“Barsa” və “Atletiko” darmadağın etdi, “Real” penaltilərlə qazandı - İCMAL
La Liqada hesabat turu nəhənglərin inamlı qələbələri ilə əlamətdar oldu. “Barselona” və “Atletiko” rəqiblərini darmadağın etdi, “Real” da bir elə əziyyət çəkmədi. Turnir cədvəlinin yuxarı hissəsində qərarlaşan ənənəvi favoritləri “Vilyarreal” izləyir. “Sarılar” “Malyorka”nın qapısından qələbə topunu 90+4-cü dəqiqədə keçirdi.
“Barselona” “Jirona”dan ötən mövsümdəki məğlubiyyətin qisasını aldı. Özü də rəqibin meydanında və darmadağınla! İlk yarıda Yamal iki dəfə fərqləndi, meydan sahibləri isə çoxlu səhvə yol verdi. Referi qonaqların qapısına penalti təyin etdi, sonra da qərarını dəyişdi. Bu qərar Miçelin komandasını lap ruhdan saldı. 2-ci hissənin əvvəlində Olmo “Barsa”nın 3-cü qolunu vurdu, ardından Pedri fərqi artırdı. Sona yaxın favorit daha arxayın oynamağa başladı və “Jirona” bundan yararlandı. Stuani qollardan birinin əvəzini çıxmaqla baş məşqçiyə komandaya fayda verməyə qadir olduğunu göstərdi. İş 4:2-yə qədər uzanmadı (bu rəqiblər arasındakı son iki oyunda “Jirona” 4:2 hesabıyla qalib gəlmişdi). Yeri gəlmişkən, “Barsa” oyunu azlıqda bitirdi, Torres 86-cı dəqiqədə meydandan qovuldu. Portu ilə Yamal da az qala əlbəyaxa olacaqdı, hakim ehtirasları sarı vərəqə hesabına sakitləşdirdi. Flikin komandası La Liqada önünə çıxanı məğlub etsə də, oyunla bağlı suallar var. Əlbəttə, “Barsa” Çempionlar Liqasında daha güclü rəqiblərlə qarşılaşacaq.
“Real” cari mövsümdə 3-cü dəfə səfər oyununa çıxdı. Əslində madridlilərin oyunu xal itirdikləri əvvəlki qarşılaşmalardan bir elə fərqlənmədi. Sadəcə, bu dəfə bəxt “Real”ın üzünə güldü. Qonaqlar ilk yarıda yaxşı imkanlar yaxalasa da, Remiro Mbappe ilə Rüdigerin zərbələrindən sonra komandasını xilas etdi. “Real Sosyedad” isə 2-ci hissənin əvvəlinə qədər üç qol vurmalıydı. İlk yarının ortalarında Suçiç topu dirəyə vurdu, fasiləyə az qalmır Bekker tiri titrətdi. “Real” belə bədxərclik edənləri bağışlamır. 57-ci dəqiqədə Ardanın uzaq məsafədən zərbəsindən sonra top Qomesin əlinə dəydiyinə görə hakim “nöqtə”ni göstərdi. Penaltini Vinisius dəqiq yerinə yetirdi. Alquasil dəyişikliklər hesabına oyunun axarını dəyişməyə çalışdı. Bir neçə təhlükəli vəziyyət yaradan meydan sahibləri ardından daha bir axmaq penalti ilə cəzalandırıldı. Aramburu artıq topla vidalaşan Vinisiusu cərimə meydançasında yerə sərdi, bu dəfə Mbappe penaltini qola çevirdi. “Real” rahatca oyunu qələbəyə daşıdı, “Real Sosyedad” isə 2-ci qoldan sonr heç nə yaratmadı. Ançelotti komandasının oyununu düzəldəcək, indi nəticə daha vacibdi.
