“Qalatasaray” gücünü Mourinyolu “Fənər”ə də göstərdi! - İCMAL
Tur cümə günü “Hatayspor”un evdə “Bodrum”a uduzmasıyla start götürdü. Hatay təmsilçisi təcrübəli Rza Çalımbayın rəhbərliyi altında ikinci oyunda da qola və qələbəyə həsrət qaldı. Tarixində ilk dəfə elitada oynayan “Bodrum” isə mövsümdə 2-ci qələbəsini qazandı.
Ümumiyyətlə, bu tur həm qeyri-məhsuldar, həm də meydan sahibləri üçün uğursuz alındı. “Konyaspor”la “Sivasspor”un duelində azarkeşlər qol görmədi. Şənbə gününün və turun əsas oyunu Kadıköydə keçirildi. Mourinyonun son dönəmdəki atmacaları, eləcə də “Qalatasaray”ın tura lider kimi daxil olması budəfəki derbinin prinsipiallığını bir qədər də artırmışdı. Oyuna “Fənər” daha fəal başladı və hətta Şimanski 10-cu dəqiqəqədə hesabı açmağa yaxın oldu. Amma bu fəallıq çox tez bitdi. Topa nəzarəti ələ keçirən “Cim-Bom” təhülkəli hücumlar qurmağa başladı. Saranın zərbəsi zamanı Livakoviç əla oynadı. Amma növbəti epizodda xorvatiyalı qapıçı özü də istəmədən anti-qəhrəmana çevrildi. Autla başlayan hücumun davamında top Torreyranın önünə düşdü. Təcrübəli futbolçunun qüvvətli zərbəsindən sonra dirəkdən dönən top Livakoviçə dəyərək tora daxil oldu. “Fənər” bu qola dərhal cavab verməyə çox yaxın oldu. Amma Tadiçin ötürməsindən sonra faktiki Muslera ilə təkbətək çıxan Oostervolde uruqvaylı qapıçını məyus edə bilmədi. “Vurmayana vurarlar” prinsipinin işə düşməsini çox gözləmək lazım gəlmədi. İlk qoldan 8 dəqiqə sonra gözəl qurulan hücum zamanı Osimhen sinəsi ilə topa toxunaraq Mertensi zərbə mövqeyinə çıxardı. Belçikalı çətin vəziyyətdə olmasına baxmayaraq, aşırma zərbə ilə fərqi artırdı. 5 dəqiqə sonra Mertens yerli fanatları yenidən şoka salmağa yaxın oldu. Amma onun budəfəki aşırma zərbəsi azacıq dəqiq alınmadı. İlk yarıda “Fənər”in bəzi sürətli hücumları yaddaqalan alınsa da, “Qalatasaray”lılar sarı vərəqə bahasına da olsa, onların qarşısını kəsə bildi. İkinci hissənin əvvəllərində hesab meydan sahibləri üçün biabırçı həddə çatdı. Maraqlıdı ki, bu hücum da autla başladı. Torreyra ilə “divar ötürməsi”ndən sonra Sara topu uzaq küncə göndərdi. Bir neçə dəqiqə sonra Əbdülkərimin Fredə qarşı kobudluğu penalti ilə nəticələndi və Ceko zərbəni dəqiq yerinə yetirdi. Mourinyo əvvəlcə İrfan Canı, sonra da Ən-Nəsirini meydana buraxdı. Amma qatar artıq getmişdi. Mərakeşli forvardın əlinə intriqanı bərpa etmək üçün bir-iki gözəl fürsət düşsə də, o, bunlardan yararlana bilmədi. Muslera bu mövsüm ən çox (8) qurtarış etdiyi oyununu keçirdi. Beləliklə, Okan Buruk Mourinyonun atmacalarına ən layiqli cavabı meydanda verdi və “Qalatasaray”ın başında “Fənər”ə qarşı keçirdiyi 3-cü səfər oyununda da uduzmadı (2 qələbə, 1 heç-heçə)! Klub tarixində daha öncə bunu yalnız 1985-86-cı illərdə Yupp Dervall bacarmışdı. Ümumiyyətlə, Buruk 2017/18-dən bəri “Fənər”i ən çox (6 dəfə) məğlub edən məşqçi statusundadı. İsmayıl Kartalın dönəmində “Fənər” ilk 6 turu 18 xalla bitirdiyi halda, bu dəfə komandanın cəmi 13 xalı var. Ən əsası “sarı-lacivərdlilər”in superliqda 32 oyunluq məğlubiyyətsiz seriyası qırıldı (25 qələbə, 7 heç-heçə). Komanda sonuncu məğlubiyyətini ötən mövsümün 11-ci turunda “Trabzonspor”la ev oyununda (2:3) yaşamışdı.
