''Qalatasaray''la bağlı Türkiyə mətbuatında maraqlı xəbər yayılıb.

Komandanın ev oyunlarını keçirdiyi stadionun adı yenidən dəyişə bilər. Belə ki, başqan Dursun Özbəkin stadion sponsorluğu üçün Küveyt Dövlət Fondunun rəsmiləri ilə apardığı danışıqlar uğurla davam edir. Tərəflərin qarşıdakı günlərdə anlaşacağı gözlənilir. Anlaşmanın detalları da artıq məlumdu. Rəhbərlik stadionun ad sponsorluğu üçün Küveyt Dövlət Fonduna bağlı olan Küveyt Hava Yolları (Kuwait Airways) şirkəti ilə beşillik müqavilə imzalayacaq. Yeni sponsorun adı stadionun kənarına vurulacaq. Bunun qarşılığında ''Qalatasaray'' beş il ərzində ümumilikdə 80 milyon dollar qazanacaq! Amma burda bir maraqlı məqam var. Daha öncə ''Türk Telekom'' adlanan stadionun adı ötən ilin oktyabrında daşınmaz əmlak sektorunda məşhur şirkətlərdən olan ''Nef'' ilə imzalanan ''5+5'' illik müqavilədən sonra ''Nef Stadionu'' olaraq dəyişdirilmişdi. Ortaya təbii sual çıxır ki, ''Nef'' ilə anlaşmanın aqibəti necə olacaq? Amma bu problem çox asanlıqla yoluna qoyulacaq. Çünki ''Nef''in sahibi hazırda ''Qalatasaray''ın idarə heyətinin üzvü olan Ərdən Timurdu. Camiədə ən sevilən yönəticilərdən sayılan və gələcəkdə mütləq prezident vəzifəsini icra edəcəyi gözlənilən 40 yaşlı iş adamı Ərdən Timur ''yeni sponsor tapmaq yetərlidi. Mənim üçün stadionun ''Nef'' adını daşıyıb-daşımaması önəmli deyil. Anlaşma olduğu kimi davam edəcək. Hər şey ''Qalatasaray'' üçündü'' açıqlamasını verib. Yəni ''Qalatasaray'' bir tərəfdən Küveyt Hava Yollarından illik 16 milyon dollar (267 milyon lirə), digər tərəfdən ''Nef''dən illik 72,5 milyon lirə qazanmaqda davam edəcək.

''Qalatasaray''ın bu yeni anlaşması baş tutacağı halda Türkiyədə yeni rekord qeydə alınacaq. Çünki digər iddialılardan ''Fənərbaxça'' ''Ülkər'' ilə 10 illiyə 90 milyon dollar (illik 9 milyon dollar), ''Beşiktaş'' ''Vodafon'' ilə ''10+5'' illiyə 116 milyon dollar (illik 7,7 milyon dollar), ''Trabzonspor'' isə ''Medikal Park'' ilə 5 illiyə 32 milyon dollar (illik 6,5 milyon dollar) qarşılığında anlaşıb. ''Qalatasaray'' özü ''Nef''dən illik 4,5 milyon dollar qazanırdı. Amma yeni müqavilədən sonra ''Cim-Bom'' illik 16 milyon dollar qazanmaqla rəqiblərinə böyük fərq atmış olacaq.