“Atletiko” La Liqada ardıcıl 2-ci qələbəsini qazandı. Özü də “hindular” ardıcıl 4-cü oyunda qol buraxmadılar. Bu oyun həm də “Valensiya”nın dərin böhran yaşadığını göstərdi. “Yarasalar” qətiyyən müqavimət göstərə bilmədi, oyun birmənalı şəkildə paytaxt kluunun diqtəsi altında keçdi. Qonaqlar oyunun əvvəlində bir neçə dəfə əks-hücum qura bilsələr də, “Atletiko” tezliklə təşəbbüsə tam yiyələndi. İlk qol daha tez vurulmalıydı, sadəcə, Sörlot üç əlverişli imkanı boşa verdi. Qrizmann ilə Lino da onun kimi. Hər halda, meydan sahibləri fasiləyə qədər hesabı aça bildi. De Paulun qapı önünə çıxardığı Qallaher “Atletiko”da ilk qolunu vurdu. “Valensiya” 2-ci hissənin əvvəlində oyunun axarını dəyişməyə çalışsa da, 54-cü dəqiqədə qapısında ikinci qolu gördü. Bu dəfə meydan sahiblərinin heyətində Qrizmann fərqləndi. “Yarasalar” bundan sonra müəyyən qədər fəallaşdılar. Amma yenə də qol onların qapısına vuruldu. Uzatma dəqiqələrində Alvares fərqi darmadağın həddinə çatdırdı. O da debüt qolunu vurdu. “Atletiko” yeni mövsümdə məğlubiyyətsiz irəliləyir. Simeonenin komandası 2-ci yerə şərikdi.
Turun qalan oyunlarına gəlincə, “Vilyarreal”ın qələbəsini girişdə vurğuladıq. “Betis”, “Selta”, “Atletik”, “Sevilya” və “Espanyol” da meydandan 3 xalla ayrıldı. Turun dünən axşam keçirilən son oyununda isə “Rayo Valyekano” “Osasuna”dan üstün oldu.
5-ci tur
Jirona – Barselona 1:4
Stuani, 80 - Yamal, 30; 37. Olmo, 47. Pedri, 64. (13891)
Jirona: Qassaniqa, Qutyerres, Blind, D.Lopes, Franses (Martines, 85), Martin, Solis, Qruneveld (Portu, 55), Sıqankov (Van de Beek, 69), Xil (Asprilya, 54), Ruis (Stuani, 69).
Barselona: Ter Ştegen, Balde, Martines, Kubarsi (Fort, 61), Kunde, Olmo (E.Qarsiya, 61), Kasado, Pedri (Viktor, 69), Rafinya, Yamal (Martin, 90+2), Levandovski (F.Torres, 69).
Real Sosyedad – Real 0:2
Vinisius, 58-p. Mbappe, 75-p. (37370)
Real: Kurtua, Mendi, Rüdiger, Militao, Karvaxal, Modriç, Valverde, Vinisius, Arda (Vaskes, 77), Dias (Rodriqo, 25), Mbappe (Endrik, 90).
Atletiko – Valensiya 3:0
Qallaher, 39. Qrizmann, 54. Alvares, 90+4. (61752)
Atletiko: Oblak, Lino (Rikelme, 67), Aspilikueta (Mandava, 77), Ximenes, Le Norman, Lyorente, Qallaher, Koke, De Paul (Korrea, 61), Qrizmann (Simeone, 76), Sörlot (Alvares, 61).
Malyorka – Vilyarreal 1:2
Albiol, 57-öz qapısına – Koşta, 27. A.Peres, 90+4. (18303)
Betis – Leqanes 2:0
Ezzalzuli, 74. Roke, 86. (48089)
Selta – Valyadolid 3:1
Alvares, 22. İqlesias, 35. Duvikas, 90+1 – Moro, 50. (21670)
Las Palmas – Atletik 2:3
Ramires, 58. Munyos, 83 – Sanset, 7. N.Uilyams, 30. Paredes, 76. (25908)
Sevilya – Xetafe 1:0
Navas, 23. (32643)
Espanyol – Alaves 3:2
Puado, 21; 56; 63-p. – Koneçnı, 35. Tenalya, 68. (24238)
Rayo Valyekano – Osasuna 3:1
Mumin, 50. Ratsyu, 66. U.Lopes, 90+5 – R.Qarsiya, 27. (13073)
1. Barselona 5 5 0 0 17-4 15
2. Real 5 3 2 0 9-2 11
3. Atletiko 5 3 2 0 9-2 11
4. Vilyarreal 5 3 2 0 11-8 11
5. Selta 5 3 0 2 13-10 9
6. Alaves 5 2 1 2 7-6 7
7. Rayo Valyekano 5 2 1 2 7-6 7
8. Jirona 5 2 1 2 8-8 7
9. Atletik 5 2 1 2 6-6 7
10. Espanyol 5 2 1 2 5-5 7
11. Osasuna 5 2 1 2 6-10 7
12. Betis 4 1 2 1 3-3 5
13. Malyorka 5 1 2 2 3-4 5
14. Sevilya 5 1 2 2 4-6 5
15. Leqanes 5 1 2 2 3-5 5
16. Real Sosyedad 5 1 1 3 3-6 4
17. Valyadolid 5 1 1 3 2-13 4
18. Xetafe 4 0 3 1 1-2 3
19. Las Palmas 5 0 2 3 6-10 2
20. Valensiya 5 0 1 4 3-10 1
Bombardir: Levandovski (Barselona) – 4.
