21 yaşadək futbolçulardan ibarət yığma Türkiyədə “Ümid millisi” adlanır.

Bizdə isə bu belə deyil. Yox, düşünmürəm ki, futbolumuzun gələcəyi yoxdu, belə bədbin ola bilmərəm. Çünki istedadına bələd olduğum məşqçilər və futbolçular var. İndiki U-21-in heyətində də yaxşı oyunçular var. Çərşənbə axşamı Şimali İrlandiyaya qarşı keçirilən matçda yığmamızın bəzi üzvləri yaxşı performans sərgilədi. Təəssüf ki, meydanda məşqçi işi yox idi.

Nə yalan deyim, oyundan öncə Samir Əliyevin komandasının bu rəqibi məğlub edəcəyinə inanırdım. Çünki britaniyalılar qrupda keçirdikləri ilk iki görüşdə uduzmuşdular. “Lüksemburqun 21 yaşadək futbolçulardan ibarət yığması bizdən güclü ola bilməz”, - deyə öz-özümə düşünürdüm. Çünki adını çəkdiyim ölkənin komandası Şimali İrlandiyanı məğlub etmişdi. Biz niyə bunu bacarmayaq ki?! Amma britaniyalılara uduzduq. Özü də rəqibin 59 dəqiqə meydanda azlıqda oynamasına baxmayaraq, məğlub olduq. Niyə? Cavab çox sadədi: Samir Əliyev! Mütəxəssis Şimali İrlandiya və Lüksemburq ilə oyunlar üçün 24 futbolçuya dəvət göndərib. Yığmaya çağrılanların əksəri tanış simadı. Çünki Yusif İmanov, Rza Cəfərov, Abdulla Rzayev, Rüfət Əhmədov, Fərid Yusifli, Veysəl Rzayev, Samir Abdullayev kimi futbolçular premyer-liqada, Ramin Nəsirli ilə Murad Vəliyev isə müntəzəm “Dauqavplis” və “Levadiya”da çıxış edirlər. Onlar milliyə fayda verə biləcək oyunçulardı. “Karvan”dan Əli Abdullayevin də siyahıda yer alması alqışalayiq idi. Lakin adının Şimali İrlandiya ilə oyunda iştirak ərizəsinə salınmaması heç də başa düşülən deyildi. Ümumiyyətlə, bir neçə oyunçu var ki, Samir Əliyevin onların xidmətindən yararlanmamasının səbəbini başa düşə bilmirəm. Başlayaq premyer-liqadan. “Sumqayıt”ın üzvü Rüfət Abdullazadənin hələ ki yaşı tamam olmayıb. Bu mövsüm premyer-liqada yaxşı oyun sərgiləyir. 8 qarşılaşmada 1 qol vurub, 1 məhsuldar ötürmə vetib. Amma yığmaya dəvət olunmayıb. Bundan başqa, “Araz-Naxçıvan”da 5 oyunda meydana çıxan Bayraməli Qurbanov yaddan çıxıb. Keçək indi 2-ci liqaya. “Şamaxı”nın heyətində Cəlal Cəbrayılov var. 4 tur ərzində 3 qol vurub, bombardirlər siyahısında da yer alıb. Amma Samir bəy onu da siyahıdan kənarda saxlayıb. “İmişli”nin heyətində çıxış edən, bu mövsüm 4 oyunun hamısında meydanda olan Muxtar Əlizadə də özünü yaxşı tərəfdən göstərməyi bacarıb. Onun da milliyə çağrılmaması şəxsən məni təəccübləndirən məqamlardandı.

Yaxşı, tutaq ki, Samir Əliyev bu futbolçuları yığmaya layiq bilmir. Bəs dəvət etdiklərinin potensialından niyə tam yararlana bilmədi? Şimali İrlandiya ilə oyunda ilk dəqiqələrdən üstün tərəf biz idik. Lakin Camal Cəfərov uzun ötürmələri ram edə bilmirdi. Rəqib qolu vurmamış Mirəli Əhmədov normal şəkildə hücumun qarşısını ala bilmədi. Hətta “sürüşmə” fəndini yerinə yetirən zaman top onun əlinə dəymişdi. Bəxtimiz gətirdi ki, hakim bunu görmədi. VAR olsaydı, qapımıza penalti də təyin olunacaqdı.
Bunları qoyaq qırağa! Rəqib azlıqdadı və 1:0 hesabıyla qalib gəlir. Nə üçün ikinci yarıya iki hücumçu ilə başlamaq haqda düşünmədiz? Zaman keçdikcə isə mövqelər üzrə dəyişikliklərlə kifayətləndiz.

Vallah, danışmaqdan, yazmaqdan bezdik. Amma azərbaycanlı məşqçilər belə adi oyunlarda xal və ya xallar itirməkdən yorulmadılar. Sonra da deyirik ki, AFFA rəhbərliyi nə üçün yerli mütəxəssisə güvənmir. Çünki onlar əllərinə düşən şansı dəyərləndirə bilmirlər. Samir Əliyev kimi...

İLKİN SULTANLI