31-ci tur məhsuldarlığına görə çempionata xüsusi rəng qatdı.

Qapılara 18 qol vuruldu. Bundan öncə belə məhsuldarlıq 10-cu və 16-cı turlara təsadüf edir (19 qol). Bu dəfə də sürpriz nəticələr qeydə alındı. Xüsusən də ilk iki qarşılaşma diqqəti çəkdi. “Turan Tovuz” ən önəmli silahı olan “12-ci oyunçu”nun, yəni azarkeşlərinin gözü qarşısında darmadağın oldu. Çempionluğu rəsmiləşdirən “Qarabağ” isə sonuncu pillədə qərarlaşan “Qənələ” ilə bacarmadı. Bununla da ağdamlılar ardıcıl ikinci matçda xal itirdi.
Turun Tovuzda keçirilən ilk oyunu ilə bağlı çoxlarının fikri doğrulmadı. Söhbət ondan getmir ki, “Sumqayıt” zəifdi və ya belə qələbəyə layiq deyildi. Sadəcə, “Turan Tovuz”un cari mövsümdə öz meydanında heç bir rəqibdən 4 qol görməmişdi. Hər halda, “Qəbələ” üzərində qələbədən sonra iştahı artan tovuzlular sarsıdıcı zərbə aldı.

Çempionluğu 28-ci turda rəsmiləşdirən “Qarabağ”ın ardıcıl ikinci premyer-liqa matçından 3 xalla ayrıla bilməməsi təəccüb doğurdu. Fəqət anlamaq olar. Axı komandanı qarşıda kubok oyunu da gözləyir. Doğrudu, kubok duelinin taleyi böyük ehtimalla həll edilib. Çünki indiki “Neftçi”nin 0:4 hesablı məğlubiyyətdən sonra geridönüş etməsi mümkünsüzdü. Hər halda, Qurban Qurbanov riskə getməyərək, futbolçularını çox yormadı. “Qəbələ” isə suda boğulan adam kimi saman çöpündən yapışıb. “Qırmızı-qaralar” onlara hava və su kimi vacib olan 1 xalı qazandı, ən yaxın rəqibi “Kəpəz”in də məğlub olmasından yararlanaraq aradakı xal fərqini 14-ə endirdi. Ancaq heç kim elitada qalmaqla bağlı möcüzəyə inanmır. Etiraf etmək lazımdı ki, heç “Qəbələ”nin də düşərgəsində buna inanan yoxdu!

Hazırda avrokuboklara vəsiqə qazanmaq potensialında olan iki komanda varsa, biri də “Neftçi”di. Həm maliyyə, həm oyunçu keyfiyyəti, həm də infrastruktur baxımından. Amma paytaxt təmsilçisi gözləntiləri doğrultmur. Komandanın hələ də oyun tərzi sabitləşməyib. Adrian Mutunu uğursuz nəticələrə görə göndərən rəhbərlik Miodraq Bojoviçdən də istədiyini ala bilmir. Monteneqrolu mütəxəssis hər dəfə vaxta ehtiyac duyduğunu deyir. Amma nə vaxta kimi?! “Zirə”yə, Rəşad Sadıqova isə sadəcə, əhsən düşür. Azlıqda qalmasına baxmayaraq, müdafiəyə çəkilmədi, dəyişikliklərlə orta sahəni gücləndirdi. Nəticə də gənc mütəxəssisin doğru qərar verdiyini göstərdi.

“Kəpəz” Tovuzda ümumilikdə pis təsir bağışlamasa da, “Sabah”ın futbolçularının fərdi keyfiyyəti sayəsində qələbə qazandığını demək mümkündü. Masazır təmsilçisi öz növbəsində ardıcıl iki məğlubiyyətdən sonra qazandığı iki qələbəylə “avrokubok zonası”ndan gözünü çəkmədi. “Səbail” də hesabat turunda qələbə qazanmaqla avrokuboklara vəsiqə uğrunda mübarizədən çəkilmədiyini göstərdi. Hazırda ilk “altılıq”da qərarlaşan komandanın bu mövsüm üçün müəyyənləşdirilən hədəfə çatdığını deyə bilərik. Amma necə deyərlər, iştah diş altındadı! Elmar Baxşıyev isə yeni komandası “Araz-Naxçıvan”la ardıcıl ikinci məğlubiyyətini aldı. Belə görünür ki, naxçıvanlıların dərdinə əlac tapmaq çətindi. Fikir verin, onlar sonuncu dəfə fevralın 13-də “Neftçi” üzərində qələbəyə sevinib. “Qırmızı-ağlar” sonrakı 9 oyunun 7-də uduzub, 2-də heç-heçə edib. Belə nəticələrlə ancaq autsayder olmaq mümkündü!

Misli premyer-liqası
4-cü dövrə, 31-ci tur
19 aprel
Turan Tovuz – Sumqayıt 1:4
20 aprel
Qarabağ – Qəbələ 2:2
Zirə - Neftçi 3:1
21 aprel
Kəpəz – Sabah 1:2
Araz-Naxçıvan - Səbail 0:2
1. Qarabağ 31 23 4 4 85-31 73
2. Zirə 31 13 10 8 29-19 49
3. Sumqayıt 31 12 11 8 32-34 47
4. Neftçi 31 13 8 10 40-33 47
5. Sabah 31 13 7 11 44-38 46
6. Səbail 31 11 9 11 47-49 42
7. Turan Tovuz 31 11 9 11 47-44 42
8. Araz-Naxçıvan 31 8 8 15 28-44 32
9. Kəpəz 31 8 7 16 36-59 31
10. Qəbələ 31 4 5 22 23-60 17
Bombardirlər: Olavio Juninyo (Qarabağ) – 17, Aleksandr Ramalinqom (Səbail) - 13, Yassin Benzya (Qarabağ) – 12.
Növbəti turun proqramı
27 aprel, 18.00. Sabah – Səbail
28 aprel, 15.30. Qəbələ - Kəpəz
28 aprel, 17.45. Neftçi – Turan Tovuz
28 aprel, 20.00. Sumqayıt - Qarabağ
29 aprel, 19.00. Zirə - Araz-Naxçıvan

KAMAL SƏFƏR