Düz danışmırsız, Samir Əliyev! – faktların dili ilə...
U-21 AÇ-2025-in seçmə mərhələ oyununda evdə Serbiyaya 0:2 uduzdu.
Komandanın baş məşqçisi Samir Əliyevin oyunsonrası mətbuat konfransında gileyləndi:
“Futbolçular premyer-liqada oynamayanda belə əziyyət çəkirik. Rüfət Abbasov yeganə futbolçudu ki, çempionat başlayandan, demək olar, 90 dəqiqə meydanda olur. Bu gün çempionatda 15-20 dəqiqə oynamaqla Avropada belə komandalara qarşı oynamaq çətindi".
Biz də Əliyevin sözünün “arxasınca düşdük”, həqiqəti aydınlaşdırmağa çalışdıq. Onun start heyətində meydana buraxdığı futbolçuların ilk 5 turdakı çıxışına nəzər salaq.
"Sabah"ın qolkiperi Yusif İmanov bütün oyunlarda 90 dəqiqə meydanda olub.
"Sabah"ın digər futbolçusu Xəyal Əliyev mövsümün ilk 4 oyununun hamısında iştirak edib, ümumilikdə 170 dəqiqə meydanda olub, Krunoslav Renduliç yalnız “Kəpəz”lə oyunda onun xidmətinə ehtiyac duymayıb.
"Qarabağ"ın hücumçusu Nəriman Axundzadə bu mövsüm 4 matçda toplam 321 dəqiqə oynayıb, bütün oyunlarda start heyətində olub.
"Şamaxı"nın vingeri Rüfət Abbasov komandasında sabil çıxış edir. Bu mövsüm “şirlər”in keçirdiyi 4 oyunun hər birində 90 dəqiqə oynayıb.
"Neftçi"nin yarımmüdafiəçisi Emil Səfərov bu mövsüm 5 matçda forma geyib, toplam 184 dəqiqə meydanda olub.
"Kəpəz"in müdafiəçisi Mahir Həsənov cari mövsümdə meydana çıxdığı 2 oyunda 44 dəqiqə oynayıb.
"Sabah"ın futbolçusu Abdulla Rzayev bu mövsüm komandanın heyətində yalnız 1 matçda forma geyib. "Şamaxı" ilə görüşdə 22 yaşlı müdafiəçi 81 dəqiqə meydanda olub.
Bolqarıstan "Arda"sında çıxış edən Cəlal Hüseynov cari mövsümdə 7 matç keçirib. 21 yaşlı oyunçu ümumilikdə 603 dəqiqə oynayıb.
Samir bəyin ilk “11-lik”də şans verdiyi futbolçulardan yalnız İbrahim Ramazanov, Fərid Yusifli və Ağadadaş Salyanski çempionatın heç bir görüşündə forma şansı qazanmayıb.
Beləliklə, aydın olur ki, yığmanın baş məşqçisi, yumşaq desək, düz danışmayıb. Müntəzəm şans qazanan futbolçuların sayı bir deyil, səkkizdi.
AKİF ƏHMƏDOV
Digər xəbərlər
