Bu gün əsas yığma ilə yanaşı, 21 yaşadək futbolçulardan ibarət yığma da yaşıl meydana çıxacaq.

"Football-plus.az" xəbər verir ki, Samir Əliyevin rəhbərlik etdiyi komanda AÇ-2025-in seçmə mərhələsində Serbiyanın qonağı olacaq. Qarşılaşma yerli telekanallarda canlı yayınlanmayacaq.

AÇ-2025-nin seçmə oyunu
F qrupu
Serbiya – Azərbaycan
Hakimlər: ƏRKAN ÖZDAMAR, Serkan Oğulcan, Murat Tuqberk Çurbay, Zorbay Küçük (hamısı Türkiyə).
Serbiya. Voyvodina. Stara Pazova stadionu. Saat 22.00.

Bu oyun Samir Abasovun komandasının ilk sınağıdı. Təcrübəli mütəxəssis qrup mərhələsində uğurlu nəticələr əldə etmək istəyir. Serbiyadakı görüşün favoriti meydan sahibləridi. Heyətləri müqayisə etdikdə bunu açıq-aşkar görmək olar. Duşan Corceviçin rəhbərlik etdiyi kollektivdə “Sampdoriya”, “Beşiktaş”, “Stok Siti”, “Fortuna Sittard” kimi klublarda forma geyən oyunçular var. Maraqlı məqam odu ki, yerli komanda heyət sarıdan hansısa problem yaşamır, zədəli-cəzalı futbolçu da yoxdu.

Azərbaycan millisində isə işlər qarışıqdı. Yığmamızın heyətində Mustafa Yıldırım zədəlidi. Bu səbəbdən də hücumçu bugünkü qarşılaşmada meydana çıxa bilməyəcək. Bundan başqa, Nəriman Axundzadənin yoxluğu da yığmanın oyununa təsir edə bilər. Çünki hücumçu bu komandanın əsas simalarında biri idi. Onun yığmaya dəvət olunmamasının səbəbini Samir Əliyev açıqlamadı. Dünən çalışdırıcı ilə əlaqə saxlayaraq oyunla bağlı fikirlərini öyrənmək istədik. Lakin mütəxəssis mesajımızı oxusa da, cavab vermədi. Görünür, Samir bəy Serbiya ilə oyuna köklənib. Bu səbəbdən də 5-10 dəqiqə vaxt taparaq sualımızı cavablamaq ixtiyarında olmayıb. Ümid edək ki, bugünkü qarşılaşmada onun komandası rəqibə güc göstərmək ixtiyarında olacaq.

F qrupunda mübarizə sentyabrın 7-də başlayıb. İlk görüşdə Şimali İrlandiya evdə Lüksemburqa məğlub olub – 0:1. Bu gün qrupumuzda daha bir oyun keçiriləcək: Ukrayna Şimali İrlandiyanı qəbul edəcək.