Martın 28-29-da keçirilən oyunlarla futbol üzrə ölkə çempionatının 1-ci liqasında 19-cu tura yekun vuruldu.

İlk matçda “Karvan” növbəti dəfə uğursuzluğa düçar oldu. Yevlax təmsilçisi evdə autsayder “Difai Ağsu”ya qalib gələ bilmədiyindən çempionluq uğrunda mübarizədə ciddi zərbə aldı. Kənan Kərimovun çalışdırdığı komanda son 4 oyunda qələbəyə həsrət qalıb.

İkinci görüşdə “Qaradağ Lökbatan” “İrəvan”ı darmadağın etdi. Belədə Azər Həşimovun komandası liderliyi əldən vermədisə, Nazim Süleymanovun kollektivi “qara zolaq”dan çıxa bilmədi. Belə görünür ki, Qərbi Azərbaycan təmsilçisinin düşərgəsində hər kəs indi bu mövsümün mümkün qədər tez bitməsini istəyir.

Turun üçüncü qarşılaşmada sensasiya qeydə alındı. Buna qədər yalnız bir qələbəsi olan “Araz Saatlı” “doğma divarlar” arasında “Mingəçevir”i darmadağın etdi. Rüfət Quliyevin “sükanı arxasında” olduğu Saatlı təmsilçisi bununla da liqanı tərk etməməklə bağlı ümidlərini bir qədər artırdı. “Nur şəhəri”nin təmsilçisi haqda nəsə demək çətindi. Ədəhim Niftəliyevin komandası bir tur əvvəl daha güclü “Karvan”ın öhdəsindən gəlmişdi.

Dünən “Zaqatala”nı uzatma dəqiqələrində vurduğu qolla məğlub edən MOİK lider “Qaradağ Lökbatan”ın çox uzaqlaşmasına imkan vermədi. Turun son matçında liderin əsas izləyicilərindən “İmişli” ilə “Şamaxı” qarşılaşdı. Bu həm də turun mərkəzi oyunu idi. Güclülərin duelində qalib bəlli olmadı. Hər tərəfdən bir futbolçunun qırmızı vərəqə almasıyla müşayiət olunan 0:0 hesablı heç-heçə “Qaradağ Lökbatan”ı şəriksiz lider etdi. Təbii ki, çempionluq uğrunda mübarizə aparan “İmişli” də, “Şamaxı” da büdrədi.

1. Qaradağ Lökbatan 19 11 6 2 33-13 39
2. MOİK 19 11 5 3 40-19 38
3. İmişli 19 10 6 3 28-11 36
4. Şamaxı 19 9 8 2 40-16 35
5. Karvan 19 8 4 7 24-24 28
6. İrəvan 19 7 2 10 20-34 23
7. Zaqatala 19 5 7 7 24-25 22
8. Mingəçevir 19 6 3 10 15-28 21
9. Difai Ağsu 19 4 12 19-34 13
10. Araz Saatlı 19 2 1 16 18-57 7

Bombardirlər: Elşad Tağıyev (Şamaxı), Elmir Rəhimzadə (MOİK) – 12, Emin Zamanov (Şamaxı), Seyxan Fərəcov (Qaradağ Lökbatan) – 9.

Növbəti turun oyunları aprelin 3-5-i aralığında keçiriləcək: Mingəçevir – İmişli, Difai Ağsu – Qaradağ Lökbatan, İrəvan – Araz Saatlı, Zaqatala – Karvan, MOİK – Şamaxı.

KƏNAN BAHADIR