Dünən U-21 də yoldaşlıq oyunu keçirdi.

Samir Əliyevin komandası Senecdə Slovakiya yığması ilə qarşılaşdı. Meydan sahibləri elə ilk dəqiqələrdən oyunun axarına nəzarət etməyə başladı. Artıq 3-cü dəqiqədə fərdi ustalıq sayəsində üç futbolçumuzdan sıyrılan Marçelli hesabı aça bilərdi, sadəcə, zərbəsində azca dəqiqlik çatmadı. Amma “Slovan”ın vingeri 20-ci və 27-ci dəqiqələrdə ardıcıl iki qol vurmaqla üzərinə düşən işi gördü. Komandalar fasiləyə 2:0 hesabı ilə yollandı.

Fasilədən sonra rəqibin baş məşqçisi yalnız qapıçını saxlamaqla heyəti tam dəyişdi. Samir Əliyev isə ilk dəyişikliklərə 66-cı dəqiqədə əl atdı. Az sonra bizimkilər qollardan birinin əvəzini çıxdı. Cinah asmasından sonra Samir Abdullayev baş zərbəsi ilə fərqi azaltdı – 2:1. Təəssüf ki, cəmi iki dəqiqə sonra fərq yenidən iki topa çatdı. Ancaq 3:1 hesabı da sona qədər qorunmadı. Sonradan oyuna qoşulan Ağadadaş Salyanski fərqi minimuma endirdi.

U-21 növbəti yoldaşlıq oyununu iyunun 11-də evdə Bolqarıstanla keçirəcək.

Slovakiya (U-21) – Azərbaycan (U-21) 3:2 (2:0)
Azərbaycan (U-21): 12. Yusif İmanov (k), 2. Abdulla Rzayev (25. Eşqin Əhmədov, 87), 4. Cəlal Hüseynov, 13. Seymur Məmmədov (16. İ.Ramazanov, 80), 15. Süleyman Damadayev, 20. Rüfət Əhmədov (14. Rüfət Abbasov, 66), 8. Fərid Yusifli, 9. Nəriman Axundzadə (21. Qurban Səfərov, 87), 17. Murad Vəliyev (23. Ramin Nəsirli, 66), 24. Şahin Şahniyarov (7. X.Əliyev, 80), 10. Samir Abdullayev (18. Ağadadaş Salyanski, 87).
Qollar: N.Marçelli, 20 (1:0). N.Marçelli, 27 (2:0). S.Abdullayev, 70 (2:1). M.Sauer, 72 (3:1). A.Salyanski, 89 (3:2).
Vərəqələr: S.Məmmədov, 51. S.Damadayev, 59. T.Jaşşo, 65. F.Yusifli, 76 – sarı.
Hakim: Marek Redina (Çexiya).
7 iyun. Senec. 438 tamaşaçı.

KAMAL SƏFƏR