Qalan çempionatlarda yavaş-yavaş elitanı tərk edən, Çempionlar Liqasına və ya Avropa Liqasına vəsiqə qazanan komandalar müəyyənləşir.

Bəs La Liqada bu yöndə vəziyyət necədi? Yeni heç nə yoxdu! “Barselona” çempiondu, “Elçe”nin aşağı yuvarlanacağı bilinir. Qitənin ən nüfuzlu klub turnirinə qatılacaq 4-cü komanda hansı olacaq – “Real Sosyedad”, yoxsa “Vilyarreal”? Konfrans Liqasında oynamağa imkan verən 7-ci yeri kim tutacaq? Hansı komandalar yeni mövsümə La Liqa 2-də başlayacaq? Bütün bu suallara yalnız son turda cavab tapılacağı istisna olunmur.

“Kadis” və “Valyadolid” elitada qalmaq uğrunda amansız mübarizə aparır, şəxsi dueldə qələbə 6 xal anlamına gəlir. Bu dueldən iki cavabsız qolla qalib ayrılan “Kadis” rəqibə ağır zərbə vurdu. “Malyorka”nı darmadağın edən “Almeriya” da vəziyyətini yaxşılaşdırdı. Adalıların darmadağının memarı het-trik edən braziliyalı Lazaro oldu.

Motivasiyasız “Barselona”nın qonağı olan “Real Sosyedad”a qələbə hava və su kimi vacib idi. Axı “Vilyarreal” isti nəfəsini hiss etdirir. Qonaqlar artıq 5-ci dəqiqədə hesabı açdı. Sörlot Kundeni arxada qoyub cərimə meydançasına qaçdı və Merinoya ötürmə verdi. O da topu Ter Ştegenin ayaqlarının arasından tora göndərdi. “Barsa” dərhal hesabı bərabərləşdirmək üçün irəli atıldı. Dembele və Levandovski fərqlənməyə yaxın idi. Fasilədən sonra kataloniyalılar təzyiqi azaltdı, basklar bundan yararlanıb 2-ci qolu da vurdu. Sonda hər iki komanda fərqlənə bilərdi. Ancaq bəxt Levandovskinin üzünə güldü. Düzdü, bu qolun yalnız bombardirlər yarışı baxımından əhəmiyyəti var.

“Real” maksimum 2-ci yer uğrunda mübarizə aparırsa, “Valensiya” hələ elitada yerini təmin etməyib. Bu üzdən “Mestalya”da meydan sahiblərinin qələbəyə can atması təbii idi. Madridlilər oyuna daha fəal başlasa da, yalnız hissənin son 15 dəqiqəsində təhlükəli vəziyyət yaratdılar. Onda da Benzema qapıçı ilə dueldən məğlub ayrıldı. “Yarasalar” cavab hücumunda hesabı açdı. Hissənin sonunda Kurtua Gerranın iki təhlükəli zərbəsinin qarşısını aldı. Fasilədən sonra isə artıq onun rəqib həmkarı Mamardaşvili xarüqələr yaratdı. Ançelotti hücumu canlandırdı, ardından əsas yarımmüdafiəçilərini – Modriç, Kroos və Valverdeni də meydana buraxdı. Gürcü qapıçı bir-birinin ardınca Rodriqonun, Vinisiusun, Valverdenin, Kroosun zərbələrinin qarşısını aldı. Hakim oyuna 10 dəqiqə artırsa da, komandalar 17 dəqiqə oynadı. Meydanda dava-dalaş düşdü, VAR-a baxılandan sonra Vinisius qovuldu, azlıqda da hücumları davam etdirən qonaqlardan Benzema təkbətəki boşa verdi. “Valensiya” dözdü və elitada qalmaq yolunda önəmli addım atdı.

ÇL-ə vəsiqə uğrunda mübarizə aparan “Vilyarreal” da Jironada hədsiz önəmli qələbə qazandı. Özü də Jerar Morenonun 4-cü uzatma dəqiqəsində vurduğu qolla! Evdə “Selta”nı məğlub edən “Atletik” sona üç tur qalmış Konfrans Liqasına vəsiqə verən 7-ci pilləyə yüksəldi.

“Atletiko” “Osasuna”nı asanlıqla darmadağın edib 2-ci pilləyə qalxdı. Düzdü, bu yer qlobal mənada heç nə qazandırmır. Ancaq “Real”ın “burnunu ovmaq” “hindular” üçün həmişə xoşdu.

Xose Bordalasın “Xetafe”də işləri heç də düz getmir. Madridlilər elitadan gedəcəyi çoxdan dəqiqləşən “Elçe” ilə oyunda qələbə qazana bilmədi. “Espanyol” ardıcıl 3-cü oyunda iki qol vurdu. Kataloniya derbisində və “Sevilya” ilə oyunda bu qollar heç-heçə üçün bəs etmədisə, “Rayo Valyekano”nu məğlub etmək mümkün oldu. Turun son oyunu isə Sevilya derbisi idi. Mövsümün sonunda əzəli və əbədi rəqiblər qol vurmağa həvəs göstərmədi. Bu nəticə “Sevilya”nın avrokubok ümidlərinə zərbə vurmaqla yanaşı, “Betis”in azacıq ÇL xəyallarının da üstündən xətt çəkdi.

