Osimhen Neapoldan hara gedəcək?
Viktor Osimhen İtaliya çempionatının ilk turunun “Verona” ilə oyununda meydanda görünmədi. Yerli mənbələr onun Neapolu tezliklə tərk edəcəyi haqda növbəti xəbər yayıb.
Sual olunur: bəs nigeriyalı hücumçu hara gedəcək? “Napoli”nin idman direktoru Covanni Manna Viktorun mümkün gedişi ilə bağlı yayılan məlumatlara münasibət bildirib. O, 25 yaşlı futbolçunu komandada saxlamaq niyyətində olduqlarını, lakin onunla hələlik bu barədə razılıq əldə etmədiklərini deyib:
“Viktor yüksək keyfiyyətlərə malik vacib oyunçudu və onun istəyi başa düşüləndi. Biz komandanın bütövlüyünü qorumaq istəyirdik. Gəlin görək yaxın günlərdə nələr baş verəcək. Bu gün sensasiyalı məlumat vermək düzgün deyil. Osimhenin daha iki mövsümlük müqaviləsi var. Avqustun 30-na qədər həll tapılmasa, onunla danışacağıq”.
Osimhen “Napoli”də 2020-ci ildən çıxış edir. Xatırladaq ki, bu yay beynəlxalq mətbuatda “Çelsi”nin onun transferində maraqlı olduğu və nigeriyalı hücumçunun alınması üçün Romelu Lukakunu da müqaviləyə daxil etməyə hazır olduğu barədə xəbərlər yayılmışdı.
