Noyer getdi: ulduz qapıçını kim əvəz edəcək?
“Bavariya”nın 38 yaşlı qapıçısı Manuel Noyer.
Almaniya yığmasından getdiyini elan etdi. Futbolçu bu qərarı sosial şəbəkə hesabında açıqladı. Halbuki bir müddət əvvəl onun növbəti dünya çempionatına qədər milli komandada qalacağı deyilirdi. Son AÇ-də o, əsas qapıçı idi. Almaniyalı jurnalist Kristian Falk Noyerin yığmadan getməyi planlaşdırmadığını yazmışdı. Onun informasiyasına görə, Manu beynəlxalq oyunlardan kənarda qalmaq və yalnız 2024-cü ilin sonunda yığmaya qayıtmaq istəyir. Bir müddət əvvəl, daha dəqiqi, Avropa çempionatından sonra Almaniyanın aparıcı idman nəşri “Kicker” də qapıçının DÇ-2026-ya qədər yığmada qalacağını yazmışdı.
Noyer qərarını açıqladığı videomüraciətdə belə deyib:
“Nə vaxtsa bu gün gəlməliydi. Almaniya yığmasındakı karyeram başa çatır. Məni tanıyan hər kəs bilir ki, bu qərarı vermək asan olmadı. Yığmada 15 il əvvəl – Birləşmiş Ərəb Əmirlikləri ilə oyunda debüt etmişəm. Onda çox həyəcanlanmışdım. Çoxlu yüksəliş və eniş dönəmimiz olub. Sözsüz, Braziliyadakı dünya çempionatında qələbə qazanmağımız mənim üçün əsas hadisədi. Geri boylanarkən komanda yoldaşlarımla eyni meydanı bölüşdüyümə, 7 il ərzində kapitan olduğuma görə çox qürurlu və minnətdaram. Karyeramın sonunda zədəmi sağalda və evdəki Avropa çempionatında oynaya bildim. Almaniya Futbol İttifaqının bütün əməkdaşlarına, xüsusən də qapıçı məşqçilərinə təşəkkür etmək istəyirəm – biz hamımız vahid ailəydik. Almaniya yığmasının formasını daşıdığıma görə şad idim. Böyük təşəkkürlər”.
2009-cu ilin iyununda yığmada debüt edən Manuel bu müddətdə milli formada 124 oyun keçirib. DÇ-2010-dan bəri bütün böyük turnirlərdə yığmanın qapısı ona tapşırılıb. Bu müddətdə DÇ-2014-ün qalibi, DÇ-2010, AÇ-2012 və AÇ-2016-nın bürünc medalçısı olub. Çox güman, Noyeri “çərçivə”də “Barselona”nın 32 yaşlı qapıçısı Mark-Andre ter Ştegen əvəz edəcək. Yığmada hələ 2012-nin mayında debüt edən qapıçı bu müddətdə cəmi 40 oyuna çıxıb. Bunların da 25-i yoldaşlıq oyunudu. Ter Ştegen böyük turnirlərdə bir dəqiqə də forma şansı qazanmayıb. Yığmanın çalışdırıcılarının Mark-Andreyə etimad göstərməməsi qapıçılar arasında münasişəyə səbəb olub. Noyer Ter Ştegenin bu mövzudakı tənqidi açıqlamasına belə cavab verib:
“Mən komanda oyunçusuyam, həmişə komandanın mənafeyini düşünürəm. Belə söhbətlərin komandaya fayda verdiyini düşünmürəm, xüsusən də söhbət qapıçı mövqeyindən gedirsə. Ter Ştegen bu haqda heç də ilk dəfə danışmır. Mən öz oyunumdan və buna görə məsuliyyət daşıyanlardan razıyam. Daha nə deməli olduğumu bilmirəm”.
İndi isə belə görünür ki, çoxdan bu şansı gözləyən Mark-Andrenin qapıya keçməsinin vaxtı çatdı.
Digər xəbərlər