35-ci tur
Barselona – Real Sosyedad 1:2
Levandovski, 90 – Merino, 5. Sörlot, 72. (88049)
Barselona: Ter Ştegen, Alba, Kristensen, Kunde (Alonso, 46), Balde, De Yonq, Buskets (Qarsiya, 84), Kessye (Torres, 63), Dembele (Torre, 86), Rafinya (Fati, 63), Levandovski.
Atletiko – Osasuna 3:0
Karrasko, 44. Saul, 62. Korrea, 82. (57012)
Atletiko: Qrbiç, Saul, Ermoso, Ximenes, Vitsel, Molina, Karrasko (Regilon, 85), Koke (Barrios, 84), De Paul (Kondoqbia, 85), Qrizmann (Marten, 90+1), Morata (Korrea, 46).
Valensiya – Real 1:0
Lopes, 33. (46002)
Real: Kurtua, Mendi (Karvaxal, 86), Rüdiger, Militao, Vaskes, Kamavinqa (Rodriqo, 46), Çuameni (Valverde, 86), Sebalyos (Kroos, 65), Vinisius, Asensio (Modriç, 65), Benzema.
Kadis – Valyadolid 2:0
Bonqonda, 70; 76-p. (18938)
Jirona – Vilyarreal 1:2
Lopes, 24 - Pino, 9. J.Moreno, 90+4. (11649)
Atletik – Selta 2:1
İ.Uilyams, 5. Berenger, 54 – Strand Larsen, 50. (40759)
Xetafe – Elçe 1:1
Munir, 8 – Boye, 45+1. (13927)
Almeriya – Malyorka 3:0
Lazaro, 12; 42; 58. (12791)
Rayo Valyekano – Espanyol 1:2
De Tomas, 22-p. – Darder, 23. Melamed, 59. (12142)
Sevilya – Betis 0:0
(41392)

1. Barselona 35 27 4 4 65-15 85
2. Atletiko 35 22 6 7 63-27 72
3. Real 35 22 5 8 70-33 71
4. Real Sosyedad 35 19 8 8 47-32 65
5. Vilyarreal 35 18 6 11 54-36 60
6. Betis 35 16 8 11 43-38 56
7. Atletik 35 14 8 13 46-39 50
8. Jirona 35 13 9 13 55-50 48
9. Sevilya 35 13 9 13 44-49 48
10. Osasuna 35 13 8 14 32-39 47
11. Rayo Valyekano 35 12 10 13 42-47 46
12. Malyorka 35 12 8 15 33-40 44
13. Valensiya 35 11 7 17 39-41 40
14. Almeriya 35 11 6 18 46-61 39
15. Selta 35 10 9 16 40-50 39
16. Kadis 35 9 11 15 28-50 38
17. Xetafe 35 8 11 16 31-44 35
18. Valyadolid 35 10 5 20 30-62 35
19. Espanyol 35 8 10 17 44-61 34
20. Elçe 35 4 8 23 27-65 20
Bombardirlər: Levandovski (Barselona) – 22, Benzema (Real) – 17, Xoselu (Espanyol) - 15, Ünal (Xetafe) – 14.

Növbəti turun oyunları mayın 23-25-i aralığında keçiriləcək: Real Sosyedad – Almeriya, Selta – Jirona, Valyadolid – Barselona, Vilyarreal – Kadis, Elçe – Sevilya, Espanyol – Atletiko, Betis – Xetafe, Osasuna – Atletik, Malyorka – Valensiya, Real – Rayo Valyekano.
Turun rəqəmi

32 – “Barselona” 32 illik fasiləsən sonra evdə “Real Sosyedad”a uduzdu. Sonuncu belə məğlubiyyət 1991-ci ilin mayında qeydə alınmışdı. Ümumiyyətlə, kataloniyalılar 2016-nın aprelindən bəri bu rəqibə uduzmurdu.

Turun ulduzu

Giorgi Mamardaşvili (Valensiya) – gürcü qolkiper, sadəcə, 5 seyvlə yadda qalmadı, “ölü” topların hamısını çıxardı. Bəli, onun komanda yoldaşları “Real”ın qapısına birdən artıq top vursaydı, biz indi “Almeriya”nın vingeri Lazaronu turun ən yaxşısı seçərdik. Ancaq məhz Mamardaşvili “yarasalar”ın qapısını toxunulmaz saxlamaqla qələbəyə əvəzsiz töhfə verdi.

Turun sitatı

Vinisius, “Real”ın yarımmüdafiəçisi: “İrqçilərin bu oyunla bağlı mükafatı mənim meydandan qovulmağım oldu. Bu futbol deyil, bu La Liqadı”.

Faktlar

* “Barselona” cari mövsümdə La Liqada ilk dəfə evdə uduzdu. Kataloniyalılar “Nou Kamp”da sonuncu dəfə ötən il mayın 22-də “Vilyarreal”la oyundan (0:2) məğlub ayrılmışdı.

* Vinisius karyerasında ilk dəfə birbaşa qırmızı vərəqə gördü. “Real”ın vingeri 2-ci hissəyə artırılan vaxtda “Valensiya”nın futbolçuları ilə münasişəyə qatıldı. Münaqişə Rüdigerin topu ona vermək istəməyən Musanı itələməsi ilə başladı. Vinisius bu zaman bir an əvvəl arxadan onun boğazını sıxan Duronun üzünə zərbə vurdu. Referi VAR-a baxandan sonra braziliyalıya əvvəl göstərdiyi sarı vərəqəni ləğv etdi və birbaşa “qırmızı” çıxardı.