Məlum olduğu kimi ''Qalatasaray'' sabah Çempionlar Liqasında təsnifat mərhələsinin pley-offunun ilk oyununda ''Yanq Boyz''un qonağı olacaq.

Matçın hakimi bəllidi. Türkiyə çempionu ilə İsveçrə çempionu arasındakı ilk qarşılaşmanı almaniyalı Daniel Zibert idarə edəcək. Ümumilikdə bu hakimi Türkiyə təmsilçiləri üçün uğurlu saymaq olar. 90 dəqiqəlik mübarizədə klub və yığma səviyyəsində Türkiyə təmsilçiləri Zibertin idarə etdiyi 6 oyunun heç birində uduzmayıb (4 qələbə, 2 heç-heçə). Yeganə uğursuzluq penaltilər seriyasında qeydə alınıb. 2020-nin sentyabrında ''Beşiktaş''ın Avropa Liqasının 3-cü təsnifat mərhələsində evdə ''Riu Ave''yə penaltilər seriyasında uduzduğu matçı (1:1) Zibert idarə etmişdi.

''Qalatasaray''ın İsveçrəyə itkilərlə yollandığını bildirək. Əsas futbolçulardan Kaan Ayhan cəza, Davinson Sançes isə zədə üzündən oyunu buraxacaq. Bu arada zəhərləndiyi üçün özünü yaxşı hiss etməyən Barış Alpər Yılmazın da düşərgədə yer alması planlaşdırılmırdı. Amma klub həkimlərinin müdaxiləsindən sonra bu futbolçunun durumu normallaşıb. Həm də Barış özü də bu çətin səfər öncəsi komandanı yalqız qoymaq istəmədi. Bu üzdən son anda onun da adı İsveçrəyə aparılan futbolçular arasına salınıb. Amma Türkiyə yığmasının üzvünün meydana çıxıb-çıxmayacağı bilinmir. Onu da vurğulayaq ki, baş məşqçi Okan Buruk cəzalı olduğu üçün hər iki oyunda tribunada yer alacaq.

ƏLİ