Misli premyer-liqasının 2022/23 mövsümü “Qarabağ” və “Neftçi” ilə yanaşı, “Sabah” üçün də düşərli oldu.

Belə ki, Bakı təmsilçisi avrokuboklara vəsiqə qazanan 21-ci Azərbaycan klubu kimi futbol tarixinə adını yazdırdı.

Xatırladaq ki, əlamədar hadisə 28-ci turda “Sabah”ın “Qəbələ” üzərində 3:2 hesablı qələbəsi nəticəsində baş verdi. Bu üzdən baş məşqçi Murad Musayevin şəninə təriflər yağdırıldı, rusiyalı mütəxəssis azarkeşlərin könlündə taxt qurdu.
Lakin hazırda rusiyalı mütəxəssis tam fərqli məsələ ilə gündəmdədi.

29-cu turda komandasını “Səbail”lə oyuna çıxaran Musayev 83-cü dəqiqədə hakimə etiraz etdiyinə görə sarı, matçdan sonra isə eyni səbəbdən sarı və qırmızı vərəqə aldı. Qısa desək, çalışdırıcının qəzəbi baş hakim İnqilab Məmmədovun qəzəbi ilə toqquşdu. Nəticədə ortaya araşdırmağı lazım bildiyimiz statistika çıxdı.

Hazırda Murad Musayev intizam baxımından nəinki həmkarlarından, hətta futbolçulardan belə geridədi. “Sabah”ın baş məşqçisi cari mövsümün ilk turunda “Sumqayıt” (3:0), 11-ci turunda “Neftçi” (3:2), 12-ci və 28-ci turlarında “Qəbələ” (2:1, 3:2), 17-ci turunda “Kəpəz” (2:2), 23-cü turunda “Turan Tovuz” (0:2), 29-cu turunda “Səbail”(1:2) ilə qarşılaşmalarda 8 sarı vərəqə alıb. 4-cü turda “Qarabağ” (3:4), 23-cü turda “Turan Tovuz” (0:2) və nəhayət, 29-cu turda “Səbail”lə (1:2) qarşılaşan “Sabah”ın baş məşqçisi 3 dəfə də qırmızı vərəqə ilə cəzalanıb.

Hətta premyer-liqanın 2022/23 mövsümündə ən çox meydandan qovulan futbolçular siyahısında da onun komandası fərqlənir. Belə ki, bakılıların mərkəz müdafiəçisi Con İrasabal 2 “qırmızı” ilə üzləşib. Coşqun Diniyev (Zirə), Vüqar Mustafayev (Sumqayıt) və Tural Bayramlı (Səbail) da hərəyə 2 dəfə qırmızı vərəqə alıb.

Statistikaya əsasən deyə bilərik ki, bu mövsüm ən çox “qırmızı” alan rusiyalı mütəxəssisdi. Hakimlərin qərarlarına sərt şəkildə dəfələrlə etiraz edən baş məşqçi mətbuat konfranslarında da gileylənir. Onun dediklərinə inansaq, “Sabah”ın çıxış etdiyi matçlarda ədalət təmsilçiləri komandasına münasibətdə qərəzli davranır və xal qazanmasının qarşısını alır.

KƏNAN BAHADIR