La Liqada heç bir oyun nəhənglər üçün asan keçmir.

"Football-plus.az" xəbər verir ki, “Real” və “Barselona” iki top fərqi ilə qələbə qazandı, bununla belə, bir saatdan sonra heç biri oyunun taleyini həll edə bilməmişdi. “Atletiko” və “Real Sosyedad” isə qələbəyə həsrət qaldı. Ötən mövsüm elitada yerini çətinliklə qoruyan “Valensiya”nın liderliyə şərik olması da maraqlı məqamdı.

“Kadis”lə oyun ərəfəsində “Barselona”nın çoxlu itkisi var idi. Söhbət Arauxo və Rafinya ilə yanaşı, cəzalı Xavidən də gedir. Ancaq kataloniyalılar onlarsız da favorit sayılırdı. Bu oyun nəhəng “Nou Kamp”da keçirilməsə də, hər kəs “Barsa”dan qələbə gözləyirdi. “Kadis”in oyunla bağlı planı ilk yarıda ideal işlədi. Rəqibin bir neçə təhlükəli vəziyyət yaratmasına imkan verən qonaqlar bir dəfə yaxşı əks-hücum da qurdular. Qolsuzluq “Barsa”nın oyunçularının əsəblərini sıradan çıxarırdı. Kataloniyalılar fasilədən sonra təzyiqi bir qədər də artırdı. Və “Kadis”in qapısı önündə daha tez-tez təhlükəli vəziyyətlər yaranmağa başladı. Ancaq qonaqlar dözürdülər. Qapıçı Ledesma isə fantastik səviyyədə oynayırdı. Sadəcə, istənilən müdafiə xətti gec-tez yarılmağa məhkumdu. “Kadis” də istisna deyil. Əsas vaxtın sonuna az qalmış Gündoğan gözəl ötürmə ilə rəqib müdafiəsini işsiz qoydu, Pedri isə hücumu dəqiq zərbə ilə bitirdi. Uzatma dəqiqələrində Torres 2-ci qolu da qonaqların qapısından keçirdi. Kataloniyalılar istədiyinə nail oldu. Ötən turdan fərqli bu dəfə artıq nəticə var.

“Almeriya” ilə oyun “Real”ın təsəvvür etdiyi kimi başlamadı. 3-cü dəqiqədə qol buraxırsansa, nəyisə dəyişmək lazımdı. Madridlilər taktiki baxımdam heç nəyi dəyişmədi, sadəcə, təzyiqi artıraraq elə ilk yarıda Bellingemin sayəsində hesabı bərabərləşdirdilər. Bundan sonra “Real” bir qədər sakitləşdi. “Almeriya”nın heyətində daha səviyyəli oyunçular olsaydı, Luninin qoruduğu qapıya yol tapmaq mümkün idi. “Real” hələ fasiləyə qədər irəli çıxdı, ancaq Kroosun vurduğu qol buna qədər Karvaxalın yol verdiyi kobudluğa görə qeydə alınmadı. Fasilə isə meydan sahiblərinin xeyrinə işləmədi. Onlar meydana bir qədər ruhdan düşmüş halda döndülər. Daha səviyyəli oyunçulara malik “Real” isə belə davranışı bağışlamır. Saatın tamamında Kroosdan ötürmə alan Bellingem madridliləri irəli çıxardı. 13 dəqiqə sonra isə Vinisiusa assistentlik etdi. Hər iki məşqçi 5 dəyişiklik etdi, ancaq meydan sahibləri bundan hansısa fayda götürmədi. “Real” 4-cü, hətta 5-ci qolu vurmağa daha yaxın idi, nəinki “Almeriya” fərqi azaltmağa. Heç bir gözlənilməzlik yoxdu: “ağ şimşəklər” turnir cədvəlinin önündə qərarlaşıb, Visente Morenonun komandası izə zirzəmidədi.

