Bilindiyi kimi dünən Finlandiyanın paytaxtı Helsinkidə Avropa superkuboku uğrunda görüş keçirildi.

"Football-plus.az" xəbər verir ki, Çempionlar Liqasının son qalibi ''Real'' ilə Avropa Liqasının son qalibi ''Ayntraxt'' arasında baş tutan qarşılaşmada Madrid nəhəngi sürprizə imkan vermədi. ''Blankos'' David Alaba və Kərim Benzemanın qolları ilə 2:0 hesablı inamlı qələbə qazandı.

Maraqlıdı ki, Karlo Ançelotti təxminən 3 ay öncə ÇL-in finalında ''Liverpul''a qarşı oyunda meydana buraxdığı ''11-liy''ə bu dəfə də güvənmişdi. Çuameni və Rüdiger kimi yeni transferlər yalnız son 5 dəqiqədə meydana daxil oldular. ''Real'' Avropa superkubokunu 5-ci dəfə qazanmaqla bu göstəricidə lider olan ''Barselona'' ilə ''Milan''a çatdı. Ümumilikdə ''Kral klubu'' tarixinin 94-cü titulunu qazandı.

''Real''ın iştirak etdiyi son 19 finalın cəmi 2-dən titulsuz ayrıldığını bildirək. Son illərdə yalnız ''Atletiko'' final statusu daşıyan oyunlarda ''Real''ı üstələməyi bacarıb. Bu, 2014-də İspaniya superkuboku və 2018-də Avropa superkuboku uğrunda oyunda baş verib. Yeri gəlmişkən, Karlo Ançelotti bu titula 4-cü dəfə sahib çıxmaqla Xosep Qvardiolanı üstələdi və yeni rekordçuya çevrildi. İtaliyalı mütəxəssis superkuboku daha öncə 2 dəfə ''Milan''la (2003, 2007) və bir dəfə ''Real'' (2014) ilə qazanmışdı. Benzema üçün də oyun əlamətdar oldu. Kərim ''Real''ın heyətində 602-ci rəsmi oyunda 324-cü qolunu vurdu. Bununla da Benzema əfsanəvi Raulu (323) geridə qoyaraq klub tarixinin ən məhsuldar oyunçuları arasında 2-ci pilləyə yüksəldi. İndi Benzema bu siyahıda yalnız Kriştiano Ronaldodan (450 qol) geri qalır.