Bundesliqada mövsümə adəti üzrə son çempionun oyunu ilə start verildi.

Bu ənənə artıq 23-cü mövsümdü davam edir. Maraq üçün bildirək ki, bu 23 mövsümün heç birində açılış oyununda son çempionlar uduzmayıb (18 qələbə, 5 heç-heçə)! Gözlənildiyi kimi, “Bayer-04” üçün Münhenqladbax səfəri asan gəzinti olmadı. Ötən mövsüm bundesliqada Xabi Alonsonun komandasından qol buraxmayan yeganə rəqib məhz “Borussiya” olmuşdu. Düzdü, bu hadisə Leverkuzendə baş vermişdi (0:0). Son çempion ilk yarını Caka və Virtsin qolları ilə iki topluq üstünlüklə tamamladı. “Borussiya” fasilədən sonra geridönüş etsə də, son dəqiqə qollarının kralı olan “Bayer-04” qələbəni qopara bildi. Əsas vaxta əlavə olunan 11-ci dəqiqədə Virtsin penalti zərbəsini qapıçı dəf etsə də, istedadlı futbolçu dönən topu boş qapıya göndərdi. “Aspirinlər”in ölkədaxili turnirlərdə məğlubiyyətsiz seriyası 42 oyuna çatdı (35 qələbə, 7 heç-heçə). Onu da bildirək ki, “Bayer-04” Alonsonun dönəmində rəsmi oyunlarda 80-ci dəqiqədən sonra vurduğu qolların sayını 41-ə çatdırdı!

Şənbə gününün oyunları meydan sahibləri üçün uğurlu alındı. Ötən mövsümün vitse-çempionu “Ştutqart”ın yeni mövsümə məğlubiyyətlə başlaması diqqəti çəkdi. Şvabiyalılar Frayburq səfərində hesabı açsalar da, sonradan 3 top buraxdılar. “Hoffenhaym” debütant “Holştayn”ı evə əliboş yola saldı. Yeni transfer Nusa “Bohum”la ev oyununda “Leyptsiq”in qəhrəmanına çevrildi 19 yaşlı norveçli vinger meydana çıxandan cəmi 4 dəqiqə sonra qələbə qolunun müəllifi oldu. “Verder” Auqsburqdan, “Union” isə Mayntsdan xalla qayıtmağı bacardı. Günün son oyunu Dortmundda keçirildi. Nuri Şahin bundesliqadakı debüt matçında özünü yaxşı tərəfdən göstərməyi bacardı. Çünki onun əvəzetmələri özünü doğrultdu. İkinci hissədə meydana çıxanlardan biri olan Bayno-Gittensin dublu sayəsində “arılar” mövsümə 3 xalla start verdi. Maraqlıdı ki, gənc ingiltərəli vinger ötən mövsüm bundesliqada cəmi 1 qol vurmuşdu. Yeri gəlmişkən, “Borussiya” ardıcıl 10-cu dəfə ilk turu qələbə ilə tamamladı ki, bu da turnirin tarixinin yeni rekordudu.

Tura bazar günü iki qarşılaşma ilə yekun vuruldu. Debütant “Sankt Pauli” evdə “Haydenhaym”a uduzmaqla mövsümə uğursuz başladı. Xatırladaq ki, “Haydenhaym” elitada cəmi 2-ci mövsümünü keçirməsinə baxmayaraq, Almaniyanı avrokuboklarda təmsil edir. Vensan Kompaninin “Bavariya”nın başında bundesliqadakı debütü Volfsburqda reallaşdı. Münhen nəhəngi fasiləyə öndə yollansa da, 2-ci yarının əvvəllərində iki top buraxmaqla “soyuq duş” yaşadı. Amma qonaqlar xarakter nümayiş etdirərək vəziyyəti öz xeyrinə dəyişdi. Qələbə qolunu Qnabri hesabına yazdı. “Volfsburq”un “Bavariya” üçün uğurlu rəqib olması növbəti dəfə təsdiqini tapdı. Belə ki, münhenlilər bu rəqibə qarşı bundesliqada ardıcıl 19-cu oyunda uduzmadılar (17 qələbə, 2 heç-heçə). “Rekordmaytser” həm də yeni mövsümə növbəti rekordla başlamış oldu. Belə ki, komanda ardıcıl 13-cü mövsümün ilk turunda uduzmadı (11 qələbə, 2 heç-heçə). Daha öncə heç kimin belə seriyası olmayıb.

