Avqustun 29-da qitənin futbol ictimaiyyətinin diqqəti Avropa Liqası (AL) və Konfrans Liqasının (KL) pley-off mərhələsinin həlledici oyunları ilə yanaşı Monakodakı tədbirə də yönəlmişdi.

Monte Karlodadakı Qrimaldi Forum zalında keçirilən mərasimdə Çempionlar Liqasının (ÇL) 2024/25 mövsümünün liqa mərhələsinin püşkü atılıb.

Reqlament və təqvim
Məlum olduğu kimi, ÇL-də artıq qrup mərhələsi ləğv olunub və 8 qrupun əvəzinə vahid liqa mərhələsi tətbiq edilib. Komandaların sayı isə 32-dən 36-ya qədər artırılıb. Bu qədər iştirakçı qrupda olduğu kimi 3 komanda ilə 6 oyun deyil, 8 fərqli rəqiblə 8 oyun keçirəcək. Oyunlardan 4-ü evdə, 4-ü səfərdə olacaq (eyni sistem AL-də də tətbiq edilib, KL-in liqa mərhələsində də 36 iştirakçı olacaq, amma bu turnirdə komandalar ümumi mərhələdə 3-ü evdə, 3-ü səfərdə olmaqla 6 oyun keçirəcəklər). Ümumi turnir cədvəlində 1-8-ci yerləri tutanlar 1/8 finala vəsiqə qazanacaqlar, 9-24-cü yerləri tutanlar bu mərhələyə çıxmaq üçün iki matçdan ibarət pley-offda gücünü sınayacaqlar. 24-36-cı yerləri tutanlar isə avrokuboklarda mübarizəni başa vuracaqlar.

Bu mövsüm İtaliya və Almaniya ən çox - hərəyə 5 komanda ilə təmsil olunur. ÇL-in Liqa mərhələsinin 36 iştirakçısı püşkatmadan əvvəl reytinqinə əsasən 4 səbətə bölünmüşdü. Yeni format üçün tarixdə ilk dəfə hibrid püşkatma üsulundan istifadə edilib. Püşkdə klublar əl ilə çəkilib, daha sonra kompüter nəzarəti ələ alaraq komandaların 8 rəqibini seçib. Qeyd edək ki, müəyyən şərtlərin reallaşması (bir ölkənin klublarının bir-birinə rəqib olmaması, bir klubun hər hansı ölkənin yalnız iki təmsilçisi ilə oynaması, ev və səfər oyunlarının bərabər sayda olması) üçün püşkatmanın çox vaxt aparmamasına görə belə üsuldan istifadəyə qərar verilib. Püşkü əfsanəvi futbolçular Canluici Buffon və Kriştiano Ronaldo çəkiblər. Maraqlı duellərdən ilk növbədə “Real”ın Dortmund “Borussiya”sı ilə qarşılaşacağını qeyd edək. Bu komandaların iyunun 1-də Londonda keçirilən finaldakı mübarizəsi maridlilərin 2:0 hesablı qələbəsi ilə nəticələnib. Dortmundlular kimi, “İnter” də “Mançester Siti”dən qisas ala bilər. Xatırladaq ki, İngiltərə klubu ÇL-in 2022/23 mövsümünün finalında milanlılara 1:0 hesabı ilə qalib gəlib. Əlbəttə, “Bavariya”nın “Barselona” ilə oyunu da maraqla gözləniləcək. Almaniya nəhənginin sabiq çalışdırıcısı, münhenliləri 2020-ci ildə ən nüfuzlu klub turnirində qələbəyə daşıyan Hans-Diter Flik hazırda kataloniyalılara başçılıq edir. “Real”ın “Liverpul”a qarşı növbəti dueli də ən çox maraq doğuran matçlar sırasındadı.

ÇL-də liqa mərhələsi sentyabrın 17-də başlanacaq və 2025-ci il yanvarın 29-da yekunlaşacaq. Turnirin finalı gələn il mayın 31-də Almaniyanın Münhen şəhərindəki “Alyans Arena” stadionunda təşkil ediləcək. Liqa mərhələsinin oyunların dəqiq təqvimi avqustun 31-də açıqlanacaq. Yeri gəlmişkən, avrokubokların liqa mərhələsinin təqvimini növbəti saylarımızdan birində nəzərinizə çatdıracağıq.

Laureatlar
Monakodakı mərasimdə iki futbol əfsanəsi diqqət mərkəzində olub. İtaliya yığmasının sabiq qapıçısı Buffon UEFA pezidentinin mükafatına layiq görülüb. 46 yaşlı dünya çempionu üstün nailiyyətləri, bacarığı və nümunəvi şəxsi keyfiyyətlərinə görə mükafatlandırılıb. Qeyd edək ki, mükafat 1998-ci ildə təsis edilib. Buffonun iyulda İtaliya yığmasının idman direktoru təyin edildiyini də xatırladaq.

Qrimaldi Forumun səhnəsinə çıxan Ronaldo da mükafatsız qalmayıb. UEFA-nın prezidenti Aleksander Çeferin “Əl-Nəssr”in portuqaliyalı hücumçusunu ÇL-in ən yaxşı bombardiri kimi xüsusi mükafatla təltif edib. Kriştianonun bu turnirdə 183 oyuna 140 qol vurduğunu xatırladaq.