda indiki formatda olduğu kimi qrupda 3 fərqli ölkənin klubları ilə ümumilikdə 6 deyil, 8 fərqli komanda ilə 8 matçda qarşılaşacaq. İştirakçılar qrupdakı oyunlarından 4-nü evdə, 4-nü isə səfərdə keçirəcəklər.

“Sky Sport”un məlumatına görə, püşkatma zamanı 36 komanda 4 səbətə salınacaq. Onların hər birinin rəqibi hər səbətdən çıxacaq 2 komanda olacaq. Yeni formatda püşkatma prosesinin uzun vaxt apara biləcəyini düşünən UEFA müəyyən dəyişiliklərə getməyi vacib sayıb. Əl ilə püşkatmanın təxminən 3-4 saat çəkə biləcəyi ehtimal edilib, bunun üçün həm də 900 şarın tələb olunacağı da dəqiqləşib. Müddəti çox uzun hesab edən UEFA yeni format üçün tarixdə ilk dəfə hibrid püşkatma üsulundan istifadə etməyi məqsədəuyğun sayıb. Püşkatmanın əvvəlində klublar əl ilə çəkiləcək, sonra isə kompüter nəzarəti ələ alacaq və hər komandanın bir qrupda oynayacağı 8 rəqibini seçəcək. Yeni püşk formatının indi olduğu kimi təxminən 35 dəqiqə çəkəcəyi gözlənilir. Kompüter proqram təminatı, belə desək, ölkənin müdafiəsini də nəzərə alacaq və klublar yalnız qeyri-adi hallar istisna olmaqla öz ölkələrinin təmsilçilərinə qarşı oynamayacaqlar. Bundan başqa, klubların eyni ölkədən maksimum iki rəqiblə qarşılaşacağı da bildirilib.

Məlumatda Böyük Britaniyanın IT şirkətinin püşkatmanın rəqəmsal hissəsini idarə edəcək proqram təminatı hazırlayacağı qeyd edilib. Yeni proqramın iki ehtiyat proqram təminatı sistemi də olacaq. Püşkatmanın yeni sistemini “Ernst & Young” audit və konsaltinq şirkətinin yoxlayacağı da bildirilib.

Qeyd etdiyimiz kimi, 2024/25 mövsümündən Avropa Liqası və Konfrans Liqasında da mübarizə əvvəlcə vahid liqalarda gedəcək. Yeni püşkatma formatının bu liqalarda da tətbiqi gözlənilir.