Futbol üzrə ölkə çempionatının 1-ci liqasında ilk tur geridə qaldı.

Mövsümlərarası fasilədə heyətlərdə xeyli dəyişiklik olduğundan nəticələr haqda təxmin yürütmək çətin idi. Lakin müəyyən fikirlər var idi ki, onlar da özünü doğrultmadı. Qısası, maraqlı oyunlarla yanaşı, sürpriz nəticələrə də şahidlik etdik. “Karvan”ın “doğma divarlar” arasında çempionluğa iddialı “Qaradağ Lökbatan”ı yenməsi çoxunu təəccübləndirdi. Bu yöndə Azər Həşimovun narazılığı qeydə alındı ki, mütəxəssis ikinci penalti qərarına etiraz etdi. Düzü, Hüseynin cərimə meydançası daxilində Xəzərə kobud şəkildə müdaxilə etməsi Rəcəbovun qərarını şübhə altına almır.

Debütant “Cəbrayıl” da startda qələbə qazandı. Qarabağlılar “Difai”nin meydanından qələbə ilə ayrıldı. Digər bir debütant - “Baku Sportinq” daha dramatic ssenari ilə qələbə qazandı. “İmişli”nin qonağı olan bakılılar hesabda geri düşməsinə baxmayaraq, sonradan iki qol vurdu. “Qəbələ”nin “doğma divarlar” arasında büdrəməsi isə süpriz oldu. “Zaqatala”nı qəbul edən “qırmızı-qaralar” qolsuz heç-heçə iə barışdı.

Sözsüz, belədə qonaqların qazandığını, meydan sahiblərinin itirdiyini demək olar. Bu mənada “Mingəçevir” də azarkeşlərini sevindirdi. Ona görə ki, “nur şəhəri”nin komandası səfərdə MOİK-i məğlub etdi. Ümumiyyətlə, ilk tur “Karvan” istisna olmaqla, meydan sahibləri üçün uğurlu olmadı. Qonaqlardan üçü qələbə qazandı, biri heş-heçə etdi. Ümumiyyətlə, ilk turun nəticələri bizi irəlidə gərgin və maraqlı mövsümün izlədiyini deməyə əsas verir.

KƏNAN BAHADIR