Turun mərkəzi oyununda azarkeşlər qol görmədi. “Betis” – “Atletiko” oyunu ümidləri doğrultmadı. Komandalar ehtiyatlı oynayır, səhv etməkdən çəkinirdilər ki, qolsuz heç-heçəni tam məntiqəuyğun nəticə saymaq olar. İlk yarıda “Betis” üstün idi. Meydan sahibləri daha təhlükəli hücumlar qururdular. Abner, Peres, İsko hesabı aça bilərdi. Amma fasilədən sonra “hindular” canlandı. 2-ci hissə onların hücumları ilə başladı. Qonaqların çoxsaylı künc zərbələrinin birində Ermoso az qala hesabı açacaqdı. Qapıçı Ruy Silva “Betis”i real qoldan xilas etdi. 2-ci hissənin ikinci yarısında isə meydanda maraqlı heç nə baş vermədi. Oyun yavaş-yavaş qolsuz sona yaxınlaşırdı və komandalardan heç biri bunun əleyhinə deyildi. Hər halda, həm “Betis”, həm də “Atletiko” liderlər qrupunda qalır.

İspaniyanın ÇL-dəki daha bir təmsilçisi – “Real Sosyedad” da qələbə qazana bilmədi. Minqesanın 4-cü uzatma dəqiqəsindəki dəqiq zərbəsi San-Sebastyan klubunun xal itirməsinə səbəb oldu. Həm “Real Sosyedad”, həm də “Selta” mövsümə uğursuz başladığından, bu dəfə meydana qələbə üçün çıxmışdılar. Meydan sahibləri 22-ci dəqiqədə Barreneçea ilə hesabı açdı. Amma uzatma dəqiqələrində Remiro Aspasın cərimə zərbəsini dəf etsə də, Minqesa təkrar zərbə ilə topu qapıya göndərdi.

Turun qalan oyunlarına gəlincə, “Valensiya” və “Vilyarreal” minimal, “Atletik” inamlı qələbə qazandı, ötən tur “Real Sosyedad”dan xal alan “Jirona” bu dəfə “Xetafe”ni darmadağın etdi. Dünən axşam keçirilən son iki oyunda “Alaves” və “Rayo Valyekano” sevindi.

2-ci tur
Barselona – Kadis 2:0
Pedri, 82. Torres, 90+4. (39603)
Barselona: Ter Ştegen, Balde (Fati, 69), De Yonq, Kristensen (Qarsiya, 79), Kunde, Pedri, Romeu (Roberto, 79), Qavi (Abde, 68), Gündoğan, Yamal (Torres, 85), Levandovski.
Almeriya – Real 1:3
Arribas, 3 – Bellingem, 19; 60. Vinisius, 73. (17561)
Real: Lunin, Qarsiya, Alaba, Rüdiger, Karvaxal, Kroos (Modriç, 71), Çuameni, Valverde (Vaskes, 90), Bellingem (Xoselu, 81), Vinisius (Dias, 90), Rodriqo (Kamavinqa, 71).
Betis – Atletiko 0:0
(51782)
Atletiko: Oblak, Karrasko (Lino, 64), Ermoso, Vitsel, Saviç, Aspilikueta, Lemar (Morata, 64), De Paul (Rikelme, 79), Lyorente (Barrios, 46), Depay (Saul, 64), Qrizmann.
Real Sosyedad – Selta 1:1
Barreneçea, 22 – Minqesa, 90+4. (30354)
Real Sosyedad: Remiro, Munyos, Le Norman, Subeldiya, Traore (Sola, 78), Mendes, Subimendi, Turryentes (Paçeko, 79), Barreneçea (Oyarsabal, 64), Fernandes (Sadik, 64), Kubo (Şo, 79).
Valensiya – Las-Palmas 1:0
Pepelu, 74-p. (41503)
Malyorka – Vilyarreal 0:1
J.Moreno, 62. (17775)
Osasuna – Atletik 0:2
İ.Uilyams, 11. Quruseta, 20. (20704)
Jirona – Xetafe 3:0
Errera, 12. Stuani, 55; 65. (11784)
Alaves – Sevilya 4:3
Rioxa, 7. Duarte, 44. K.Qarsiya, 54; 59 – Abkar, 15-öz qapısına. Lamela, 41. Mir, 90+7. (15308)
Qranada – Rayo Valyekano 0:2
A.Qarsiya, 75. Siss, 79. (17338)
1. Real 2 2 0 0 5-1 6
2. Rayo Valyekano 2 2 0 0 4-0 6
3. Valensiya 2 2 0 0 3-1 6
4. Jirona 2 1 1 0 4-1 4
5. Atletiko 2 1 1 0 3-1 4
6. Barselona 2 1 1 0 2-0 4
7. Betis 2 1 1 0 2-1 4
8. Alaves 2 1 0 1 4-4 3
9. Osasuna 2 1 0 1 2-2 3
10. Atletik 2 1 0 1 2-2 3
11. Vilyarreal 2 1 0 1 2-2 3
12. Kadis 2 1 0 1 1-2 3
13. Real Sosyedad 2 0 2 0 2-2 2
14. Malyorka 2 0 1 1 1-2 1
15. Las-Palmas 2 0 1 1 1-2 1
16. Selta 2 0 1 1 1-3 1
17. Xetafe 2 0 1 1 0-3 1
18. Sevilya 2 0 0 2 4-6 0
19. Almeriya 2 0 0 2 1-5 0
20. Qranada 2 0 0 2 1-5 0
Bombardirlər: Bellingem (Real) – 3, Stuani (Jirona), K.Qarsiya (Alaves) – 2.

