Məlum olduğu kimi İstanbul nəhəngləri bu mövsüm Avropa Liqasının qrup mərhələsində çıxış edəcəklər.

Artıq həm “Beşiktaş”, həm “Qalatasaray”, həm də “Fənərbaxça”nın UEFA-ya göndərdikləri iştirak ərizələri bəllidi. “Beşiktaş”da 25 nəfərlik heyətdə Nəcip Uysal, Vensan Abubakar, Daniel Amarti və Aleks Oksleyd-Çemberleynə yer tapılmayıb. Komandanın kapitanlarından olan Nəcipin adının siyahıya salınmaması zədə ilə bağlıdı. Diz bağı qopan və əməliyyat olunan təcrübəli futbolçu ən azı bu təqvim ilinin sonuna qədər meydana çıxa bilməyəcək. Digər 3 futbolçu isə baş məşqçi Covanni van Bronkhorstun planlarına daxil deyil. Buna baxmayaraq onlar çoxsaylı təkliflərə rəğmən ayrılmağa tələsmirlər. Çünki illik maaşları yüksəkdi.

“Benfika”dan transfer edilən portuqaliyalı yarımmüdafiəçi Joao Marionun da adı son anda siyahıya salınıb. “Qalatasaray”a gəlincə, UEFA-ya göndərilən 22 nəfərlik siyahıda 4 futbolçu yer almayıb. Bunlar Aleksandru Çikıldau, Taylan Antalyalı, Eyüp Aydın və Xəlil Dərvişoğludu. Ötən mövsümü fərqli klublarda icarədə keçirən bu oyunçular zatən Okan Burukun planlarına daxil deyil. Onlarla ya yollar ayrılacaq, ya da yenidən icarəyə veriləcəklər. Yeni transferlər Viktor Osimhen ilə İsmail Yakobsun adı gözlənildiyi kimi siyahıya salınıb. Serxio Oliveyranın isə artıq “Qalatasaray”ı tərk etdiyini və “Olimpiakos”la anlaşdığını bildirək.

“Fənərbaxça”nın iştirak ərizəsi ilə bağlı isə diqqət çəkən məqam var. 22 nəfərlik siyahıya Oğuz Aydın, Ləvənt Mərcan, Rayan Kent, Bartuğ Elmaz və Əmrə Mor düşməyib. Son 3 futbolçunun siyahıdan kənar qalması gözlənilməz olmadı. Hərçənd həm Kent, həm də Bartuğ bu mövsüm bəzi avrokubok oyunlarında şans qazanmışdı. Oğuz Aydın ilə Ləvənt Mərcanın siyahıya düşməməsinin ən maraq doğuran tərəfi onların bu yay transfer edilməsidi. Özü də Mourinyo Oğuzun transferi zamanı onu tərifləyərək yüksək səviyyəli futbolçu adlandırmışdı! Ən son “Mançester Yunayted”dən icarəyə götürülən Sofyan Amrabatın da heyətdə olduğunu bildirək.