Bazar gününün qarşılaşmalarına gəlincə, evdə “Samsunspor”a uduzan “Çaykur Rizəspor” ardıcıl 4-cü turda xala həsrət qaldı. “Kasımpaşa” ilə qolsuz bərabərlik sayəsində “Antalyaspor” Aleksin rəhbərliyi altında ilk dəfə səfərdə xal qazanmış oldu. Evdə “Alanyaspor”a uduzan və 6-cı turda 5-ci məğlubiyyətlə üzləşən “Adana Dəmirspor”da isə Maykl Valkanis dönəmi erkən bitdi. Avstraliyalı mütəxəssis komandanın başına bu yay gətirilmişdi. Turun daha bir maraqlı oyunu “Tüpraş Stadionu”nda keçirildi. Arda Turanın çalışdırdığı və tura məğlubiyyətsiz daxil olan “Eyüpspor” “Beşiktaş”ın qonağı oldu. “Eyüpspor” inamlı təsir bağışlayaraq ilk turlardakı nəticələrinin təsadüf olmadığını göstərdi. Raşitsanın mövsümdəki ilk qolu ilə hesabda önə keçən İstanbul nəhəngi üstünlüyünü artırmaqda çətinlik çəkdi. İkinci hissədə fəallaşan debütant penalti qazandı. 64-cü dəqiqədə Mərt Günokun Tiama qarşı kobudluğuna görə VAR-ın müdaxiləsi ilə təyin olunan penaltini Əmrə Akbaba dəqiq yerinə yetirdi. Xal itirmək istəməyən və təzyiqi artıraraq bütün komanda ilə irəli atılan “Qartal” fanatlarını son anlarda sevindirdi. Bu qol da penaltidən vuruldu. Maraqlıdı ki, penaltiyə səbəbkar olan Tayfur Bingöl müqavilə ilə məhz “Beşiktaş”a məxsusdu! Onun Semihə qarşı kobduluğundan sonra yenə VAR işə qarışdı və İmmobile fürsəti boşa vermədi. Arda Turan superliqa çərçivəsində həm futbolçu, həm də məşqçi kimi “Beşiktaş”a qarşı keçirdiyi 9-cu səfər oyununda da qələbəyə həsrət qaldı (2 heç-heçə, 7 məğlubiyyət). Van Bronkhorst “ağ-qaralar”ın başında superliqada 3-cü ev oyunundan da qələbə ilə ayrıldı. Klubun əcnəbi məşqçiləri arasında sonuncu dəfə bunu 2000-ci ildə Nevio Skala bacarmışdı.
6-cı tur
Fənərbaxça – Qalatasaray 1:3
Ceko, 63-p. – Livakoviç, 20-öz qapısına. Mertens, 28. Sara, 59.
Fənərbaxça: Livakoviç, Mərt Müldür, Ciku (Ən-Nəsiri, 67), Çağlar Söyüncü, Oostervolde, İsmayıl Yüksək (Amrabat, 46), Fred (Mərt Hakan Yandaş, 80), Tadiç (İrfan Can Kahveci, 61), Şimanski, Sen-Maksimen (Cengiz Ündər, 80), Ceko.
Qalatasaray: Muslera, Kaan Ayhan (Nelsson, 86), Əbdülkərim Bardakcı, Sançes, Yakobs, Torreyra (Berkan Kutlu, 84), Sara (Kərəm Dəmirbay, 84), Barış Alpər Yılmaz (Yelert, 83), Mertens (Şallai, 75), Yunus Akgün, Osimhen.
Beşiktaş – Eyüpspor 2:1
Raşitsa, 20. İmmobile, 90+3-p. – Əmrə Akbaba, 64-p.
Beşiktaş: Mərt Günok, Svensson, Paulista, Uduoxay, Masuaku, Fernandeş, Əl-Musrati (Semih Kılıçsoy, 66), Raşitsa (Onur Bulut, 90+10), Rafa Silva (Əmirhan Topçu, 90+4), Mario, İmmobile (Onana, 90+5).
Qaziantep – Trabzonspor 0:0
Çaykur Rizəspor – Samsunspor 0:1
Ntçam, 46.
Adana Dəmirspor – Alanyaspor 0:2
Hvan Ui Çjo, 4; 17.
Hatayspor – Bodrum 0:1
Seferi, 27.
Konyaspor – Sivasspor 0:0
Kasımpaşa – Antalyaspor 0:0
Göztəpə - Kayserispor 3:0
Taha Altıkardeş, 13. Juan, 45+3. Doğan Ərdoğan, 90+4.
