Yanvarın 12-də Qətərdə start götürən 18-ci Asiya Kubokunun (AK) qrup mərhələsinə cümə axşamı yekun vuruldu. Bununla da turnirin bütün 1/8 finalçıları müəyyənləşdi.

"Football-plus.az" xəbər verir ki, bu mərhələdə 24 komanda iştirak etdi. Sıralarında postsovet məkanından 3 yığmanın - Özbəkistan, Tacikistan və Qırğızıstanın da olduğu iştirakçılar hərəsində 4 komanda olmaqla 6 qrupda yarışdılar. Reqamentə əsasən qruplarda ilk iki yeri tutan 12 və qrup üçüncüləri arasında ən yaxşı göstəricilərə malik olan 4 yığma 1/8 finala vəsiqə qazandı. 14 gün ərzində keçirilən qrup mərhələsində imkanları az-çox yüksək dəyərləndirilən əksər komandalar pley-offa adladılar. Amma bir sıra sürprizlər də qeydə alındı. Məsələn, Çin yığması A qrupunda 3 oyuna 2 xal toplamaqla 3-cü yeri tutaraq mübarizəni erkən dayandırdı. D qrupunun aşkar favoriti sayılan Yaponiya yığmasının sonda maksimum nəticə göstərən İraqdan, E qrupunda isə Koreyanın Bəhreyndən geri qalaraq 2-ci yeri tutması bir qədər gözlənilməz oldu.

Postsovet məkanından olan komandalardan Özbəkistanın pley-offa vəsiqə qazanması gözlənilirdisə, Çindən çox xal yığan Tacikistan tarixində ilk dəfə qrup səddini dəf etdi. Qırğızıstanın buna nail olmaq şansı minimuma bərabər dəyərləndirilirdi ki, belə də oldu.

AK-nın pley-offuna yanvarın 28-də start veriləcək. Bu mərhələdə Səudiyyə Ərəbistanı – Koreya matçı daha çox maraq doğurur.

Qrup mərhələsi, 3-cü tur
E qrupu
İordaniya – Bəhreyn 0:1
Yusuf, 34.
Koreya - Malayziya 3:3
Çon U Yon, 21. Hazmi, 83-öz qapısına. Son Hın Min, 90+4-p. – Halim, 51. Ayman, 61-p. Morales, 90+15.

1. *Bəhreyn 3 2 0 1 3-3 6
2. *Koreya 3 1 2 0 8-6 5
3. *İordaniya 3 1 1 1 6-3 4
4. Malayziya 3 0 1 2 3-8 1

F qrupu
Səudiyyə Ərəbistanı - Tayland 0:0
Qırğızıstan - Oman 1:1
Koco, 80 - Əl-Qassani, 8.

1. *Səudiyyə Ərəbistanı 3 2 1 0 4-1 7
2. *Tayland 3 1 2 0 2-0 5
3. Oman 3 0 2 1 2-3 2
4. Qırğızıstan 3 0 1 2 1-5 1
Bombardirlər: Hüsseyn (İraq) – 5, Afif (Qətər), Ueda (Yaponiya) – 3.
Yanvarın 28-31-i aralığında keçiriləcək 1/8 finalda cütlər belə formalaşıb: Avstraliya – İndoneziya, Tacikistan – BƏƏ, İraq – İordaniya, Qətər – Fələstin, Özbəkistan – Tayland, Səudiyyə Ərəbistanı – Koreya, Bəhreyn – Yaponiya, İran – Suriya.