Növbəti turun oyunları avqustun 25-28-i aralığında keçiriləcək: Las-Palmas – Real Sosyedad, Selta – Real, Kadis – Almeriya, Qranada – Malyorka, Sevilya – Jirona, Vilyarreal – Barselona, Valensiya – Osasuna, Atletik – Betis, Xetafe – Alaves, Rayo Valyekano – Atletiko.

Turun rəqəmi
4 – Levandovskinin qolsuz oyunlar seriyası bu həddə çatdı. O, buna qədər “Malyorka” (28 may), “Selta” (4 iyun) və “Xetafe” (13 avqust) ilə oyunlarda da fərqlənə bilməmişdi. Robert sonuncu dəfə mayın 23-də “Valyadolid”in qapısına yol tapıb. 4 qolsuz oyun Levandovskinin “Barsa”dakı ən uğursuz seriyasının təkrarıdı. Apreldə də belə seriyası var idi.

Turun ulduzu
Cud Bellingem (Real) – Mbappe madridlilərin nəyinə lazımdı?! İngiltərəli hesabat turunda “qol+ötürmə” sistemi üzrə 3 xal topladı, faktiki təkbaşına komandasına əzmkar qələbə qazandırdı. Belə davam etsə, bombardirlər yarışının da içində olacaq.

Turun sitatı
Cud Bellingem, “Rea”ın yarımmüdafiəçisi: “Düşünürən ki, ötən mövsümlə müqayisədə on dəfə yaxşı oyunçuyam. “Real”da çox rahatam və hər gün nələrsə öyrənirəm. Burda səviyyə çox yüksəkdi, süngər kimi bacardıqca canıma çəkirəm”.

Fakt
Bellingem Kriştiano Ronaldonun rekordunu təkrarladı. “Real”ın yarımmüdafiəçisi La Liqadakı ilk iki oyununda fərqlənib. Sonuncu dəfə bunu portuqaliyalı 2009-cu ildə bacarmışdı. Özü də Kriştiano ardıcıl 4 oyunda fərqlənmişdi.

Oyundan sonra
Xavi Ernandes, “Barselona”nın baş məşqçisi: “Qolları daha tez vurmalıydıq. Effektlilik bizə aid kəlmə deyil. Bu üzdən Gündoğanı transfer etmişik ki, sonuncu ötürmə ilə həlledici rol oynasın. Bizdə effektlilik və səbr çatmırdı. Ancaq düşünürəm ki, oyunumuz yaxşı alındı”.

Karlo Ançelotti, “Real”ın baş məşqçisi: “Almeriya” ideal əks-hücumlar qurmaqla bizi təəccübləndirdi. Onlar hesabı açlalar da, başımızı itirmədik, tədricən oyuna qoşulduq. Hücumda hərəkətliydik ki, bu də rəqibi özündən çıxarır. Vinisius, Rodriqo, Bellingem, cinah müdafiəçiləri... Düşünürəm ki, hücumda çoxlu variantımız var. Vinisius üçün qol sayına görə çərçivə müəyyənləşdirməmişəm. Onun mobilliyi təhlükəli vəziyyətlər yaratmaq baxımından bizim üçün faydalıdı. Dahiliyinə xələl gətirmək istəmirəm, ancaq bəzən hədsiz çox risk etməklə məni acıqlandırır”.