Dünən Türkiyə çempionatının 5-ci turu çərçivəsində son çempion ''Qalatasaray'' debütant ''Samsunspor''u qəbul etdi.

“Football-plus.az” xəbər verir ki, İstanbul nəhəngi Kərəm Aktürkoğlunun dublu və Əbdülkərim Bardakcının qolu ilə ilk yarını 3:0 öndə tamamladı. Qonaqlar fasilədən sonra fərqi minimuma endirməyə müvəffəq oldular. Amma son sözü Mauro İkardi söylədi - 4:2. Argentinalı forvard mükəmməl məhsuldarlığını davam etdirir. Bu mövsüm 8-ci rəsmi oyunda 8-ci qolunu vuran təcrübəli futbolçu superliqada start heyətində meydana çıxdığı son 11 matçın hamısında fərqlənməyi bacarıb. O, bu qarşılaşmalarda ümumilikdə 18 qol vurub. Bununla da İkardi Burak Yılmaza məxsus rekordu təkrarlayıb. Müvafiq statistikanın aparıldığı 2007/08-dən bu yana yalnız Burak start heyətində meydana çıxdığı ardıcıl 11 superliqa matçında qol vurmağa müvəffəq olmuşdu. O, bunu 2011-ci ilin may-noyabr aralığında ''Trabzonspor''un heyətində bacarmışdı.