“Araz-Naxçıvan” – “Qarabağ” oyununda qonaqların “ərköyün” müdafiəçisi Elvin Cəfərquliyev qırmızı vərəqə almasaydı, start turunun intizam baxımından ideal keçdiyini deyə bilərdik. Axı 5 oyuna 15 sarı vərəqə elə də çox deyil. Üstəlik heç bir oyunda hakimlər penalti təyin etməyib. Və oyunsonrası mətbuat konfranslarında da darmadağın olan “Araz-Naxçıvan”la “Səbail”in çalışdırıcıları da idarəçilikdən gileylənməyib.

Sumqayıt - Kəpəz, KAMAL UMUDLU
Oyun sürətli və baxımlı keçmədi. "Sumqayıt"ın yorğunluğu və "Kəpəz"in uyğunlaşma problemi xeyli təhlükəli vəziyyətin səmərəsiz olmasıyla nəticələndi. Bu fonda çoxlu qayda pozuntusu da qeydə alındı ki, FİFA referisi xüsusilə "Kəpəz"ə güzəşt etmədi. Əlbəttə, buna görə Umudlunu qınamaq olmur. Çünki məğlubiyyətlə barışmaq istəməyən gəncəlilər kobud oynamaqdan çəkinmədi. "Kimyaçılar" isə rahat qələbə qazandı. Hazırlıq səviyyəsi yüksək olan meydan sahibləri intizamlı oyun göstərdi. Qonaqların durumunu nəzərə alsaq, düzü, başqa davranışa ehtiyac da yox idi. Belədə ədalət təmsilçisinin işi asan oldu. Onun mövsümün ilk tapşırığının öhdəsindən gəldiyini deyə bilərik.

Sabah – Şamaxı, İNQİLAB MƏMMƏDOV
Premyer-liqanın iddialısıyla debütantın üz-üzə gəldiyi oyunu çimərlik futbolu üzrə FİFA referisi idarə etdi. Maraqlıdı ki, Məmmədov komandaların çıxışına müdaxilə etməməyə çalışır, cəzaladan "qaçırdı". Bəli-bəli, onun 2-ci dəqiqədə Namik Ələskərova "sarı" göstərməsinə aldanıb tələskənliklə suçlamayın. Çünki Namik Kantariyaya yöndəmsiz müdaxiləsiylə xəbərdarlığa layiq idi. Hər halda, hakimin mərhəməti bir qədər sonra futbolçulara da sirayət etdi. Komandalar xüsusilə 2-ci hissədə baxımlı və qaydalar çərçivəsində oyunla yadda qaldı. Hesab bərabərləşəndən sonra daha sabit oyun keçdi ki, İnqilab bəy üçün ciddi çətinlik yaranmadı.

Araz-Naxçıvan - Qarabağ, ELÇİN MƏSİYEV
Yeni mövsümün açılış matçı Elçin Məsiyevə həvalə olundu. Adətən, “Qarabağ”ın oyunlarında idarəçiliklə bağlı problem yaranmır. Axı komandalar fərqli çəki dərəcələrində olan döyüşçülərə bənzəyir. Ağdamlıların dominantlığı Məsiyevin əsasən meydanın bir hissəsində olmasına şərait yaratdı. Nə baş hakim, nə də yan xətt hakimləri yanlış qərar verdi. Təbii ki, oyunda ən yaddaqalan məqamı Elvin Cəfərquliyevin ikinci “sarı”dan sonra qırmızı vərəqə ilə meydanı tərk etməsi oldu. Ancaq hər iki vərəqənin haqlı verildiyini düşünürəm. Bəlkə də ikinci “sarı” zamanı hadisə mərkəzdə baş verdiyinə görə Elvinin hərəkətin göz yummaq olardı. Amma kobudluq aşkar idi. Bu üzdən də referini qınaya bilmərik.

Neftçi – Turan Tovuz, ƏLİYAR AĞAYEV
FİFA referisinin idarə etdiyi oyunda hakim qərarlarıyla bağlı hansısa problem yaşanmadı. Onsuz da futbolçuların ilk dəqiqələrdən bəri kobudluğa, sərt mübarizələrə girişməməyi qarşılaşmanın sakit keçəcəyinə işarə idi. Matç ərzində verilən follar və də sarı vərəqələr də ədalətli yanaşmadan xəbər verirdi.

Zirə - Səbail, RƏVAN HƏMZƏZADƏ
İlk yarıda, demək olar ki, təkqapı oyun getdiyindən hansısa sərt mübarizələrə şahidlik etmədik. Ancaq 75-ci dəqiqədə Rüfət Abdullazadənin (Səbail) cərimə neydançası daxilində Fuad Bayramovla (Zirə) mübarizədə yerdə qalması qonaqlar tərəfindən düzgün qarşılanmadı. “Dənizçilər”in penalti tələb etdiyi epizodun videoyazısına baxanda Fuadın kobudluq etmədiyi görünür. Doğrudu, oyun zamanı epizodu dəyərləndirmək çətindi. Ancaq bu usta qərarına görə Həmzəzadəyə və köməkçilərinə alqış düşür.