1. Qalatasaray 6 6 0 0 20-5 18
2. Fənərbaxça 6 4 1 1 14-5 13
3. Beşiktaş 5 4 1 0 11-4 13
4. Samsunspor 6 4 0 2 7-3 12
5. İstanbul BŞ 5 3 1 1 11-7 10
6. Göztəpə 5 2 3 0 8-3 9
7. Eyüpspor 6 2 3 1 9-6 9
7. Konyaspor 6 2 2 2 6-7 8
8. Sivasspor 6 2 2 2 5-6 8
9. Antalyaspor 6 2 2 2 9-12 8
11. Kasımpaşa 6 1 3 2 6-8 6
12. Alanyaspor 6 1 3 2 6-9 6
13. Bodrum 6 2 0 4 5-9 6
14. Trabzonspor 5 0 5 0 3-3 5
15. Qaziantep 5 1 1 3 4-7 4
15. Çaykur Rizəspor 6 1 1 4 3-14 4
16. Kayserispor 5 0 3 2 5-9 3
18. Hatayspor 6 0 2 4 4-10 2
19. Adana Dəmirspor 6 0 1 5 5-14 1
Bombardirlər: Ceko (Fənərbaxça) – 5, Barış Alpər Yılmaz (Qalatasaray), İmmobile (Beşiktaş), Pyontek (İstanbul BŞ), Samudio (Antalyaspor) – 4.
Növbəti turun oyunları sentyabrın 27-30-u aralığında keçiriləcək: Alanyaspor – Çaykur Rizəspor, Antalyaspor - Fənərbaxça, Bodrum – Adana Dəmirspor, Eyüpspor – Qaziantep, Qalatasaray – Kasımpaşa, Kayserispor – Beşiktaş, Samsunspor - Göztəpə, Sivasspor – İstanbul BŞ, Trabzonspor – Konyaspor.
Turun rəqəmi
6 - “Qalatasaray”ın başına keçdiyi gündən bəri saysız-hesabsız rekordları yeniləyən Okan Buruk yenə önəmli göstəriciyə nail oldu. İlk iki mövsümdəki çempionluqlara baxmayaraq, “Cim-Bom” ilk turlarda mütləq büdrəyirdi. Bu dəfə isə vəziyyət fərqlidi. İstanbul nəhəngi 6-cı turu da qələbə ilə başa vurmaqla şəxsi rekordunu təkrarladı. Komanda daha öncə yalnız bir dəfə - 2009/10-da ilk 6 turu xal itirmədən tamamlamışdı. O vaxt Frank Raykaardın baş məşqçi olduğunu nəzərə alsaq, Okan Buruk klub tarixində bunu bacaran ilk yerli mütəxəssisdi. Maraqlıdı ki, 15 il öncə belə başgicəlləndirici starta baxmayaraq komanda mövsümü yalnız 3-cü yerdə başa vurmuşdu. “Qalatasaray” gələn tur da xal itirməsə, Okan Buruk daha bir yeni rekordun sahibi kimi tarixə düşəcək.
Turun ulduzu
Lukas Torreyra (Qalatasaray) – bu qədər az qolun vurulduğu və heç kimin önə çıxmadığı turda üstünlüyü uruqvaylı ulduza veririk. Hər halda, Torreyra mövsümün ən vacib oyunlarından birində iki qolun vurulmasında yaxından iştirak etdi. Düzdü, ilk qolun statistikasında onun adı qeyd olunmayacaq. Amma məhz Torreyranın əla zərbəsi sonda Livakoviçin avtoqolu ilə nəticələndi. 3-cü qolda isə o, hesabına məhsuldar ötürmə yazdı.
Turun sitatı
Volkan Dəmirəl, məşqçi, “Fənərbaxça”nın sabiq qapıçısı:
“Fərq daha böyük ola bilərdi. Oyunun gedişindən nəticəni müəyyənləşdirmək mümkün idi. “Fənər” fasilədə bir dəyişiklik etdi. Amma ən azı 2-3 dəyişiklik etməliydi. Autdan sonra 2 top buraxdılar. Anadolu klubu belə qollar buraxsa, başa düşmək olar. Amma “Fənərbaxça” belə qollar buraxmamalıdı. Hakimi günahlandırmamış özün meydanda nəsə bir şey sərgiləməlisən. Bu oyunda hakimlik heç nə olmadı. Komandada keçmişdəki ruh qalmayıb. Məni ən çox üzən odu ki, “Qalatasaray”a məğlubiyyət artıq sıradan bir şey kimi qəbul olunur. Mən “Fənər”li oyunçulardan kiminsə üzüldüyünü görmədim! Üzülən yalnız azarkeşlər oldu. Hətta stadionu erkən tərk etmək istədim. Amma qızım sona qədər oyuna baxmaq istədiyi üçün mən də bir söz deyə bilmədim”.
