Məlum olduğu kimi, Türkiyə yığması sabah DÇ-2022-nin pley-offu çərçivəsində səfərdə Portuqaliyaya qarşı matça çıxacaq. Bu önəmli oyunun hakimi artıq bəllidi. ''Draqau''da keçiriləcək qarşılaşmanı almaniyalı Daniel Zibert idarə edəcək. 37 yaşlı hakim indiyə qədər klub və yığma səviyyəsində dəfələrlə türklərin oyununa təyinat alıb. UEFA Hakimlər Komitəsinin prezidenti Roberto Rozettinin ən çox dəyər verdiyi hakimlərin başında gələn və Feliks Brıxın beynəlxalq karyerasını başa vurmasından sonra Almaniyanın bir nömrəli ədalət təmsilçisinə çevrilən 38 yaşlı Zibert 2015-ci ildən FİFA hakimidi. Maraqlıdı ki, onun ilk beynəlxalq oyunu məhz elə Portuqaliya - Türkiyə matçı olub. Amma söhbət əsas yığmalardan yox U-19-dan gedir. 2015-in mayında AÇ-nin seçmə mərhələsi çərçivəsində Gürcüstanda keçirilən həmin görüşdə Portuqaliya 6:1 hesabı ilə üstün olmuşdu. Daha bir diqqəti çəkən məqam odu ki, Türkiyənin son oyununu da məhz Zibert idarə edib. ''Ay-ulduzlular''ın ötən ilin noyabrında seçmə mərhələdə səfərdə Monteneqronu 2:1 hesabıyla yendiyi oyunu nəzərdə tuturuq. Bir hakimin bir yığmanın ardıcıl iki oyununa təyinat alması nadir görünən hadisə olsa da, UEFA nədənsə məhz belə qərar verib. Türkiyənin 2016-da yoldaşlıq oyununda Monteneqronu minimal hesabla yendiyi matçda da fit sahibi Zibert olmuşdu. Klub səviyyəsində isə o, Türkiyə təmsilçilərinin 3 oyununa təyinat alıb. Onun idarə etdiyi oyunda 2017/18-in qrup mərhələsində ''Konyaspor'' səfərdə ''Gimaraynş''la 1:1 bərabərə qalıbsa, ''Trabzonspor'' 2019/20-də AL-in təsnifat mərhələsinin pley-offunda səfərdə AEK-i 3:1 hesabı ilə yenib. Amma bu hakim ''Beşiktaş''a düşərli olmamışdı. İstanbul nəhəngi 2020/21-də AL-in 3-cü təsnifat mərhələsində evdə ''Riu Ave'' ilə 1:1 bərabərə qalandan sonra penalti seriyasında uduzmaqla mübarizəni dayandırmışdı.