Məlum olduğu kimi, bu mövsüm Türkiyəni avrokuboklarda İstanbul nəhəngləri təmsil edəcək.
“Football-plus.az” xəbər verir ki, “Qalatasaray” Çempionlar Liqasının, “Fənərbaxça” ilə “Beşiktaş” isə Konfrans Liqasının qrup mərhələsində oynamaq haqqı qazanıb. Bu arada hər 3 klubun UEFA-ya göndərdiyi iştirak ərizələri bəlli olub. “Qalatasaray”dan başlayaq. “Sarı-qırmızılar”da 3 futbolçu – Fredrik Midtşö, Leo Dyubua və Xəlil Dərvişoğlunun adı iştirak ərizəsinə salınmadığı halda, yeni transferlər Tanqi Ndombele ilə Devinson Sançesin adı ora salınıb. Siyahıda 25 futbolçu əvəzinə 23 futbolçunun olması diqqəti çəkir. Çünki “altyapıda yetişən oyunçu” meyarına ayrılan 4 nəfərlik yerə yalnız 2 futbolçunun – Emin Bayramla Cankat Yılmazın adı salınıb. Türkiyədə yetişmiş 4 oyunçu meyarına uyğun gələnlər Əbdülkərim Bardakcı, Kazımcan Karataş, Kərəm Aktürkoğlu və Barış Alpər Yılmazdı. 3 qürbətçi limiti Günay Güvənç, Kaan Ayhan və Kərəm Dəmirbay sayəsində doldurulub. Okan Burukun hücum xəttində seçim imkanı geniş olduğundan digər qürbətçi Xəlil Dərvişoğluya bu siyahıda yer tapılmayıb! Daha 14 futbolçu isə legionerdi. Adı siyahıya düşməyənlərdən Midtşönün “Pendikspor”a keçidində müəyyən problem yaransa da, çətinlik artıq yoluna qoyulub və transfer baş tutmaq üzrədi. Elə Burukun planlarında yer almayan və heyətə düşməkdə çətinlik çəkən Dyubuanın da komandadan ayrılması gündəmdədi. Onun da başqa superliqa təmsilçisinə keçəcəyi gözlənilir.

“Fənərbaxça”nın iştirak ərizəsinə gəlincə, Omar Fayed, Burak Kapacak və Əmrə Dəmir kimi gənc oyunçulara orda yer tapılmaması sürpriz olmayıb. Digər oyunçulardan Luan Peres, Samet Akaydın, Mərt Müldür, Nazim Sanqare, Bartuğ Elmaz və Əmrə Mor da siyahıdan kənar qalıb. Xüsusilə bu yay transfer edilən Türkiyə yığmasının üzvü Mərt Müldürün kənarda qalması təəccüblə qarşılanıb. “Beşiktaş”ın iştirak ərizəsində isə yeni transferlər Erik Bayi ilə Tayfur Bingölə yer tapılıb. Amma siyahıda uzun müddətə sıradan çıxan Əmrəcan Uzunhanla Tayyip Talha Sanuça, eləcə də müdafiənin sol cinahındakı rəqabətdə Artur Masuakuya uduzan Umur Meraşa yer tapılmayıb.