Çempionlar Liqasında qrupunu 3-cü pillədə tamamlayaraq mübarizəni Avropa Liqasında davam etdirməli olan “Qalatasaray” bu turnirin pley-offunun ilk oyunu çərçivəsində Çexiya çempionu “Sparta”nı qəbul edəcək.

Avrokuboklarda keçirdiyi son 24 qarşılaşmanın yalnız 4-də uduzan (11 qələbə, 9 heç-heçə) İstanbul nəhəngi daha öncə bu rəqiblə 4 dəfə qarşılaşıb. Bu komandaların yolu ilk dəfə 1995/96-da UEFA kubokunun təsnifat mərhələsində kəsişib. O vaxt “Sparta” evdəki 3:1-lik qələbənin ardından İstanbulda 1:1 oynayaraq mərhələ adlamışdı. Növbəti duel 1997/98-də ÇL-in qrup mərhələsinə təsadüf edib. Həmin vaxt Praqada meydan sahibləri 3:0, İstanbulda isə “Qalatasaray” 2:0 üstün olmuşdu. “Cim-Bom” həmin vaxt Dortmund “Borussiya”sı və “Parma”nın da yer aldığı qrupu sonuncu pillədə başa vurmuşdu. “Sparta” isə 3-cü yeri tutaraq mübarizəni UEFA kubokunda davam etdirmişdi. Maraqlıdı ki, hazırda “Qalatasaray”ı çalışdıran Okan Buruk “Sparta”ya qarşı həmin 4 oyunun hamısında iştirak ərizəsində yer almışdı. O, 1995/96-da ilk oyunda 7, ikinci oyunda 2 dəqiqə oynamaq şansı qazanmışdısa, 1997/98-dəki hər iki matçı ehtiyat oyunçular skamyasında keçirmişdi. “Qalatasaray”ın indiyə qədər Çexiya klublarına qarşı keçirdiyi 8 qarşılaşmadan 3 qələbə, 2 heç-heçə, 3 məğlubiyyətlə ayrıldığını bildirək. “Sarı-qırmızılar” bu ölkə təmsilçilərindən “Sparta”dan başqa “Banik” və “Mlada Boleslav”la da üz-üzə gəlib. “Sparta” isə indiyə qədər Türkiyə təmsilçiləri ilə keçirdiyi 14 oyundan 6 qələbə, 2 heç-heçə, 6 məğlubiyyətlə ayrılıb.

Yeri gəlmişkən, bugünkü matçı ispaniyalı Alexandro Ernandes idarə edəcək. Bu ədalət təmsilçisi ilə bağlı ən diqqətçəkən fakt onun Türkiyə təmsilçiləri üçün düşərsiz olmasıdı. Məsələn, məhz Ernandesin idarəçiliyində 2019-un noyabrında AL-in qrupunda “Beşiktaş” evdə “Braqa”ya (1:2), 2021-in iyulunda ÇL-in 2-ci təsnifat mərhələsində “Qalatasaray” səfərdə PSV-yə (1:5) və həmin ilin sentyabrında AL-in qrupunda “Fənərbaxça” evdə “Olimpiakos”a (0:3) boyun əyib. Amma yığma səviyyəsində durum bir qədər fərqlidi. 2021-in martında İspaniyanın Malaqa şəhərində DÇ-2022-nin seçmə mərhələsi çərçivəsində Türkiyənin Norveçi 3:0 darmadağın etdiyi qarşılaşmanı da bu hakim idarə etmişdi.