Xəbər verdiyimiz kimi ''Real'' Valverde və Mbappenin qolları ilə ''Atalanta''nı 2:0 məğlub edərək Avropa superkubokunu qazandı.

Madrid nəhəngi 6-cı dəfə bu titula sahib çıxaraq ''Barselona''nı geridə qoydu və bu göstəricidə yeni rekordçu oldu. Madrid nəhəngi daha öncə 2002, 2014, 2016, 2017 və 2022-də superkuboku qazanmışdı. Bu, ''Real''ın 2024-cü ildə İspaniya superkuboku, İspaniya çempionluğu və Çempionlar Liqasının qazandığı 4-cü titul oldu. Karlo Ançelotti iki önəmli göstəriciyə nail oldu.

O, 5-ci dəfə superkuboku qazanmaqla Xosep Qvardiolanı geridə qoydu və bu titulu hamıdan çox qazanan məşqçiyə çevrildi. Bundan başqa italiyalı mütəxəssis ''Real''ın başında 14-ci titulunu qazanmaqla klub tarixinin ən titullu məşqçisi olan Migel Munyosa çatdı! Bu siyahıda 3-cü pillədə Zinəddin Zidan (11) qərarlaşıb. Futbolçulardan Dani Karvaxal ilə Luka Modriç 5-ci dəfə superkuboku qazandılar. Onlardan başqa dünyada heç bir futbolçu bu cür göstərici ilə öyünə bilməz. Və nəhayət, Modriç həm də adını ''Real''ın tarixinə yazdırdı. Belə ki, o, 27-ci titulunu qazanaraq klub tarixinin ən titullu oyunçusuna çevrildi.

Karvaxal ilə artıq ''Real''dan ayrılan Naço Fernandesin 26 titulu var.

ƏLİ