Konfrans Liqasının 3-cü təsnifat mərhələsində ''Neftçi'' ilə qarşılaşacaq ''Beşiktaş''ın UEFA-ya göndərdiyi iştirak ərizəsində bəzi dəyişikliklər edilib. İlk növbədə yeni transfer Ante Rebiçin adının siyahıya salındığını bildirək.

"Football-plus.az" xəbər verir ki, xorvatiyalı ulduz təmsilçimiz ilə görüşdə iştirak edə biləcək.

Bundan başqa siyahıya hələ zədəsini tam sağaltmayan Cenk Tosunun da adı əlavə edilib. Xatırladaq ki, təcrübəli forvard təxminən 2 aya yaxındı, zədəsini müalicə etməklə məşğuldu. Cenk ötən mövsümün son turunda, ''Konyaspor'' ilə ev oyununda zədələnmişdi.

Türkiyə yığmasının forvardının ''Neftçi'' ilə ilk görüşdə meydana çıxacağı inandırıcı görsənmir. Cenk ən yaxşı halda cavab oyununda komandasına kömək edə biləcək. Baş məşqçi Şenol Günəş bildirib ki, Cenk Tosun ilə digər zədəli futbolçu Rəşid Gezzal bazar ertəsindən etibarən məşqlərə başlayacaq. Gezzalın adı əvvəlcədən iştirak ərizəsində idi. Amma təcrübəli əlcəzairli futbolçu zədə üzündən bundan əvvəlki mərhələdə ''Tirana''ya qarşı hər iki oyunu buraxmışdı.