Növbəti turun oyunları sentyabrın 20-23-ü aralığında keçiriləcək: Alaves – Sevilya, Valyadolid – Real Sosyedad, Osasuna – Las Palmas, Valensiya – Jirona, Real – Espanyol, Xetafe – Leqanes, Atletik – Selta, Vilyarreal – Barselona, Rayo Valyakano – Atletiko, Betis – Malyorka.
Turun rəqəmi
488 – “Betis”in çalışdırıcısı Manuel Pellerqrini La Liqada baş məşqçi kimi oyun sayını bu həddə çatdırdı. O və slovakiyalı Ferdinand Dauçik turnirin rekordçu legioner məşqçiləridi.
Turun ulduzu
Lamin Yamal (Barselona) – onun dublundan sonra qələbəyə şübhə yeri qalmadı. Yaşına uyğun olmayan tərzdə ağıllı oyun göstərdi.
Turun sitatı
Kilian Mbappe, “Real”ın forvardı:
“Vinisiusla meydanda bir-birimizi həm oyunlarda, həm də məşqlərdə tapmağa çalışırıq. O, gözəl futbolçudu, “Real” üçün çox iş görüb, birgə oynadığımıza görə sevinirəm. Penalti? Penaltini kimin vurması yox, hər birini qola çevirməyimiz önəmlidi”.
Reaksiyalar
Karlo Ançelotti, “Real”ın baş məşqçisi:
“Mbappe yaxşı oynadı, topla fəal oldu, çox təhlükəlidi. O, Vinisiusla və forvardlarla yaxşı anlaşır, oyunu çox xoşuma gəldi”.
Dieqo Simeone, “Atletiko”nun baş məşqçisi:
“Qallahr yüksək keyfiyyətlərə malik işgüzar futbolçudu. Heç vaxt dayanmır, bütün epizodlarda gücünü qoyur. Bizə məhz belə futbolçular lazımdı, orta sahəmizi gücləndirib. Alvaresin qolu da vacibdi. Ümid edirəm ki, bu, çoxsaylı qollarından birincisidi”.
Faktlar
* “Real” mövsümün ilk beş turunda penaltidən 4 qol vuran 3-cü komandadı. Əvvəllər “Rayo Valyekano” (2002/03) və “Atletiko” (2012/13) belə nəticə ilə yadda qalıb. Ançelottinin komandası “Las Palmas” (1:1), “Betis” (2:0) və “Real Sosyedad”la (2:0) oyunlarda penaltidən yararlanıb.
* İnyaki Uilyams “Atletik”in 2005-ci ilin fevralından bəri bir oyunda üç məhsuldar ötürmə verən ilk oyunçusudu. Həmin vaxt Fran Yeste “Betis”lə oyunda bunu bacarmışdı.
* “Barselona” yeni mövsümdə artıq 17 qol vurub. Bu, komandanın 2017/18 mövsümündən bəri ən yaxşı startıdı.
* 38 yaş 298 günlüyündə fərqlənən Xesus Navas “Sevilya”nın tarixinə La Liqada qol vuran ən ən yaşlı oyunçu kimi düşdü. O, Serxio Ramosun yenə də “Xetafe” ilə oyunda – bu ilin martında müəyyənləşdirdiyi rekordu yenilədi.
