Bazar ertəsi əsas milli komanda ilə yanaşı, 21 yaşadək futbolçulardan ibarət yığmanın heyəti də açıqlandı.

Samir Əliyev Serbiya ilə seçmə oyun üçün 23 nəfərə dəvət göndərib. Lakin siyahıda “Qarabağ”ın üzvü, son vaxtlar yaxşı oyun sərgiləyən Nəriman Axundzadənin adı yoxdu. Görəsən, yarımmüdafiəçi nə üçün milliyə dəvət olunmayıb?

Samir bəy məsələ ilə bağlı ətraflı açıqlama vermək istəməsə də, redaksiyamıza bu mövzuda maraqlı informasiya daxil olub. Sən demə, Nərimanın yığmaya çağrılmamasının səbəbi martın 26-də keçirilən “Qarabağ” – “Qalatasaray” matçı imiş. Həmin dövrdə U-21 Antalyada təlim-məşq toplanışı keçirdi. Samir Əliyevin komandası qardaş ölkədə keçirdiyi yoxlama oyunlarında Albaniyaya uduzub (1:2), Sloveniyanı məğlub edib (2:0). Həmin toplanış üçün siyahıda da Nəriman Axundzadə olmayıb. Zədəsi olmayan futbolçu “Qalatasaray”la matçda meydana çıxıb. Çox güman, Nəriman Türkiyə klubu ilə oynamaq üçün millinin düşərgəsinə yollanmayıb. Samir bəy də bu səbəbdən onu Serbiya ilə qarşılaşmanın siyahısına salmayıb.

İLKİN SULTANLI