Premyer-liqada 5-ci turun intizam tədbirləri baxımından səliqəli keçdiyini demək üçün tam əsasımız var. 5 oyunda 20 sarı vərəqə göstərildi, meydandan qovulan olmadı. Həmçinin komandalardan ikisi – “Qarabağ”la “Neftçi” turu vərəqəsiz bitirdi. İdarəçiliklə bağlı başqa məqamlar haqda reportyorlarımızın qeydlərindən xəbər tutacaqsız.

Turan Tovuz - Səbail, RƏŞAD ƏHMƏDOV

Turun açılış matçı Rəşad Əhmədova və köməkçiləri Rəhman İmami, Cəmil Quliyev, Rəvan Həmzəzadədən ibarət hakimlər briqadasına tapşırılmışdı. Qarşılaşmada mübarizənin əsasən bir tərəfdə getdiyini deyə bilərik. Çünki ilk hissədə daim hücuma atılan və irəlidə olan “Turan Tovuz” var idisə, ikinci hissədə də eyni tərzdə “Səbail” göründü. Bu üzdən də Əhmədovun məsafə qət etmək baxımından çox da çətinlik çəkmədiyini düşünürəm. Buna baxmayaraq, ümumi oyun idarəçiliyi qənaətbəxş səviyyədə idi. Hətta son dəqiqələrində futbolçular arasında yaranmış aqressivliyi də Əhmədov sakitləşdirməyi bacardı. Epizodlar zamanı verilən vərəqələr də yerindəydi.

Kəpəz - Sabah, NİCAT İSMAYILLI

Adil Şükürovun gözlənilən, həmçinin bir o qədər də gözlənilməz istefasından sonra “Kəpəz”i bu matça Xaliq Mərdanov çıxardı. Ona görə də komandanın hansı tərzdə oyun nümayiş etdirəcəyi maraqla gözlənilir, futbolçuların müvəqqəti rəhbərə özünü göstərmək üçün aqressivləşəcəkləri təxmin olunurdu. Doğrudu, meydan sahibi sayılan “Kəpəz” matçın ilk dəqiqələrindən mübarizə əzmini ortaya qoysalar da, hansısa aqressivliyin şahidi olmadıq. Ona görə də Nicat İsmayıllı xüsusi bir çətinlik çəkmədi. Xüsusən də “Sabah”ın oyuna və topa nəzarət etməsi baş hakimin işini rahatlaşdırırdı. Matçda etiraz doğuran yeganə məqam ilk hissənin sonuna artırılan vaxt ilə bağlıydı. Belə ki, ilk yarıda ən azı 5-6 dəqiqəlik dayanma olsa da, hakim cəmi 2 dəqiqə əlavə etdi.

Sumqayıt – Araz-Naxçıvan, CAVİD CƏLİLOV

“Mehdi Hüseynzadə”də keçirilən oyunun ilk 20 dəqiqəsi yetərincə gərgin idi. Lakin Ömər Buludovun zədələnərək meydanı tərk etməsi bizi cansıxıcı matçla baş-başa qoymadı. Cavid bəy həmin vaxta qədər çox diqqətli olmağa məcbur idisə, temp səngiyəndən sonra nəfəs dərdi. Ədalət təmsilçisinin doğru məqamlarda müdaxiləsi təqdirəlayiq oldu. O, qərarlara etiraz edənləri cəzalandırmaqdan da çəkindirmədi. Ona görə ki, “fit sahibi”nə qarşı çıxmağa səbəb yox idi. Sadəcə, hesabın açılmaması futbolçuların emosiyalarını idarə etməsini çətinləşdirdiyindən hakimlə razılaşmaq istəmirdilər. Belədə Cəlilovu qınamaq yersiz olardı ki, baş məşqçilər də belə etdi. Hakim futbolçulara 7 sarı vərəqə göstərdi. Heç bir başqa oyunda bu qədər cəzalanan olmadı.

Şamaxı – Neftçi, ƏLİYAR AĞAYEV

Premyer-liqa Şamaxıya FİFA referisinin təcrübəsiylə birgə qayıtdı. Kollektivlərin oyun tərzi həddən artıq səliqəli göründü. Ya Əliyar bəydən çəkindilər, ya da bayram ab-havasını korlamaq istəmədilər. Baş hakim də vəzifəsinin öhdəsindən layiqincə gəldi. O, cəmi iki sarı vərəqəylə oyunun ədalətli idarəçiliyini təmin etdi. Təbii ki, bu mənada komandalar da yüksək qiyməti haqq edir. “Fit sahibi” matçın baxımlılığına xələl gətirməmək şərtilə güzəştlər etməklə yanaşı, Ayxan Abbasovun əsəbiylə oynadı. Onun texniki zona qaydalarını pozan Elnur Çovdarova “sarı” verməsi baş məşqçini özündən çıxardı. Yenə də Əliyar bəyi günahlandırmaq doğru olmaz. Hər halda, bu yöndə qərarlar AFFA-nın tələblərinə uyğun verilir.

Zirə - Qarabağ, İNQİLAB MƏMMƏDOV

Zirədə keçirilən oyunun favoriti bəlli idi ki, nəticəni təxmin etmək də çətin deyildi. Konfrans Liqasında mübarizəni dayandıran “qartallar” tarixində ilk dəfə “Qarabağ”ı evdə məğlub etsəydi, böyük əks-səda doğurardı. Amma tilsim qırılmadı və bunun səbəbkarı İnqilab bəyin qərarları deyil. Ədalət təmsilçisi peşə prinsiplərinə sadiq qalmaq şərtiylə komandaların arxayın oyun sərgiləməsinə şərait yaratdı. Cəmi bir "sarı"nın olması matçın yüngül qayda pozuntularıyla yadda qaldığını göstərir. Əlbəttə, belədə İnqilab bəyin yükü də yüngül oldu. Qısası, hakim işinin öhdəsindən asanlıqla gəldi.