1-ci tur
Volfsburq – Bavariya 2:3
Mayer, 47-p.; 55 – Musiala, 19. Kaminski, 65-öz qapısına. Qnabri, 82. (28917)
Bavariya: Noyer, Boe (Müller, 65), Kim Min Çje (Dayer, 81), Upamekano, Devis, Kimmix, Pavloviç, Olise (Koman, 75), Musiala, Qnabri, Keyn.
Borussiya D – Ayntraxt F 2:0
Bayno-Gittens, 72; 90+3. (81365)
Borussiya: Kobel, Ryuyerson, Anton, Zyule, Şlotterbek, Malen (Bayer, 59), Qross, Əmrə Can (Reyna, 81), Zabitser (Nmeça, 81), Brandt (Bensebayni, 85), Adeyemi (Bayno-Gittens, 59).
Borussiya M – Bayеr-04 2:3
Elvedi, 59. Klayndinst, 85 – Caka, 12. Virts, 38; 90+11. (54042)
Bayer-04: Qradetski, Frimponq, Tapsoba, Ta, İnkapye, Qrimaldo, Caka, Andrix (Qarsiya, 82), Hofmann (Terye, 65), Virts, Bonifeys (Adli, 82).
Lеyptsiq – Bohum 1:0
Nusa, 59. (44611)
Leyptsiq: Qulaçi, Simakan (Henrixs, 55), Orban, Lukeba, Raum, Kampl, Zayvald (Nusa, 55), Aydara (Klostermann, 75), Simons, Openda (Baumqartner, 86), Şeşko (Poulsen, 75).
Frayburq – Ştutqart 3:1
Kübler, 26; 61. Doan, 54 – Demiroviç, 2. (34700)
Ştutqart: Nübel, Ştensel (Çeys, 65), Ştiller, Şabo, Kratsiq (Mittelştadt, 57), Miyo, Karazor (Dil, 65), Levelinq, Dəniz Undav (Rider, 65), Fürix (Voltemade, 81), Demiroviç.
Hoffеnhaym – Holştayn 3:2
Kramariç, 6-p.; 37; 87 – Bernhardsson, 63. Maçino, 89. (18503)
Hoffenhaym: Baumann, Kaderjabek, Dreksler, Stax, Akpoquma, Prass (Nsoki, 89), Prömel, Qrillitş (Qayqer, 69), Hlojek (Berişa, 59), Bülter (Larsen, 59), Kramariç (Moerştedt, 90).

Auqsburq – Verder 2:2
Recbeçay, 16. Essende, 35 – Aqu, 12. Njinma, 58. (30660)
Maynts-05 – Union 1:1
Əmiri, 53 – Beneş, 74. (31500)
Sankt Pauli – Haydenhaym 0:2
Vanner, 66. Şöppner, 82. (29157)
Bombardir: Kramariç (Hoffenhaym) – 3.
Növbəti turun oyunları avqustun 30-u – sentyabrın 1-i aralığında keçiriləcək: Union – Sankt Pauli, Holştayn – Volfsburq, Bayеr-04 – Lеyptsiq, Bohum – Borussiya M, Ayntraxt F – Hoffеnhaym, Ştutqart – Maynts-05, Verder – Borussiya D, Haydenhaym – Auqsburq, Bavariya – Frayburq.

Turun rəqəmi
474 – Tomas Müller üçün bu tur statistik baxımdan əlamətdar oldu. O, 474-cü oyununu keçirməklə əfsanəvi Zepp Mayeri geridə qoydu və “Bavariya” tarixində bundesliqada ən çox oyun keçirən futbolçuya çevrildi! Bundan başqa, Müller Münhen nəhənginin heyətində rəsmi oyunların sayına (709) görə rekordçu olan Mayerə çatdı. Maraq üçün bildirək ki, bundesliqa tarixində ən çox oyun keçirən futbolçu Karl-Haynts Körbeldi. Hazırda 69 yaşı olan Körbel turnirdə 602 oyuna çıxıb və bunların hamısını Frankfurt “Ayntraxt”ının heyətində keçirib.

Turun ulduzu
Andrey Kramariç (Hoffenhaym) – təcrübəli forvardı artıq əminliklə “Hoffenhaym”ın əfsanəsi saymaq olar. Klub tarixinin açıq-ara fərqlə ən məhsuldar oyunçusu statusunda olan 33 yaşlı futbolçu ötən mövsümün son turunda “Bavariya” ilə oyunda het-trik etmişdi. O, yeni mövsümə də het-triklə start verdi. Kramariç bundesliqa artıq 2-ci dəfə ilk turda het-trik etməyi bacardı. Xorvatiyalı daha öncə 2020/21-in startında “Köln”lə səfər oyununda da bu uğuru yaşamışdı. Turnirin tarixində iki fərqli mövsümün ilk turunda ən azı 3 qol vurmağı daha öncə yalnız iki futbolçu – Herd Müller ilə Klaus Fişer bacarmışdı. Yeri gəlmişkən, ötən mövsümü də nəzərə alsaq, Kramariç ardıcıl 8-ci turda ya məhsuldar ötürmə verir, ya da qol vurur. “Hoffenhaym”da daha öncə heç kimdə belə seriya olmamışdı.

Turun sitatı
Vensan Kompani, “Bavariya”nın baş məşqçisi: