Türkiyə çempionatında mövsümə ardıcıl 6 qələbə ilə başlayan və son turda səfərdə əzəli rəqib ''Fənərbaxça'' üzərində parlaq zəfər əldə edən ''Qalatasaray''ın Avropa Liqasının yenilənmiş qrup mərhələsindəki macərası bu gün start götürəcək.

İstanbul nəhəngi öz meydanında Yunanıstan çempionu PAOK-u qəbul edəcək. İspaniyalı Alexandro Ernandesin idarə edəcəyi oyun Bakı vaxtı ilə saat 23.00-da başlayacaq. PAOK-u tanınmış rumıniyalı mütəxəssis Mirça Luçeskunun oğlu Razvan çalışdırır. ''Qalatasaray''ın heyətdə 3 itkisi var. Fernando Muslera cəza, Hakim Ziyeş zədə üzündən oyunu buraxacaq. Yeni transfer macarıstanlı Roland Şallai isə adı avrokubokların iştirak ərizəsində olmadığı üçün komandaya yardım edə bilməyəcək. Əvəzində Okan Buruk artıq cəzasını başa vurub və ''Yanq Boyz''la oyunlardan fərqli olaraq bu dəfə komandanın başında yer alacaq. Musleranın əvəzinə qapıda Günay Güvənc qərarlaşacaq.

Burukun bu oyunda rotasiyaya əl atacağı gözlənilir. Derbidə şans qazanmayan Mişi Batşuayi Viktor Osimhenin əvəzinə hücumda qərarlaşacaq. Artıq zədəsini sağaldan Mauro İkardinin isə ikinci hissədə meydana çıxacağı gözlənilir. Bundan başqa müdafiənin solunda Yakobsun yerinə Berkan Kutlu, sağında isə Kaan Ayhanın yerinə Yelert oynayacaq. Hər halda bu, Türkiyə mətbuatının irəli sürdüyü versiyadı.

ƏLİ