Misli premyer-liqasının 17-ci turu da maraqlı oyunlarla yadda qaldı.
“Kəpəz” yeni baş məşqçinin gəlişindən sonra xal ehtiyatını xeyli artırıb, ən əsası aşkar autsayder obrazından uzaqlaşıb. “Araz-Naxçıvan” və “Turan Tovuz” həsrətində olduğu qələbəyə qovuşdusa, “Səbail” “Qəbələ”nin autsayder mövqeyindən qurtulmasına imkan vermədi. Sadalananların arxa fonunda isə gərgin mübarizənin şahidi olduq.
Turun ilk matçında Gəncə təmsilçisi Sumqayıtdan gələn qonaqları sınağa çəkdi. “Kəpəz”in bu iddialı rəqibdən 1 xal qoparması təhlükəli zonadan uzaqlaşmaq yönündə növbəti addımdı. Əlbəttə, burda Şahin Diniyevin yetirmələrinin də rolu danılmazdı. “Səbail”in baş məşqçisi oyunsonrası mətbuat konfransında “Qəbələ”nin halına üzülsə də, komandası heç də mərhəmətli davranmadı. “Qırmızı-qaralar” Bayıldan param-parça ayrıldı. Ardıcıl 3-cü böyükhesablı məğlubiyyət artıq nəyəsə işarədi.
“Araz-Naxçıvan”ın Masazır təmsilçisini xalsız qoyması da gözlənilməz oldu. “Sabah” gah yıxılır, gah durur... Belədə Azər Bağırovun komandasına fürsətdən istifadə etmək qaldı. “Bayquşlar”ı 2 cavabsız qolla yola salan “qırmızı-ağlar” yoluna inamla davam edir. Düzdü, “Sabah”ın qış fasiləsinə qədər ilk “beşlik”də yer almaq şansı var, lakin bunun reallaşmaq ehtimalı azdı. Deyəsən, “tələbələr”in yeni transferləri özünü göstərmək üçün 3-cü dövrünü gözləyir. Ən azı masazırlı azarkeşlər buna ümid etməlidi. Bəlkə onlar da nə vaxtsa tovuzlu azarkeşlər kimi sevinəcək. Çünki “Turan Tovuz” nə az, nə çox – 5 tur sonra “qələbə orucunu açdı”. Özü də doğma meydanda və medallara iddialı “Zirə” ilə oyunfa... Düzdü, qələbə cəmi 1 qolla gəldi, lakin “Zirə”nin güclü müdafiə xətti qarşısında bu da qənaətbəxş nəticə sayılır.
Tura “Qarabağ” – “Neftçi” derbisiylə yekun vuruldu. Sadəcə, fanklub üzvlərinin gəldiyi matçda “köhlən atlar” rəqibini məyus yola saldı. İkinci hissədə vurulan qollar sayəsində lider “taxtını bərkitdi”. “Qarabağ” 18-ci turda “Zirə”yə məğlub olsa belə, qış fasiləsinə qalib kimi yollanacaq. Ağdamlılar indidən ən yaxın izləyicisi ilə 9 xallıq fərq yaradıb. “Neftçi”nin durumu isə acınacaqlıdı. Bakılılar dünən meydandan “istefa” şüarı altında ayrıldı...
Misli premyer-liqası
2-ci dövrə, 17-ci tur
14 dekabr
Kəpəz – Sumqayıt 1:1
15 dekabr
Səbail – Qəbələ 3:0
Araz-Naxçıvan – Sabah 2:0
16 dekabr
Turan Tovuz – Zirə 1:0
18 dekabr
Qarabağ – Neftçi 2:0
1. Qarabağ 17 12 2 3 44-14 38
2. Zirə 17 8 5 4 13-9 29
3. Səbail 17 7 5 5 26-26 26
4. Araz-Naxçıvan 17 7 5 5 19-16 26
5. Neftçi 17 7 4 6 19-17 25
6. Sumqayıt 17 6 6 5 18-23 24
7. Sabah 17 6 4 7 25-21 22
8. Turan Tovuz 17 5 4 8 26-27 19
9. Kəpəz 17 3 5 9 11-27 14
10. Qəbələ 17 3 2 12 11-32 11
Bombardirlər: Olavio Juninyo (Qarabağ) – 12, Aleksandr Ramalinqom (Səbail) – 7.
Növbəti turun proqramı
22 dekabr, 16.00. Qəbələ - Sabah
23 dekabr, 16.00. Turan Tovuz – Araz-Naxçıvan
23 dekabr, 18.30. Sumqayıt – Səbail
24 dekabr, 16.00. Neftçi – Kəpəz
24 dekabr, 18.30. Zirə - Qarabağ
KƏNAN BAHADIR