U-21 yığmamız bu gün AÇ-2025-in seçmə mərhələsində növbəti matçını keçirəcək.

Samir Əliyevin komandası "Liv Bona Dea Arena"da serbiyalı həmyaşıdlarıyla üz-üzə gələcək.

AÇ-2025-ün seçmə mərhələsi
F qrupu, 14-cü tur
Azərbaycan U-21 - Serbiya U-21 0:2
Vukaşin Durdeviç 26, Yovan Mijatoviçi 40
Bakı, "Liv Bona Dea Arena". Saat 19.00.

Cümə günü keçirdiyi oyunda Lüksemburqa məğlub olan komanda günahını evdə yumağa çalışacaq. Samir Əliyevin yetirmələri F qrupu çərçivəsində ilk 7 oyundan altısını məğlub başa vurub. İndi xoşagəlməz statistikanı yaxşılaşdırmaq lazımdı. Bunun yetərincə çətin vəzifə olduğunu bilirik. Millimiz turnir cədvəli baxımından ən yaxın rəqiblərindən biri olan Lüksemburqa uduzmaqla ümumi durumun nə qədər vahiməli olduğunu sübut etdi. Məsələnin müsbət tərəfi isə “Sabah”ın qapıçısı Yusif İmanovla “Qarabağ”ın hücumçusu Nəriman Axundzadənin U-21-in heyətinə cəlb olunmasıdı. Belədə Samir Əliyevin qismən geniş seçim imkanı olacaq. O başqa məsələ ki, gənclərimiz sırasında formada olan, özünü yaxşı tərəfdən göstərən qapıçı, demək olar ki, yoxdu! Hər halda, mütəxəssisi məhz bu üzdən qınamaq olmur. 

Ümumiyyətlə, baş məşqçinin meydana buraxdığı futbolçuların əksəriyyəti istənilən səviyyədə deyil. Klublarında belə ehtiyat oyunçular skamyasında əyləşənlərin beynəlxalq səviyyədə uğuru üçün yalnız möcüzə tələb olunur. Serbiyalı gənclərin təcrübəsinə də diqqət edək. Heyətdə Samed Bezdar, Yovan Miyatoviç, Yovan Sljiviç, Stefan Lekoviç və Mihaylo Liviç kimi futbolçular var ki, istənilən mənada həmyerlilərimiz üçün başağrısı olacaq. Belədə azsaylı azarkeşlərin dəstəyindən yararlanıb son dəqiqəyə qədər vuruşmaqdan başqa yol yoxdu!
Qeyd edək ki, turun digər matçında Şimali İrlandiya Ukraynanı qəbul edəcək.

1. Ukrayna 7 7 0 0 17-3 21
2. İngiltərə 8 6 1 1 32-5 19
3. Serbiya 9 4 1 4 12-18 13
4. Lüksemburq 9 2 1 6 6-23 7
5. Ş.İrlandiya 7 2 1 4 4-8 7
6. Azərbaycan 8 1 0 7 4-18 3

KƏNAN BAHADIR