''Qalatasaray'' Avropa Liqasının yenilənmiş qrup mərhələsində ilk oyununa çıxdı.

İstanbul nəhəngi doğma fanatları önündə PAOK-u qəbul etdi. Oyundan öncə Yunanıstan çempionu İstanbula gələrkən ''Konstantinopolisə gedən yol'' paylaşımını etməklə rəqibini qıcıqlandırmağa çalışmışdı. Eləcə də PAOK fanatları Türkiyəyə 40 avtobusla gəlmişdilər. Amma ''Qalatasaray'' 3:1 hesablı qələbə ilə yunanlara yerini göstərdi!

Maraqlıdı ki, Viktor Osimhen 3-cü rəsmi oyununda da qol hesabını aça bilmədi. Amma o, çox faydalı və istəkli oyunu ilə böyük alqış qazandı. İkinci hissənin əvvəllərində onun baş zərbəsindən sonra Abdul Rəhman Baba avtoqol müəllifi oldu. İkinci yarını ortalarında fəallaşan qonaqlar Konstantelias ilə bərabərlik qolunu vursalar da, bundan artığına komandanın gücü çatmadı. Təzyiqi artıran Türkiyə çempionu özünə lazım olan qolları vura bildi. Osimhenin ötürməsindən sonra Yunus Akgün qələbə qolunu vurdusa, yekun nəticəni sonradan meydana çıxan fanatların sevimlisi Mauro İkardi müəyyənləşdirdi.

Osimhen karyerasında ilk dəfə ardıcıl 3 rəsmi oyunda məhsuldar ötürmə vermiş oldu. Qrupa parlaq qələbə ilə başlayan və avrokuboklarda 3 oyunluq məğlubiyyət seriyasına son qoyan ''Cim-Bom''un Yunanıstan klublarına qarşı uğurlu seriyası davam edir. Belə ki, ''sarı-qırmızılar'' indiyə qədər Yunanıstan təmsilçilərinə qarşı keçirdikləri 4 ev oyununun hamısından qələbə ilə ayrılıblar!

ƏLİ