34 sarı, 1 qırmızı vərəqə - heç də bəyəniləsi hal deyil.

22-ci turun oyunlarından yalnız birinin (Qarabağ – Sabah) səliqəli keçdiyini deyə bilərik. Qalan hər oyunun hər birində minimum 6 vərəqə var idi. İdarəçiliklə bağlı konkret detallara gəlincə, yalnız “Kəpəz” kəskin şəkildə narazılıq etdi.

Kəpəz – Səbail, NİCAT İSMAYILLI
Bu oyunun “Kəpəz”in böyükhesablı məğlubiyyətiylə bitdiyini bilirsiz. Hər iki komandanın hücuma üstünlük verməsinin, amma meydan sahiblərinin qeyri-dəqiq, qonaqların dəqiq zərbələr endirməsinin nəticəsi belə oldu. Oyunboyu hədsiz çox qayda pozuntusu qeydə alındı. Bir oyunda 12 sarı, 1 qırmızı vərəqənin göstərilməsini anlamaq çətindi. Matçın kulminasiya nöqtəsinə gəlincə, “Kəpəz”in qapısına təyin edilən penaltini göstərmək olar. Gəncəlilər qərarla razılaşmaq istəmədi və etirazlar üzündən əlavə cəzalar aldı. Hətta bu siyahıda baş məşqçi Adil Şükürov da oldu ki, o, penalti qərarından yox, həmin epizoddan öncə yaşananların izlənməməsindən narazı idi. Mütəxəssisin iddiasına görə, rəqib futbolçunun Amil Yunanova qarşı kobudluğu gözdən qaçıb. Üstəlik klub hadisəylə bağlı etiraz bəyanatı da yaydı. Belə ciddi narazılıq varsa, təbii ki, idarəçiliyin səviyyəsini yüksək qiymətləndirə bilmərik.

Turan Tovuz – Qəbələ, RAUF ALLAHVERDİYEV
Öyrəşdiyimiz hal olsa da vurğulamaqda fayda var ki, Tovuzun yaşıl meydanında nə rəqib komanda, nə də hakim özünü rahat hiss edir. O mənada ki, çoxsaylı azarkeşlərin təzyiqi işi tam məsuliyyətlə görməkdən başqa çarə buraxmır! İnsaf naminə, rəqiblərin ciddi qayda pozuntusuna yol vermədiyini qeyd edək. Belədə Allahverdiyevin işi xeyli asanlaşdı. Daha dəqiqi, dəyərləndirilməsi asan epizodlar izlədik ki, sarı vərəqə göstərmək üçün çox düşünməyə ehtiyac yox idi. Hakim haqda şikayətə də rast gəlmədik. Halbuki “Turan Tovuz” ara-sıra məhz bu mövzuyla gündəmə gəlir. Rauf bəyin idarəçiliyini həm azarkeşlər, həm də komandalar qənaətbəxş saydı.

Qarabağ – Sabah, RƏVAN HƏMZƏZADƏ
Turun açılış oyununda eyni komandalar son on gündə 3-cü dəfə üz-üzə gəlirdi. İdarəçiliklə bağlı hansısa problem yaşanmadı. Onsuz da “Qarabağ”ın matçlarında kəskin narazılıq hallarına, demək olar ki, rast gəlinmir. Sadəcə, bəzi epizodlarda İqor Ponomaryovun hakimə kəskin etirazlarının şahidi olduq. Amma baş hakimin verdiyi qərarlar doğru idi. Qurban Qurbanov isə həmişəki kimi təmkinli, verilən qərarlara soyuqqanlı yanaşdı. Yalnız bir epizod diqqətimizi çəkdi. 74-cü dəqiqədə “Sabah”ın vurduğu qol ofsayd qərarı ilə ləğv olundu. Amma videotəkrarda Amin Seydiyevin ötürməsindən sonra Kahim Parrisin ofsaydda olub-olmadığını seçmək çətindi. Yəqin ki, “Sabah”ın məşqçilər heyəti epizoda baxıb və hakimin qərarı ilə razılaşıb. Çünki oyunsonrası mətbuat konfransında heç bir tərəfin çalışdırıcısı idarəçiliklə bağlı şikayət etmədi.

Araz-Naxçıvan – Neftçi, RƏŞAD ƏHMƏDOV
Bu qarşılaşmada hakim idarəçiliyi ilə bağlı uzun-uzadı danışmaq lazım deyil. Oyunsonrası mətbuat konfransında da narazılıq eşitmədik. Lakin oyun zamanı Azər Bağırov hakimin bəzi qərarlarına görə kəskin etirazını bildirirdi. Bunu da mütəxəssisin hiss-həyəcanına bağlaya bilərik. Hətta Rəşad Əhmədov onu sakitləşdirmək üçün yaxınlaşdı və hər şeyi nəzarətdə saxladığını bildirdi. Vərəqələrin və sondakı penalti qərarının da doğru olduğunu düşünürük. Ümumilikdə hakim idarəçiliyinin normal olduğunu deyə bilərik.

Zirə – Sumqayıt, TURAL QURBANOV
Turun mərkəzi oyununda gərgin mübarizənin şahidi olduq. 9-cu dəqiqədə baş hakim meydan sahiblərinin qapısına 11 metrlik cərimə zərbəsi təyin etdi. O, VAR-ın köməyinə ehtiyac duymadan qərar verdi. Lakin hər ehtimala VAR-la məsləhətləşən referi qərarında qaldı. Videotəkrarda topun açıq-aşkar Ruan Renatonun əlinə dəydiyinin şahidi olduq. 13-cü dəqiqədə qonaqlar Elvin Bədəlovla hesabı açdı. Amma Qurbanov oyundankənar vəziyyət qeydə alaraq qolu ləğv etdi. Həqiqətən də “Sumqayıt”ın kapitanı rəqiblərindən öndə idi. İlk hissənin sonlarında daha bir penaltinin şahidi olduq. 41-ci dəqiqədə Rəhim Sadıxovun zərbəsindən sonra top Murad Xaçayevin əlinə dəydi. 2-c hissədə elə bir mübahisəli vəziyyət yaşanmadı. Baş hakim matçı ideal səviyyədə keçirdi. Onun mövqe seçimləri və qərarları doğru idi.