Misli premyer-liqasında 2-ci tur da arxada qaldı.

Hesabat turunda məhsuldarlıq o qədər də yüksək olmadı. Ancaq komandalrın oyun tərzi və hansı potensiala malik olduğu getdikcə üzə çıxmaqdadı.
Təsəvvürləri yanıltmayan komandalardan biri “Qarabağ”, o biri isə “Kəpəz”di. Hər birinin indiki durumu bəllidi. Qurban Qurbanov bu turda da əsas oyunçularına istirahət verib, meydana ikinci heyəti buraxdı və yanılmadı. Hadisələrin axarı onu göstərir ki, ağdamlılar nəinki indi, hələ bundan bir neçə tur sonra, bəlkə elə ilk dövrənin sonuna qədər də ikinci heyətlə mübarizə aparacaq və lider kürsüsündə əyləşəcək gücdədi. “Kəpəz”ə gəlincə, komanda yenidən formalaşdığından futbolçular anlaşma baxımından çətinlik çəkir. Demək olar ki, oyunboyu “Qarabağ”ın təzyiqi sayəsində yalnız müdafiə olundular.

“Araz-Naxçıvan” isə qələbə qazanmaqla durumunu müyyən dərəcədə yaxşılaşdırdı. Beləcə “qırmızı-ağlar”ın artıq autsayderlər arasından çıxmağa başladığını deyə bilərik. “Şirlər”in isə durumu nisbətən çətindi. Çünki onların xal qopara biləcəyi komandalardan biri də Muxtar Respublika təmsilçisi idi. Görünən odu ki, Ayxan Abbasov elitada qalmaq üçün çox çalışacaq.

“Neftçi” ardıcıl ikinci oyunda da heç-heçə etməklə azarkeşlərinin qəzəbinə tuş gəldi. Fasilə zamanı klubda baş verən o qədər dəyişiklikdən sonra “ağ-qaralar”ın toparlanacağı gözlənilirdi. Ancaq indiki durum bizə deyir ki, onlar hələ də ötən mövsümün təsirindən çıxa bilməyib. “Səbail” ilk xalını qazanmaqla yanaşı, gənc heyətlə daha yaxşı nəticələr əldə edə biləcəyini göstərdi.

Kurban Berdıyevin rəhbərliyi altında yeni mövsümdə ilk qələbəsini qazanan “Turan Tovuz” artıq iddiasını ortaya qoydu. Geniş olmayan heyətlə minimal qələbənin qazanılması yaxşıdı. Əlbəttə, “Sumqayıt”ın heyət kasadlığı da özünü göstərdi. Ancaq tovuzluların müdafiə xəttinin turdan-tura daha da möhkəmləndiyinə şahid oluruq. Onlar hələ ki qol buraxmayıb.

“Zirə” bu mövsüm sanki praym dönəminə start verib. Komanda həm avrokuboklarda, həm də ölkə çempionatında uğurlu çıxışla çempionluq və kubok yolunda başlıca namizədlərdən biri olacağını deyir. “Sabah”ın nəticələri böyük təəssüf doğurur. Çünki “Qarabağ”la “dirəşəcəyi” təxmin olunan komandanın belə startı heç də yaxşı deyil. Artıq mövsümün əvvəlində 5 xal itirilib. Bu isə nəinki çempionluq, hətta avrokuboklar uğrunda vəsiqə qazanmaq baxımından da müəyyən çətinlik yaradacaq.

Misli premyer-liqası
1-ci dövrə, 2-ci tur
9 avqust
Qarabağ – Kəpəz 3:0
10 avqust
Araz-Naxçıvan – Şamaxı 1:0
Səbail – Neftçi 1:1
11 avqust
Turan Tovuz – Sumqayıt 1:0
Sabah – Zirə 0:2
1. Qarabağ 2 2 0 0 7-1 6
2. Zirə 2 2 0 0 6-1 6
3. Turan Tovuz 2 1 1 0 1-0 4
4. Sumqayıt 2 1 0 1 2-1 3
5. Araz-Naxçıvan 2 1 0 1 2-4 3
6. Neftçi 2 0 2 0 1-1 2
7. Şamaxı 2 0 1 1 2-3 1
8. Sabah 2 0 1 1 2-4 1
9. Səbail 2 0 1 1 2-5 1
10. Kəpəz 2 0 0 2 0-5 0

Bombardirlər: Davit Volkov (Zirə) – 3, Riçard Almeyda (Qarabağ) – 2.

Növbəti turun proqramı
16 avqust, 17.20. Şamaxı – Qarabağ
17 avqust, 18.15. Kəpəz – Turan Tovuz
17 avqust, 20.30. Sumqayıt – Səbail
18 avqust, 18.15. Zirə - Araz-Naxçıvan
18 avqust, 20.30. Neftçi – Sabah

KAMAL SƏFƏR