Qış fasiləsi yaxınlaşdıqca turnir cədvəlində də müəyyən cizgilər dəqiqləşir, yəni artıq komandaları müəyyən qruplara bölmək olar.

Ənənəvi “çempionluğa iddialılar” qrupuna “Qarabağ”dan başqa yalnız “Zirə”ni aid edə bilərik. Hərçənd belə yanaşma özü də yetərincə şərti xarakter daşıyır. Axı həmin “qartallar” son iki turda qələbəyə həsrət qalıb. Məntiqlə Rəşad Sadıqov və komandası “Qarabağ”ın iki turnirə diqqət ayırmasından yararlanmalı və xal hesabını artırmalıydı. Olmadı, “Neftçi”nin stadionu ilə bağlı ciddi kompleks yaşayan “Zirə” Rəhman Hacıyevin 60-cı dəqiqədə vurduğu qola cavab verə bilmədi. “Zirə”nin bəxti onda gətirdi ki, ən yaxın izləyiciləri – “Sumqayıt”, “Səbail” və “Araz-Naxçıvan” da qələbəyə sevinmədi, yəni bu komandalarla xal fərqi hələ də 5-6-ya bərabərdi.

Turun ilk oyun günündə iki heç-heçə qeydə alındı. “Səbail”lə oyunda irəli çıxan “Araz-Naxçıvan” uzatma dəqiqələrində elə avtoqola üzüldü ki, bunu ancaq xəyal etmək olardı. Kurdiçin həmin epizodda nə etmək istədiyi özünə də qaranlıq qaldı, azarkeşlərə də. “Turan Tovuz” isə “Sumqayıt”la oyunda 0:2-ni heç-heçəyə çevirsə də, bundan artığına gücü çatmadı. Oyunun axarına yalnız fasilədən sonra müdaxiə edən Ayxan Abbasovun bu nəticədən razı qalıb-qalmadığını demək çətindi. Amma ortada acı bir gerçəklik var: “Turan Tovuz” artıq 4 oyundu qələbəyə həsrətdi və tədricən “autsayderlər” adlandıra biləcəyimiz qrupda “möhkəmlənir”.

Həmin qrupun ən “parlaq” nümayəndələrindən biri isə “Kəpəz”di. Ədalət naminə deyək ki, gəncəlilər “Sabah”la oyunda yetərincə yaxşı təsir bağışladı, 0:2 meydandakı mübarizənin axarına uyğun deyildi. Amma futbolun yazılmayan qanunlarından biri də budu ki, oyun unudulur, tarixdə nəticə qalır.
Vaxtilə Azərbaycan futbolunda tarix yazan “Qəbələ” bu gün yalnız elitada yerini necə qoruyacağını düşünür. “Qırmızı-qaralar” dünən “Qarabağ” önündə darmadağın oldu. Ağdamlılar üç cavabsız qol vurmaqla ən yaxın izləyicisi “Zirə” ilə xal fərqini də 4-ə çatdırdı. Qurban Qurbanovun komandasının qış çempionu olmaq yolunda inamlı addım atdığını da deyə bilərik.

Misli premyer-liqası
2-ci dövrə, 15-ci tur
2 dekabr
Araz-Naxçıvan – Səbail 1:1
Turan Tovuz – Sumqayıt 2:2
3 dekabr
Kəpəz – Sabah 0:2
Neftçi – Zirə 1:0
4 dekabr
Qarabağ – Qəbələ 3:0
1. Qarabağ 15 10 2 3 36-13 32
2. Zirə 15 8 4 3 13-8 28
3. Sumqayıt 15 6 5 4 16-16 23
4. Səbail 15 6 5 4 23-22 23
5. Araz-Naxçıvan 15 6 4 5 17-16 22
6. Neftçi 15 6 4 5 16-13 22
7. Sabah 15 5 4 6 21-19 19
8. Turan Tovuz 15 4 4 7 23-24 16
9. Qəbələ 15 3 2 10 11-26 11
10. Kəpəz 15 2 4 9 7-26 10
Bombardirlər: Olavio Juninyo (Qarabağ) – 11, Aleksandr Ramalinqom (Səbail) - 6.
Növbəti turun oyunları
8 dekabr, 19.30. Sumqayıt – Qarabağ
9 dekabr, 15.00. Qəbələ - Kəpəz
9 dekabr, 17.00. Zirə - Araz-Naxçıvan
10 dekabr, 15.00. Sabah – Səbail
10 dekabr, 18.00. Neftçi – Turan Tovuz