Oyundan sonra
Joze Mourinyo, “Fənərbaxça”nın baş məşqçisi:
“Oyuna sürətli hücumlarla başladıq və ilk dəqiqələrdə yaxşı təsir bağışladıq. Amma bu nəticədən sonra bunun heç bir önəmi yoxdu. Biz yalnız penaltidən qol vura bildik. Onlar daha çox qol vurduqları üçün qalib gəldilər. İkinci hissədə əvəzetmələrlə oyunun axarını dəyişməyə çalışdıq. Sonradan meydana çıxanların günahlandırılmasını istəmirəm. İrfan Can da, Ən-Nəsiri də əlindən gələni etdi. Ən-Nəsiri əlinə düşən fürsəti dəyərləndirə bilmədi. “Qalatasaray” bizdən yaxşı oynamadı. Sadəcə, bizdən fərqli əllərinə düşən fürsətləri qola çevirdilər. Autla başlayan hücumdan sonra bizə iki qol vurdular. Amma bu, onların yox, bizim günahımızdı”.
Okan Buruk, “Qalatasaray”ın baş məşqçisi:
“Çox sevincliyik. Camiəmiz üçün çox önəmli bir zəfərdi. Bura gələn fanatlarımıza təşəkkür edirik. Gözəl bir qarşılaşma izlədik. “Fənərbaxça”ya qarşı son iki oyunumuz baxımlı alınmamışdı. Bu dəfə hər iki komandanın çoxlu qol fürsəti oldu. Fasiləyə 2 top öndə yollandığımız üçün rahat bir qarşılaşma oldu. Hakim oyunu təmiz idarə etdi. Sarı vərəqələr yerində və haqlı şəkildə göstərildi. Nəticələrimiz və oyunumuz yüksələn qrafiklə inkişaf edir. İndidən xal fərqi haqda danışmaq yersizdi. Hələ bütün mübarizə irəlidədi. Rəqibi yaxşı incələmişdik və top bizdə olarkən nələr etməli olduğumuzu bilirdik. Seçdiyimiz plan özünü doğrultdu. 3:1-dən sonra onların da önəmli fürsətləri oldu. Üzərimizdə təzyiq qurdular. Yorğunluq da özünü büruzə verincə geri çəkilməli olduq. Hər iki komanda əlindən gələni etdi. Son həftələrdə Mourinyonun bəzi açıqlamaları olmuşdu. Hər halda, son iki ildə çempion olmuş əsas rəqibinə qarşı bu cür açıqlamalar verməsi normaldı. Bu da bir strategiyadı. Onu günahlandırmaq istəmirəm. Hadisələrin ona necə çatdırılmasından da çox şey asılıdı. Bizim üçün əsas qələbə qazanmaqdı. Rəqibin baş məşqçisinin kimliyi o qədər də önəmli deyil”.
Covanni van Bronkhorst, “Beşiktaş”ın baş məşqçisi:
“Maraqlı oyun alındı. Oyuna yaxşı başladıq və hesabı açdıq. İkinci qolu vurmaq üçün iki gözəl fürsətimiz oldu. Amma Mario və İmmobile ilə bu şansları dəyərləndirə bilməyincə, ikinci hissədə oyun 1:1-ə gəldi. Sevindirici haldı ki, qələbəyə olan inamımızı sona qədər itirmədik. Əlimizdən gələni etdik və heç bir şübhə doğurmayan penalti sayəsində qələbə qazandıq. Rəqib bu tura qədər uduzmamışdı. Bu da onların səviyyəsindən xəbər verir. Yeganə səhvimiz ikinci qolu vaxtında vurmamağımız oldu. Əsas odu ki, sonda 3 xal bizim oldu. Qol fürsətlərini daha yaxşı dəyərləndirmək üçün üzərimizdə çalışmalıyıq. Derbini təbii ki, izlədim. Hər ölkədə derbi özəl matçlardı. Vaxtı gələdə komandamı həm “Qalatasaray”a, həm də “Fənərbaxça”ya qarşı lazımi şəkildə hazırlayacam. Hələlik isə bütün diqqətimizi “Ayaks”la oyuna yönəldəcəyik. “Ayaks” öz meydanında güclü oynayan komandadı”.
Digər xəbərlər
